فيديو: تقريب الأعداد لأقرب عشرة ولأقرب مائة‎

يتناول الفيديو أهمية استخدام التقريب لتسهيل العمليات الحسابية المختلفة، مع كيفية تقريب الأعداد الصحيحة لأقرب عشرة أو لأقرب مائة.

٠٤:١٠

‏نسخة الفيديو النصية

هنتعلّم في الفيديو ده إزاي نقدر نقرّب الأعداد إلى أقرب عشرة، أو أقرب مائة.

دلوقتي يا ترى إحنا ليه بنلجأ للتقريب؟ بنلجأ للتقريب عشان نحوّل الأعداد اللي عندنا لأعداد أسهل في التعامل معاها. فمثلًا لو عرفنا إن سارة بتستخدم هاتفها المحمول لمدة اتنين وستين دقيقة يوميًّا. وأختها ريم بتستخدم هاتفها المحمول لمدة مية وستاشر دقيقة يوميًّا. والمطلوب منّنا نعرف كم دقيقة تقريبًا تستخدمه كلٌّ منهما.

في المثال اللي عندنا ده هنقرّب الأعداد اللي قدّامنا دي لأقرب عشرة. هنبدأ بأول عدد اللي هو اتنين وستين دقيقة يوميًّا. هنستخدم خط الأعداد؛ نحطّ عليه الأعداد من ستين إلى سبعين. ونشوف العدد اتنين وستين؛ هل هو أقرب للعشرة السابقة ليه اللي هي الستين، ولّا أقرب للعشرة اللي بعده اللي هي السبعين. هنلاحظ إن اتنين وستين أقرب إلى الستين. فكده نقدر نقول إن سارة استخدمت هاتفها المحمول لمدة ستين دقيقة تقريبًا.

دلوقتي هنقرّب عدد الدقايق اللي بتستخدم فيها ريم هاتفها المحمول. هنستخدم خط الأعداد، والتدريج بتاعه ما بين مية وعشرة لمية وعشرين. والعدد اللي مطلوب إن إحنا نقرّبه هو مية وستاشر. هنبتدي نشوف هو المية وستاشر أقرب للعشرة اللي أقل منه اللي هي مية وعشرة. ولّا أقرب للعشرة اللي أكتر منه اللي هي مية وعشرين. هنلاقي إن مية وستاشر أقرب للعشرة اللي أكبر منه اللي هي مية وعشرين. وده معناه إننا نقدر نقول إن ريم بتستخدم هاتفها المحمول لمدة مية وعشرين دقيقة تقريبًا يوميًّا.

هنشوف دلوقتي إزاي ممكن نقرّب الأعداد إلى أقرب مائة. في المثال اللي عندنا ده هنعرف إن نادر قرا كتاب بيتكوّن من ميتين سبعة وستين صفحة. مطلوب منّنا نكتب عدد الصفحات مقرّبًا لأقرب مائة. هنستخدم خط الأعداد عشان نقرّب العدد اللي عندنا لأقرب مية. هنلاحظ إن ميتين سبعة وستين موجود ما بين … إيه المية اللي قبله؟ الميتين. وإيه المية اللي بعده؟ تلتمية.

عايزين نشوف هو أقرب للمية اللي قبله ولّا للمية اللي بعده. هنلاحظ إن العدد اللي في منتصف المسافة ما بين الميتين والتلتمية هو ميتين وخمسين. فأيّ عدد من أول ميتين وخمسين لغاية قبل التلتمية على طول لو قرّبناه لأقرب مية فهيبقى أقرب للتلتمية. وده معناه إن ميتين سبعة وستين هتبقى أقرب للتلتمية منها للميتين. إذن هنقرّب العدد ميتين سبعة وستين إلى التلتمية.

لو عرفنا إن في أحد محطات القطارات كان فيه ألف وربعمية تلاتة وعشرين مسافر. مطلوب منّنا نقرّب عدد المسافرين لأقرب مائة. هنرجع لخط الأعداد عشان يساعدنا في عملية التقريب. ألف وربعمية تلاتة وعشرين؛ المائة اللي قبلها على طول أو اللي أصغر منها على طول هي ألف وربعمية. والمائة اللي أكبر منها على طول هي ألف وخمسمية. عايزين نشوف العدد ألف وربعمية تلاتة وعشرين موقعه فين على خط الأعداد. هنلاقيه على طول قبل العدد ألف وربعمية خمسة وعشرين. ألف وربعمية تلاتة وعشرين.

دلوقتي إحنا محتاجين نشوف هل هو أقرب للمية اللي قبله أو اللي أقل منه اللي هي ألف وربعمية. ولّا للمية اللي أكبر اللي هي ألف وخمسمية. كده بالطبع هنلاقيه أقرب لألف وربعمية؛ يعني المية اللي قبله. يبقى كده نقدر نقرّب عدد المسافرين اللي في المحطة اللي هو ألف وربعمية تلاتة وعشرين إلى ألف وربعمية مسافر تقريبًا.

اتعلّمنا في الفيديو ده إن التقريب فايدته إنه بيحوّل لنا الأعداد اللي بنتعامل معاها لأعداد أسهل في التعامل. وعرفنا إزاي نقدر نقرّب الأعداد إمّا إلى أقرب عشرة، أو إلى أقرب مائة؛ باستخدام خط الأعداد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.