فيديو: تقدير الزوايا ورسمها

سوزان فائق

يوضح الفيديو مفهوم الزاوية، وتوضيح كيفية تقدير زاوية ما عن طريق مقارنتها بزوايا شهيرة (مثل: القائمة والمستقيمة)، وكيفية رسمها باستخدام المنقلة.

٠٥:٤٢

‏نسخة الفيديو النصية

في الفيديو ده هنتكلّم على تقدير قيمة الزوايا، ورسمها.

الزاوية عندنا دي بتبقى ناتجة عن التقاء طرفَي ضلعين؛ بيكوّن لنا رأس الزاوية. فإحنا عايزين نعرف إزاي نقدّر قيمة قياس الزاوية دي من غير ما نقيسها بالمنقلة، وإزاي نعرف نرسمها. لتقدير قياس زاويةٍ ما نقارنها بزاوية شهيرة نعرف قياسها؛ يعني مثلًا زاوية زيّ تسعين درجة، زاوية مية وتمانين درجة.

عندنا الشكل ده طبق من الورق مدوّر كده. إحنا لو قسمنا الطبق ده نُصّين كده، فده بيمثّل لنا الزاوية المستقيمة اللي هي مية وتمانين درجة. لو جينا قسّمنا الطبق الجزء ده لربعين كده، هتبقى دي تسعين درجة. ده ربع الطبق، وده ربع الطبق. طيّب لو جينا خدنا قسّمنا كمان ربع الطبق ده لحتّتين كده، يبقى دي هتبقى خمسة وأربعين درجة، وخمسة وأربعين درجة.

يبقى إحنا كده الزاوية الشهيرة اللي عندنا ممكن تبقى مية وتمانين درجة، ممكن تبقى خمسة وأربعين درجة، ممكن تبقى تسعين درجة. يبقى إحنا لو لقينا زاوية فيها شبه من الزوايا دي، هنعرف على طول نقدّر قيمة الزاوية دي كام.

لو ادّى لنا زاويتين بالشكل ده، عايزين نقدّر قيمة الزاوية واحد. الزاوية واحد دي واضح إنها بعيدة أوي عن المية وتمانين. طيّب هل هي قريبة للتسعين؟ التسعين المفروض تبقى هنا. طيّب ممكن كمان تبقى قريبة للخمسة وأربعين. يعني معنى كده إن إحنا ممكن نقول قياس الزاوية دي، واحد، يساوي تقريبًا خمسة وأربعين درجة.

طيّب نيجي للزاوية رقم اتنين. الزاوية رقم اتنين بعيدة عن المية وتمانين. ممكن تبقى خمسة وأربعين؟ لأ. ممكن تبقى أقرب حاجة ليها هي التسعين؛ يعني تقريبًا هتساوي تسعين درجة.

لو إحنا عايزين قياس دقيق للزاوية بنستخدم المنقلة. المنقلة دي بتبقى عاملة زيّ الشكل ده. بيبقى فيه تدريج خارجي، التدريج الخارجي بيبدأ من هنا من عند الصفر، وبينتهي عند المية وتمانين. التدريج الداخلي بيبدأ هنا عند الصفر، وبينتهي عند المية وتمانين. وبيبقى فيه في النُّص كده مركز للمنقلة.

مركز المنقلة ده بنحطّه عند نقطة الزاوية هنا؛ رأس الزاوية. وبعدين الخط اللي هو بتاع الزاوية ده، اللي هو الضلع ده، بنحطّه نطابقه بالظبط على الضلع بتاع المنقلة هنا. يعني بنيجي نحطّ المنقلة بالشكل ده.

هنلاقي إن الضلع ده خلاص اتطابق على الضلع بتاع الزاوية الأولانية. هنشوف الضلع التاني بتاع الزاوية فين، هنلاقي إن الضلع التاني بيشاور على حاجة هنا. هنبدأ من عند الصفر، وهنعدّ لغاية ما نشوف القيمة دي كام. هتطلع مثلًا في حدود خمسة وتمانين درجة. يبقى كده معنى كده إن الزاوية هنا بتساوي بالظبط خمسة وتمانين درجة باستخدام المنقلة. نقلب الصفحة، ونشوف إزاي هنرسم الزاوية.

بيقول لنا ارسم الزاوية أربعة وسبعين درجة.

أول حاجة هنعملها إن إحنا هنعمل خط لضلع الزاوية. أول خط عندنا هيبقى بالشكل ده. ده اللي هنركَز عليه بالمنقلة، وهنحطّ الزاوية دي، اللي هو رأس الزاوية هنا، هنحطّه بالظبط على مركز المنقلة. إحنا كده طابقنا الخط بتاع الضلع الأولاني للزاوية بالمنقلة، اللي هو ده. وهنا مركز المنقلة مع رأس الزاوية اللي هنرسمها.

تاني حاجة عايزين نعمل إيه؟ نشوف الضلع التاني للزاوية اللي هو بيُقَف عند الزاوية أربعة وسبعين درجة. يبقى هنيجي عند المنقلة ونشوف فين الأربعة وسبعين درجة، هنلاقيها هنا كده. هنعمل نقطة، النقطة دي هنوصّلها بالخط بتاع رأس الزاوية، اللي هو عند مركز المنقلة. يبقى هيبقى عامل بالشكل ده، ويبقى كده عملنا الضلع التاني للزاوية. يبقى كده الزاوية عندي أربعة وسبعين ده رسمها؛ يبقى الزاوية دي قيمتها أربعة وسبعين درجة. ناخد مثال.

عندنا طيارة ورقية بالشكل ده. عايزين نجيب قيمة الزاوية دي تقديرها كام؛ يعني نقدّرها بكام.

من الشكل واضح إنها مش قريبة للمية وتمانين، ومش قريبة لخمسة وأربعين. يبقى هي شويّة قريبة للتسعين، أقل من التسعين بسنّة، فممكن نقول عليها تقريبًا: تمانين درجة. نقلب الصفحة، وناخد مثال كمان.

جايب لنا تلات أشكال سلم مسنود على حيطة. عايز يقول إن السلم ده علشان يبقى ثابت لازم الزاوية تبقى خمستاشر درجة. فإيه في الأشكال التلاتة أقرب للخمستاشر درجة؟

هنيجي لأول شكل عندنا هنلاقي إن الزاوية دي ممكن تكون قريبة لخمسة وأربعين درجة، وممكن تكون قريبة لستين درجة. لكن صعب إنها تبقى قريبة لخمستاشر درجة؛ لأن الخمستاشر درجة لازم يبقى قريب أوي للحيطة يعني، زيّ مثلًا الشكل ده. الشكل ده شكله كده خمستاشر درجة. الشكل التالت بعيد أوي عن الخمستاشر درجة؛ ده أكبر من الستين، قريب للتسعين. يبقى معنى كده إنه ما ينفعش يبقى الشكل ده.

الشكل الأول ما ينفعش. الشكل التاني هو اللي ينفع. الشكل التالت ما ينفعش.

كده اتكلّمنا في الفيديو ده عن طريقة تقدير قياس الزوايا، وإزاي نعرف نرسمها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.