فيديو: الأعداد العشرية والكسور والأعداد الكسرية

يوضح الفيديو طريقة المقارنة بين الأعداد العشرية والكسور والأعداد الكسرية.

٠٥:٥٠

‏نسخة الفيديو النصية

الأعداد العشرية والكسور والأعداد الكسرية.

هنتعلّم في الدرس ده، إزّاي نقدر نقارن الأعداد العشرية والكسور والأعداد الكسرية، ونرتّبها. يوضّح الجدول المجاور مقدار الزيادة السنوية بالسنتيمترات في طول كريم خلال أربع سنوات. يا ترى في أيّ سنّ كانت الزيادة في طول وليد هي أكثر زيادة، وأيّها كانت أقلّ.

يعني محتاجين نعرف السن اللي كان فيه أكثر زيادة حصلت في طوله، والسن اللي حصل فيه أقلّ زيادة في الطول. هنلاحظ إن الزيادة في الطول المعطاة عندنا في الجدول مكتوبة بأشكال مختلَطة. يعني مرة مكتوبة على صورة عدد عشري، زيّ هنا. ومرة مكتوبة على شكل عدد كسري، زيّ ده. عشان نقدر نقارن بين الكسور والأعداد العشرية، يا إمَّا نكتبهم كلهم على صورة أعداد عشرية، أو العكس؛ نكتبهم كلهم على صورة كسور، وبعدين نقارن بينهم.

دلوقتي هنفترض إن إحنا عايزين نكتبهم كلهم على شكل أعداد عشرية؛ عشان نقدر نقارن ما بينهم. يبقى أيّ عدد عندنا مكتوب على شكل كسر أو عدد كسري هنحوّله لعدد عشري مكافئ. فعندنا أول عدد مثلًا هو خمسة وواحد على أربعة. خمسة وواحد على أربعة هيبقى العدد العشري المكافئ ليه هو خمسة وخمسة عشرين من مية. العدد التاني هو خمسة وتلاتة على أربعة. هنكتبه على صورة العدد العشري المكافئ، اللي هو خمسة وخمسة وسبعين من مية. كده بقت كل الأعداد اللي عندنا مكتوبة على شكل أعداد عشرية. فنقدر نقارن بينها.

الخطوة اللي إحنا المفروض نقارن فيها، هنمثّل الأعداد العشرية دي كلّها على خطّ الأعداد؛ عشان نتأكّد من المقارنة بينهم. عشان نمثّل مجموعة الأعداد العشرية اللي قدامنا دي، هنرسم خطّ الأعداد، ونحطّ عليه العدد. كلهم إحنا هنلاحظ إن همّ موجودين ما بين الخمسة والستة؛ لأنهم كلهم عبارة عن أعداد عشرية أكبر من الخمسة بس أقلّ من الستة. فهنرسم على خطّ الأعداد. هنمثّل العدد خمسة، والعدد ستة، ونقسّم المسافة بينهم إلى عشرة أجزاء متساوية، بحيث إن قيمة كل جزء تبقى واحد من عشرة. فبالتالي نقدر نمثّل الأعداد اللي عندنا. اللي هي خمسة، وبعدين خمسة وواحد من عشرة، وبعدين خمسة واتنين من عشرة. هنوصل لخمسة ونصّ، أو خمسة وخمسة من عشرة. يبقى كده قدرنا نمثّل أول عددين عشريين عندنا، اللي هو الخمسة، والخمسة وخمسة من عشرة.

طب عندنا خمسة وخمسة وعشرين من مية. خمسة وخمسة وعشرين من مية دي المفروض إنها موجودة ما بين الخمسة واتنين من عشرة، والخمسة وتلاتة من عشرة؛ في منتصف المسافة بينهم. أمَّا العدد خمسة وخمسة وسبعين من مية، العدد العشري ده هنلاقيه موجود ما بين خمسة وسبعة من عشرة وخمسة وتمنية من عشرة؛ في منتصف المسافة بينهم. يبقى هنا نقدر نحطّ العدد العشري خمسة وخمسة وسبعين من مية، اللي هو يكافئه العدد الكسري خمسة وتلاتة على أربعة.

دلوقتي هنرتّب الأعداد دي، أو نقارنها مع بعض. لو جينا نرتّبهم من الأكبر للأصغر، فهنلاقي إن عندنا خمسة وخمسة وسبعين من مية ده أكبر عدد، اللي هو خمسة وتلاتة على أربعة. اللي بعد كده هو خمسة وخمسة من عشرة. اللي بعده هو خمسة وخمسة وعشرين من مية، اللي بيكافئه خمسة وواحد على أربعة. وبعدين خمسة وصفر من عشرة.

بعدين هنرجّع الأعداد دي كلها للصورة اللي كانت معطاة عندنا في الجدول. فهيبقى ترتيبها من الأكبر للأصغر زيّ الترتيب اللي عندنا ده: خمسة وتلاتة على أربعة. اللي بعده هو خمسة وخمسة من عشرة. اللي بعده هو خمسة وواحد على أربعة. واللي بعده هو خمسة وصفر من عشرة؛ يعني خمسة.

يبقى أكبر زيادة حصلت عندنا اللي هي خمسة وتلاتة على أربعة سنتيمتر. دي حصلت عند عُمْر عشر سنوات. دي أكبر زيادة حصلت. أقلّ زيادة حصلت عندنا اللي مقدارها خمسة سنتيمتر. دي حصلت عند عُمْر تسع سنوات. فيبقى السن اللي حصل فيه أكثر زيادة هو سن عشر سنوات. السن اللي حصل فيه أقلّ زيادة هو سن تسع سنوات.

عرفنا في الدرس ده، إزّاي نقدر نقارن الأعداد العشرية والكسور والأعداد الكسرية، ونرتّبها. يا إمَّا بنكتبهم كلهم على شكل أعداد عشرية، يا إمّا كلهم على شكل كسور؛ عشان يسهُل المقارنة ما بينهم. وبعدين نقدر نمثّلهم على خطّ الأعداد، ونستخدمه في المقارنة بين الأعداد اللي عندنا، ونستخدمه كمان في ترتيبها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.