فيديو: إيجاد قياس زاوية قاعدة المثلث المتساوي الساقين

أوجد ق∠ﺏأﺟ.

٠٢:٣٨

‏نسخة الفيديو النصية

أوجد قياس الزاوية ب أ ﺟ.

ومعطى عندنا في الشكل المثلث أ ب ﺟ. والمطلوب إننا نوجد قياس الزاوية ب أ ﺟ، اللي هي الزاوية دي. وهنلاحظ من الشكل إن المثلث أ ب ﺟ مثلث متساوي الساقين؛ لأن معطى عندنا إن أ ﺟ يساوي ب ﺟ. وبما إن أ ﺟ يساوي ب ﺟ؛ إذن قياس الزاوية ب أ ﺟ يساوي قياس الزاوية أ ب ﺟ. يعني في الشكل عندنا، هيبقى قياس الزاوية دي بيساوي قياس الزاوية دي. ومعطى عندنا إن قياس الزاوية أ ﺟ ب تمنية وخمسين درجة. وعرفنا أيضًا إن الزاويتين دول ليهم نفس القياس.

وخلّينا نفتكر إن مجموع قياسات الزوايا الداخلية للمثلث يساوي مية وتمانين درجة. فبالتالي بما إن قياس الزاوية ب ﺟ أ يساوي تمنية وخمسين درجة. وزيّ ما عرفنا إن مجموع قياسات الزوايا الداخلية للمثلث بتساوي مية وتمانين درجة. فبالتالي هيبقى قياس الزاوية ب ﺟ أ، زائد قياس الزاوية ب أ ﺟ، زائد قياس الزاوية أ ب ﺟ يساوي مية وتمانين درجة.

وبما إن معطى عندنا إن قياس الزاوية ب ﺟ أ يساوي تمنية وخمسين درجة. وبما إن إحنا أثبتنا هنا إن قياس الزاوية ب أ ﺟ يساوي قياس الزاوية أ ب ﺟ. فبالتالي هنعوّض هنا عن قياس الزاوية أ ب ﺟ بقياس الزاوية ب أ ﺟ. فبالتالي هيبقى عندنا هنا قياس الزاوية ب أ ﺟ زائد قياس الزاوية ب أ ﺟ، يعني بيساوي اتنين قياس الزاوية ب أ ﺟ. فبالتالي هتبقى المعادلة عندنا بالشكل ده: تمنية وخمسين درجة، اللي هي قياس الزاوية ب ﺟ أ، زائد اتنين قياس الزاوية ب أ ﺟ يساوي مية وتمانين درجة. وبطرح تمنية وخمسين درجة من الطرفين، هتبقى المعادلة هي: اتنين قياس الزاوية ب أ ﺟ يساوي مية اتنين وعشرين درجة.

بعد كده عشان نوجد قياس الزاوية ب أ ﺟ، يبقى هنقسم طرفَي المعادلة على اتنين. فهيبقى الطرف الأيمن للمعادلة اتنين قياس الزاوية ب أ ﺟ على اتنين. ونقدر نختصر اتنين مع اتنين، فيتبقَّى عندنا قياس الزاوية ب أ ﺟ. وأمَّا الطرف الأيسر للمعادلة، فهنقسم مية اتنين وعشرين درجة على اتنين. فلمّا نحسبها هتبقى بتساوي واحد وستين درجة.

وبالتالي هيبقى قياس الزاوية ب أ ﺟ يساوي واحد وستين درجة. وهي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.