فيديو: الفسيفساء

سوزان فائق

يوضح الفيديو مفهوم الفسيفساء، وإيجاد قيم الزوايا الداخلية للأشكال المكوِّنة لها، وما الأشكال التي يمكن تكوين فسيفساء بها.

٠٤:٢٩

‏نسخة الفيديو النصية

في الفيديو ده هنتكلم على الفسيفساء. إيه هي الفسيفساء؟ الفسيفساء دي عبارة عن أشكال متعددة الأضلاع، اللي هي مضلعات متكرّرة جنب بعض بنفس الشكل. يعني لو عندنا مجموعة مربعات مترتّبة جنب بعض زي كده. دي مربعات متلوّنة متلزّقة جنب بعض كده. فبنقول عليها فسيفساء. المربعات دي كل زواياها قائمة. يعني الزاوية دي قائمة في المربع الأولاني. والزاوية دي قائمة في المربع التاني. والزاوية دي قائمة في المربع التالت. والزاوية دي قائمة في المربع الرابع. مجموع الزوايا دي أربعة في تسعين درجة تساوي تلتمية وستين درجة. يبقى معنى كده إن الجزء ده زواياه تلتمية وستين درجة. يبقى الرؤوس اللي بتلتقي عندها الفُسيفساء بتبقى قيمتها تلتمية وستين درجة.

أرضية اللعبة بتاعة الشطرنج فسيفساء؛ لأنها عبارة عن مربع أسود ومربع أبيض، ومربع أسود ومربع أبيض، لازقين في بعض، جنب بعض. يبقى مجموعة المربعات المتشابهة المتكررة اللي متلزّقة جنب بعض دي بنسميها فسيفساء.

بيفيدنا في إيه موضوع إن الزوايا قيمتها تلتمية وستين درجة؟ إحنا لو عدنا شكل خماسي منتظم. يعني إيه منتظم؟ يعني زواياه كلها متساوية. قيمة كل زاوية فيهم مية وتمنية درجة. والأضلاع بتاعته متساوية. هل نقدر نحطهم في شكل فسيفساء؟ طيب نجرب.

الشكل الخماسي الأولاني ده زاويته مية وتمنية درجة. والأضلاع بتاعته متساوية، كل زواياه مية وتمنية درجة. هنحطه جنب الشكل الخماسي ده. كمان زاويته مية وتمنية درجة. هنحطه جنب كمان واحد خماسي. ده قياس زاويته كمان مية وتمنية درجة. هنلاقي فيه جزء باقي عندنا ده ما عرفناش نحط فيه شكل خماسي؛ لأن الزاوية لازم تكون مية وتمنية. طيب ده ليه؟ لأن إحنا عارفين إن مجموع الزوايا الملتقية بتاعة الفسيفساء دي، قيمتها تلتمية وستين درجة. وإحنا عندنا كل زاوية في الشكل الخماسي المنتظم بمية وتمنية درجة.

يبقى معنى كده إن أنا لازم أكون أعرف أقسّم التلتمية وستين على المية وتمنية؛ عشان أعرف عدد الأشكال الخماسية اللي هستخدمها. طيب تلتمية وستين على مية وتمنية هي عبارة عن تلاتة وتلاتة من عشرة. يعني ما ينفعش إن أنا آخد تلات أشكال خماسية، وحته، وتلاتة من عشرة؛ يعني حته من الشكل التالت. فبالتالي الأشكال الخماسية المنتظمة لا تمثّل فسيفساء.

لو أخدنا مثال كمان في المثلثات. هل ينفع المثلثات تتحط على شكل فسيفساء؟ المثلث مجموع زواياه مية وتمانين درجة. لو مثلث منتظم هتبقى الزاوية قيمتها مية وتمانين على التلاتة. يعني هتساوي ستين درجة. يبقى معنى كده إنه لو الستين … التلتمية وستين قبلت القسمة على الستين، يبقى أقدر أحط مثلثات جنب بعض وتمثّل شكل الفسيفساء. يعني لو عندي كام مثلث أقدر أحطهم على شكل فسيفساء. يبقى هنقسم تلتمية وستين على ستين، هتساوي ست مثلثات، أقدر أحطهم جنب بعض عشان أعمل شكل فسيفساء.

يبقى في الفيديو اتكلمنا عن الفسيفساء، اللي هي عبارة عن أشكال متعددة الأضلاع منتظمة متلزّقة جنب بعض أو متكررة جنب بعض متطابقة ومحطوطة جنب بعض. والزوايا الداخلية بتاعة رأس الفسيفساء دي بتبقى قيمتها تلتمية وستين درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.