فيديو: تقريب الأعداد لأقرب ألف

يتناول الفيديو خطوات تقريب الأعداد الصحيحة بحسب الخانة المكانية المطلوب التقريب إليها.

٠٩:١٢

‏نسخة الفيديو النصية

هنعرف في الفيديو ده إزّاي نقدر نقرّب الأعداد الصحيحة إلى أقرب ألف.

زيّ ما إحنا عارفين إحنا بنستخدم التقريب عشان نحصل على أعداد أسهل في التعامل معاها. إحنا دلوقتي هنقرّب الأعداد المطلوبة لأقرب ألف. عندنا في المثال ده معطى عندنا عدد زوّار المتحف خلال خمسة أسابيع. ومطلوب منّنا أول حاجة نوجد العدد التقريبي للزوّار في الأسبوع التالت.

هنبصّ على الأعداد المسجلة عندنا. ده الأسبوع التالت، وده عدد الزوّار اللي اتسجّل في الأسبوع التالت. عايزين نستخدم خط الأعداد عشان يساعدنا عَ التقريب.

دلوقتي عدد الزوّار اللي عندنا: أربعة آلاف ستمية أربعة وتمانين؛ يعني محصور بين: أربعة آلاف، وخمسة آلاف. هنستخدم خط الأعداد، ونبتدي التدريج بتاعه من أربعة آلاف إلى خمسة آلاف. منتصف المسافة هيبقى أربعة آلاف وخمسمية. فهنحطّ دلوقتي النقطة أربعة آلاف ستمية أربعة وتمانين في مكانها على خط الأعداد.

هنقارن مكانها؛ هل هي أقرب للألف السابقة ليها اللي هي أربعة آلاف، ولّا أقرب للألف اللي بعدها اللي هي خمسة آلاف؟

هنلاحظ إن النقطة أربعة آلاف ستمية أربعة وتمانين عدّت منتصف المسافة ما بين الأربعة آلاف، والخمسة آلاف؛ فكده نعتبرها أقرب للخمسة آلاف. فيبقى هنقرّب أربعة آلاف ستمية أربعة وتمانين لخمسة آلاف. يبقى كده نقدر نستنتج إن العدد التقريبي لزوّار المتحف في الأسبوع التالت هو: خمسة آلاف.

طيّب مطلوب منّنا كمان نوجد العدد التقريبي للزوّار في الأسبوع التاني.

هنبصّ عَ الأسبوع التاني. عدد الزوّار فيه كان ألفين تلتمية واحد وأربعين. العدد ألفين تلتمية واحد وأربعين بينحصر ما بين: ألفين، وتلات آلاف. ألفين، وتلات آلاف منتصف المسافة بينهم ألفين وخمسمية. يعني نقدر نقول إن ألفين تلتمية واحد وأربعين تقريبًا هيبقى في المكان ده.

دلوقتي هنشوف على خط الأعداد. يا ترى العدد ألفين تلتمية واحد وأربعين أقرب للألف اللي قبله اللي هي ألفين، ولّا للألف اللي بعده اللي هي تلات آلاف؟

طبعًا هنلاحظ إن هو أقرب للألف اللي قبله، فكده هنقرّب ألفين تلتمية واحد وأربعين إلى ألفين. يعني كده قدِرنا نستنتج إن العدد التقريبي للزوّار في الأسبوع التاني هيبقى حوالي: ألفين.

هنشوف دلوقتي مع بعض الخطوات اللي بنقدر نتّبعها عشان نقرّب الأعداد اللي عندنا.

في المثال اللي عندنا ده بنعرف إن في الأسبوع الماضي زار حديقة الحيوان خمسة آلاف ربعمية تسعة وتسعين زائرًا. مطلوب منّنا نحدّد عدد زوّار الحديقة مقرّبًا إلى أقرب ألف.

نقدر نستخدم مجموعة الخطوات، اللي هنقول عليها دلوقتي دي؛ عشان نقرّب أيّ عدد مطلوب منّنا حسب القيمة المكانية اللي مطلوب التقريب ليها.

الخطوة الأولى: هنحطّ خط تحت الرقم اللي في الخانة اللي مطلوب منّنا نقرّب ليها. فإحنا في المثال ده مطلوب منّنا نقرّب لأقرب ألف. عندنا التسعة الأولى دي الآحاد. وبعدين التسعة اللي بعدها عشرات. الأربعة دي في المئات. يبقى المطلوب منّنا نقرّب لأقرب ألف؛ يعني الخانة الأخيرة اللي في العدد اللي عندنا.

الخطوة التانية: هنبصّ على الرقم اللي في الخانة اللي على يمين الخانة اللي إحنا حطّينا تحتها الخط. الرقم ده هنلاقيه: أربعة.

الخطوة التالتة: لو كان الرقم ده أربعة أو أقل، مش هنغيّر حاجة في الرقم اللي تحته الخط. أمّا لو كان خمسة أو أكتر، فهنضيف واحد للرقم اللي تحته الخط. وإحنا الرقم اللي عندنا: أربعة، فبالتالي مش هنضيف أيّ رقم على الرقم اللي قبله، اللي هو الخمسة. يعني الخمسة اللي في خانة الألوف هتفضل زيّ ما هي.

الخطوة الرابعة: إننا هنستبدل كل الأرقام اللي على يمين الرقم اللي تحته الخط بأصفار. يعني هنستبدل: الأربعة، والتسعة، والتسعة؛ ونحطّ بدلهم كلهم أصفار. فيبقى العدد اللي عندنا بعد التقريب هو: خمسة آلاف. يعني نقدر نقول إن عدد زوّار الحديقة مقرّبًا لأقرب ألف هيبقى: خمسة آلاف زائر.

دلوقتي نقدر نقرّب باستخدام خط الأعداد؛ عشان نتأكّد من صحة التقريب اللي وصلنا له.

هنستخدم خط الأعداد، والتدريج عندنا من خمسة آلاف لست آلاف. عشان العدد اللي مطلوب تقريبه، اللي هو: خمسة آلاف ربعمية تسعة وتسعين، بيقع ما بين الخمسة آلاف، والست آلاف. هنشوف دلوقتي هل هو أقرب للألف السابقة ليه اللي هي الخمسة آلاف. ولّا أقرب للألف اللي أكبر منه أو اللي بعده اللي هي ست آلاف.

هنلاحظ إن خمسة آلاف ربعمية تسعة وتسعين بتقع قبل منتصف المسافة ما بين الخمسة آلاف، والست آلاف. فبالتالي هي أقرب من الخمسة آلاف. يعني بالفعل نقدر نقرّب عدد الزوّار اللي عندنا لخمسة آلاف زائر. يبقى كده اتأكّدنا من صحة الناتج اللي حصلنا عليه باستخدام الخطوات الأربعة اللي اتّبعناها في إجراء عملية التقريب.

في المثال التاني ده مطلوب منّنا نكمّل الجدول اللي قدّامنا ده. عندنا نفس العدد، بس مرة مطلوب منّنا نقرّبه لأقرب عشرة، ومرة مطلوب منّنا نقرّبه لأقرب مية، ومرة نقرّبه لأقرب ألف.

هنكتب العدد الأول. أول خطوة عندنا، مِ الخطوات اللي بنتّبعها في عملية التقريب، إن إحنا هنحطّ خط تحت المكان أو الخانة اللي مطلوب التقريب ليها. مطلوب منّنا نقرّب لأقرب عشرة، فهنحطّ خط تحت خانة العشرات.

الخطوة التانية: هنبصّ على الرقم اللي على يمين الخانة اللي مطلوب التقريب ليها.

الخطوة التالتة: هنشوف الرقم ده. لو كان خمسة أو أكتر، فده معناه إننا هنخلّي الرقم اللي تحته الخط أزيد بواحد؛ يعني هيبقى: تمنية.

والخطوة الرابعة: إننا هنبدّل كل الأرقام اللي على يمين الخانة اللي تحتها الخط؛ كل الأرقام هنحوّلها لأصفار. يبقى لمّا نقرّب العدد اللي عندنا لأقرب عشرة هيبقى: تمن تلاف تلتمية وتمانين.

طب تاني حاجة مطلوبة منّنا نقرّب لأقرب مية.

هنبدأ نعيد نفس الخطوات. هنشوف الخانة اللي المفروض نقرّب ليها. مطلوب نقرّب لأقرب مية، يعني نحطّ خط تحت الرقم اللي في الخانة دي؛ يعني تحت المئات.

الخطوة التانية: هنشوف الرقم اللي على يمين الخانة دي.

الخطوة التالتة: لو الرقم ده كان خمسة أو أكتر، فبنخلّي الرقم اللي تحته الخط أزيد واحد. فالرقم اللي عندنا على يمين الخانة دي هو: سبعة، فهنخلّي الرقم اللي تحته الخط أزيد بواحد؛ فهيبقى: أربعة.

الخطوة الرابعة: هنستبدل كل الأرقام اللي على يمين الخانة اللي تحتها الخط بأصفار. وده معناه إن العدد ده لو قرّبناه لأقرب مية هيصبح: تمن تلاف وربعمية.

تالت حاجة مطلوبة منّنا إن إحنا نقرّب العدد نفسه لأقرب ألف.

يبقى أول خطوة هنعملها: هنشوف الخانة اللي محتاجين نقرّب ليها؛ وهي خانة الألوف. هنحطّ خط تحت الرقم اللي في الخانة دي.

الخطوة التانية: هنشوف الرقم اللي على يمين الخانة دي.

الخطوة التالتة: إن لو كان الرقم ده أقل من الخمسة، فمش هنزوّد الرقم اللي في الخانة اللي تحتها الخط أيّ قيمة. هيفضل زيّ ما هو. أمّا لو كان خمسة أو أكتر، فبنزوّده واحد. في الحالة اللي عندنا دي هو: تلاتة؛ يعني أقل من خمسة. فإحنا كده مش هنغيّر الرقم اللي تحته الخط، هيفضل زيّ ما هو.

الخطوة الرابعة: هنستبدل كل الأرقام اللي على يمين الخانة اللي تحتها الخط؛ هنستبدلهم بأصفار. يبقى كده عرفنا إن العدد ده لمّا نقرّبه لأقرب ألف هيصبح: تمن تلاف.

عرفنا في الفيديو ده الخطوات اللي بنستخدمها عمومًا في تقريب الأعداد. إحنا اتعلّمنا إزّاي نستخدم خط الأعداد في تقريب أيّ عدد، فيه خطوات تانية ممكن نتّبعها عشان نقرّب أيّ عدد.

الخطوة الأولى: إننا بنحطّ خط تحت الرقم أو الخانة اللي المطلوب التقريب ليها. الخطوة التانية: هنبصّ للرقم اللي على يمين الخانة دي. الخطوة التالتة: لو كان الرقم ده أربعة، أو أقل؛ مش هنغيّر الرقم اللي تحته خط. أمّا لو كان الرقم ده خمسة، أو أكتر؛ فهنضيف واحد للرقم اللي تحته خط. والخطوة الرابعة: إننا هنستبدل كل الأرقام اللي على يمين الرقم اللي تحته الخط بأصفار.

وكده يبقى قدِرنا نعرف إزّاي نقرّب أيّ عدد صحيح حسب القيمة المكانية اللي المطلوب التقريب ليها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.