فيديو: تحديد أنواع الزوايا

يوضح الفيديو أنواع الزوايا: حادة، وقائمة، ومنفرجة، ومفهوم الدوران وزاوية الدوران.

٠٧:٣١

‏نسخة الفيديو النصية

تحديد أنواع الزوايا.

في الفيديو ده، هنعرف إيه هي الزاوية، وإيه هي أنواعها، وإزّاي نعرف نحدّدها. الزاوية هي اتحاد شعاعين؛ شعاع، وكمان شعاع. الشعاعين دول بيتقاطعوا في نقطة. النقطة دي هي نقطة بداية الشعاع الأول، وكمان نقطة بداية الشعاع التاني. فالشعاعين اللي ليهم نفس نقطة البداية بيكوّنوا زاوية. يبقى الشكل اللي قدامنا ده اسمه زاوية.

طيب لو عندنا شعاعين؛ واحد برتقاني، والتاني لونه أزرق. والاتنين ليهم نفس نقطة البداية، بس منطبِقين على بعض. وجينا حرّكنا الشعاع التاني بالشكل ده. هنلاقيه اتحرّك على شكل قوس. لو صغّرنا القوس ده واحدة واحدة، هنلاقيه بالشكل ده. يبقى الزاوية بنحطّ جوّاها القوس الصغيّر ده؛ علشان يعبّر عن الزاوية، ويقول لنا قياسها واسمها. يبقى القوس الصغيّر ده بيمثّل المسافة اللي قطعها الشعاع الأزرق، اللي هي الجزء ده، واللي لمّا صغّرناه نتج عنه الجزء ده.

طيب لو حرّكنا تاني في الشعاع الأزرق، وخلّيناه بالشكل ده. فبكده هيكون الشعاع الأزرق مشي المسافة دي، واللي بنمثّلها بشكل مربع. ولو صغّرنا المربع ده واحدة واحدة، هينتج في الآخر المربع الصغيّر ده. وفي الحالة دي، بيكون الشعاعين متعامدين. يعني بيكوّنوا زاوية قايمة. والزاوية القايمة قياسها تسعين درجة. يبقى أول ما نشوف شعاعين متعامدين بالشكل ده، وما بينهم علامة الزاوية مربع بالشكل ده، نعرف إن دي زاوية قايمة. وقياسها تسعين درجة. ولو جينا نمثّل ده عَ الساعات، وركّزنا في شكل عقارب الساعة، هنلاقي إن العقرب الصغيّر عمودي على العقرب الكبير. يبقى همّ هنا بيكوّنوا زاوية قايمة قياسها تسعين درجة.

طيب لو الساعة كانت تلاتة وخمسة؟ ده معناه إننا صغّرنا الزاوية. الزاوية الصغيّرة دي اسمها زاوية حادّة. يبقى تاني نوع من أنواع الزوايا هي الزاوية الحادّة، واللي بتكون أصغر من الزاوية القائمة. طيب لو مثلًا خلّينا الساعة تلاتة إلا عشرة؟ كده هنكون كبّرنا الزاوية. الزاوية الكبيرة دي اسمها زاوية منفرجة. يبقى الزاوية الأكبر من الزاوية القائمة اسمها زاوية منفرجة.

ومن هنا نقدر نقول: إن فيه تلات أنواع للزوايا؛ أول زاوية هي الزاوية القائمة، ودي اللي قياسها بيساوي تسعين درجة. رقم اتنين: الزاوية الحادّة، اللي هي الزاوية الصغيّرة. ودي أصغر من الزاوية القائمة، يعني أصغر من تسعين درجة، وفي نفس الوقت أكبر من الصفر. يبقى الزاوية الحادّة هي الزاوية المحصورة بين الصفر والتسعين درجة. آخر زاوية خدناها: الزاوية المنفرجة. وهي زاوية أكبر من الزاوية القائمة، يعني أكبر من تسعين درجة.

ويبقى كده بكل سهولة، وبمجرد النظر، أول ما نشوف زاوية نقدر نصنّفها ونقول نوعها، سواء كانت قائمة، أو حادّة، أو منفرجة.

تاني حاجة هنعرفها في الفيديو ده هي الدورات. لو بدأت ملك تعمل الواجب بتاعها الساعة أربعة. وبعد ربع ساعة خلّصت الواجب. فلمّا ربع ساعة عدّت، العقرب الكبير ده هيكون عند التلاتة. يبقى العقرب اتحرّك من هنا لحدّ هنا. الجزء اللي العقرب ده مشيه عبارة عن زاوية قياسها تسعين درجة. والجزء ده يُعتبر ربع دورة. يبقى ربع الدورة بتساوي تسعين درجة.

طيب لو عدّى عليهم كمان ربع ساعة؟ يعني العقرب الكبير هيكون على الستة. وده معناه إنه عدّى كمان ربع دورة. فكده المسافة اللي مشيها العقرب كلها هي نصّ دورة. لمّا ربع الدورة الأولى كانت بتسعين درجة، وربع الدورة التانية هي كمان تسعين درجة، يبقى نصّ الدورة كلها مية وتمانين درجة.

طيب لو عدّى كمان ربع ساعة؟ يعني العقرب الكبير بقى عند التسعة. ومعنى إنه عدّى ربع ساعة يعني عدّى كمان ربع دورة، واللي هي بتساوي تسعين درجة. يبقى تسعين في ربع الدورة دي، زائد تسعين في ربع الدورة دي، وتسعين في ربع الدورة دي، هيساوي ميتين وسبعين. يبقى تلات أرباع دورة تساوي ميتين وسبعين درجة.

طيب لو عدّى كمان ربع ساعة، يعني العقرب رجع عند الاتناشر تاني؟ فبيكون عدّى كمان ربع دورة. يعني كمان تسعين درجة. وده معناه إن العقرب اتحرّك دورة كاملة. والدورة الكاملة بتساوي تلتمية وستين درجة، اللي هي مجموع تسعين، زائد تسعين، زائد تسعين، زائد تسعين.

وبكده نكون عرفنا إن الدورة الكاملة بتساوي تلتمية وستين درجة. والتلات أرباع دورة بتساوي ميتين وسبعين درجة. أمّا النصّ دورة، فبتساوي مية وتمانين درجة. وأخيرًا الربع دورة بتساوي تسعين درجة.

وبكده في الفيديو ده، نكون عرفنا إيه هي الزاوية، وإيه هي أنواعها. نوع الزاوية الحادّة، والقائمة، والمنفرجة. وكمان زاوية الدوران. سواء كانت تسعين درجة؛ ربع دورة. أو مية وتمانين درجة؛ نصّ دورة. أو ميتين وسبعين درجة؛ تلات أرباع دورة. أو تلتمية وستين درجة؛ دورة كاملة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.