فيديو: التمثيل بالأعمدة

يوضح الفيديو كيفية تمثيل البيانات الممثَّلة بالجداول باستخدام الأعمدة، وأمثلة عليها.

٠٣:٣٢

‏نسخة الفيديو النصية

التمثيل بالأعمدة.

في الفيديو ده هنتعلّم إزَّاي نمثّل البيانات بالأعمدة. البيانات هي مجموعة من المعلومات، اللي بنحتاجها عشان نقيس حاجة معيّنة. وفيه طرق كتيرة لعرضها، عشان نسهّل على نفسنا قراءتها والتعامل معاها. ومن الطرق دي التمثيل بالأعمدة. التمثيل بالأعمدة هو عرض للبيانات بالرسم. بحيث إننا نقدر نعرف البيانات المختلفة، بمجرد النظر.

هنوضّح طريقة التمثيل بالأعمدة، بالمثال ده. سألت رضوى صديقاتها عن وجبتهم المفضّلة في الإفطار. وكتبت البيانات اللي جمعتها منهم، في جدول العلامات الإحصائية اللي هيظهر قدامنا. دلوقتي هي عايزة تعبّر عن البيانات دي، باستخدام الأعمدة. فهتعمل ده إزَّاي؟ أول حاجة هترسم الشكل ده. هنلاحظ إن على الشمال، مكتوب أعداد. وتحت، مكتوب الوجبات. كل مربع من المربعات اللي في الشكل، يعبّر عن ولد اختار الوجبة اللي تحته.

نرجع للجدول. هنلاقي عدد العلامات اللي جنب السندوتشات، أربعة. يبقى هنلوّن أربع مربعات، فوق كلمة السندوتشات في الشكل. وعدد العلامات جنب الفاكهة، اتنين. يبقى هنلوّن مربعين، فوق كلمة الفاكهة في الشكل. وعدد العلامات جنب البيتزا، مكتوب بالشكل ده. نفتكر إن الشكل ده، معناه خمس علامات. يبقى هنلوّن خمس مربعات، فوق كلمة البيتزا في الشكل. وعدد العلامات جنب الكيك، تلاتة. يبقى هنلوّن تلات مربعات، فوق كلمة الكيك في الشكل. وبكده نبقى مثّلنا البيانات دي.

نتنقل لصفحة تانية. ممكن نمثّل البيانات بالشكل ده، والأعمدة تبقى رأسية، زيّ ما إحنا شايفين. أو بالشكل ده، والأعمدة تبقى أفقية. نتنقل لصفحة تانية.

عدّ مدرس في أحد الفصول الدراسية، عدد الطلاب اللي بيكتبوا باليد اليمنى، والطلاب اللي بيكتبوا باليد اليسرى. وجمع البيانات، ونظّمها في الجدول ده. والمطلوب، واحد: إكمال الجدول. نبصّ في الجدول. هنعدّ العلامات اللي جنب اليد اليمنى، هنلاقيها سبعة، فهنكتب سبعة جنبها. وهنعدّ العلامات اللي جنب اليسرى، هنلاقيهم تلاتة، فهنكتب تلاتة جنبها. وبكده نبقى كمّلنا الجدول.

المطلوب التاني: تمثيل البيانات بالأعمدة. أول حاجة نرسم الشكل ده. ونشوف العدد اللي جنب اليد اليمنى، هنلاقيه سبعة. فهنلوّن سبع مربعات على يمين اليد اليمنى، بالشكل ده. ونشوف العدد اللي جنب اليد اليسرى، هنلاقيه تلاتة. فهنلوّن تلات مربعات على يمين اليد اليسرى، بالشكل ده.

وبكده نبقى خلّصنا الفيديو ده، اللي شرحنا فيه إزَّاي نمثّل البيانات بالأعمدة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.