فيديو: إيجاد مساحة شكل مركب يتضمن مستطيلين بمعلومية أبعادهما

احسب مساحة الجزء المظلَّل في الشكل، إذا كان بُعدا المستطيل الداخلي ٦ سم، ٨ سم.

٠٢:٢٤

‏نسخة الفيديو النصية

احسب مساحة الجزء المظلَّل في الشكل، إذا كان بعدا المستطيل الداخلي ستة سنتيمتر، وتمنية سنتيمتر.

لو بصِّينا عَ الشكل اللي قدامنا، هنلاقي الجزء المظلَّل هو الجزء الملوَّن باللون الرمادي. هو ده اللي مطلوب مننا نوجد مساحته. طب يا ترى إزاي نقدر نوجد مساحة الجزء المظلَّل وهو ما بيعبّرش عن شكل منتظِم، نقدر نحسب مساحته مباشرةً.

هنبدأ أول خطوة إننا نوجد مساحة المستطيل الملوَّن باللون الرمادي اللي قدامنا ده. بصورة عامة، إحنا عارفين إننا بنوجد مساحة المستطيل كحاصل ضرب الطول في العرض. فدلوقتي نقدر نوجد مساحة المستطيل الخارجي الملوَّن باللون الرمادي، بإننا نوجد حاصل ضرب الطول اللي هو أربعة وعشرين، في العرض اللي هو عشرة. فمساحة المستطيل ده هتبقى حاصل ضرب أربعة وعشرين في عشرة، اللي هو هيبقى ميتين وأربعين. وناخد بالنا إن بما إن وحدة الأطوال كانت السنتيمتر، فوحدة المساحة هتبقى سنتيمتر مربع.

طب لو فرَّغنا مستطيل صغيَّر بالشكل اللي قدامنا ده بداخل المستطيل الرمادي الكبير، بأبعاد تمنية سنتيمتر وستة سنتيمتر. كده هيبقى باقي عندنا في المستطيل الرمادي الخارجي جزء مطلوب مننا نوجد مساحته. طب يا ترى هنقدر نوجد مساحته إزاي. لو طرحنا مساحة الجزء اللي فرَّغناه، اللي هو على شكل مستطيل ده، من مساحة المستطيل الرمادي الكبير، هيدِّينا المساحة المتبقِّية المظلّلة باللون الرمادي.

يبقى دلوقتي هنوجد مساحة المستطيل الداخلي اللي فرَّغناه. اللي هي هتبقى بتساوي حاصل ضرب الطول بتاعه، اللي هو تمنية سنتيمتر، في العرض اللي هو ستة سنتيمتر. فهتطلع مساحته بتساوي تمنية وأربعين سنتيمتر مربع.

يبقى دلوقتي نطرح مساحة المستطيل الصغيّر اللي فرَّغناه من مساحة المستطيل الرمادي الكبير؛ عشان نعرف مساحة الجزء المظلَّل اللي باقي في الشكل. هتبقى بتساوي ميتين وأربعين سنتيمتر مربع ناقص تمنية وأربعين سنتيمتر مربع. هتطلع بتساوي مية اتنين وتسعين سنتيمتر مربع.

وكده يبقى قدرنا نحسب مساحة الجزء المظلَّل في الشكل، زيّ ما كان مطلوب مننا في السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.