فيديو: جمع عددين كلٌّ منهما مكوَّن من رقمين

يوضح الفيديو كيفية جمع عددين مكوَّنين من رقمين باستخدام إعادة التجميع، مع التوضيح باستخدام قِطَع العد، وأمثلةً عليها.

٠٢:٣٩

‏نسخة الفيديو النصية

جمع عددين من رقمين.

في الفيديو ده هنتعلم إزاي بنجمع عددين مكوّنين من رقمين، باستخدام إعادة التجميع.

عاوزين نوجد تمنتاشر زائد خمسة وعشرين.

أول حاجة هنكتب السؤال بالشكل ده. وهنعبّر عنه باستخدام قطع العَدّ بالشكل ده. بعدين هنجمع الآحاد مع بعضها. فهيبقى تمنية زائد خمسة بيساوي تلتاشر. بعدين هنستخدم إعادة التجميع لجمع كل عشر قطع من الآحاد في قطعة عشرات واحدة. فهنجمّع عشر قطع آحاد ونكون بيهم قطعة عشرات بالشكل ده. فهيتبقى معانا تلات قطع آحاد. فهنكتب تلاتة تحت الآحاد، وهنضيف واحد فوق العشرات. بعدين نجمع العشرات. فهيبقى واحد زائد واحد زائد اتنين. هيساوي أربعة. فنكتب أربعة تحت العشرات. يعني تمنتاشر زائد خمسة وعشرين بيساوي تلاتة وأربعين. وده نفس عدد قطع العَدّ.

نتنقل لصفحة تانية ونحل مثال تاني. عاوزين نوجد تلاتة وتلاتين زائد سبعتاشر.

فأول حاجة هنكتب السؤال بالشكل ده. بعدين هنعبّر عنه باستخدام قطع العد بالشكل ده. بعدين هنجمع الآحاد. فهيبقى تلاتة زائد سبعة بيساوي عشرة. فهنجمّع العشر قطع آحاد مع بعض؛ لتكوين قطعة عشرات واحدة. بالشكل ده وبما إن ما اتبقاش أي قطعة في الآحاد. فهنكتب صفر تحت الآحاد. وهنضيف واحد فوق العشرات. بعدين نجمع العشرات. فهيبقى واحد زائد تلاتة زائد واحد هيساوي خمسة. فهنكتب خمسة تحت العشرات. يبقى تلاتة وتلاتين زائد سبعتاشر بيساوي خمسين. ودي نفس الإجابة اللي بتعبّر عنها قطع العَدّ.

وبكده نبقى خلّصنا الفيديو ده اللي اتعلمنا فيه جمع عددين مكوّنين من رقمين باستخدام إعادة التجميع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.