فيديو: حساب المعامل الحراري للمقاومة لمادة ما

أوجد التغير اللازم في درجة الحرارة لتقل قيمة مقاومة مصنوعة من الكربون بنسبة %25. استخدم القيمة ‎−0.0005°c^−1 للتعبير عن المعامل الحراري لمقاومة الكربون.

٠٢:٣٠

‏نسخة الفيديو النصية

أوجد التغير اللازم في درجة الحرارة لتقل قيمة مقاومة مصنوعة من الكربون بنسبة خمسة وعشرين في المية. استخدم القيمة سالب خمسة من العشرة آلاف درجة مئوية أُس سالب واحد للتعبير عن المعامل الحراري لمقاومة الكربون.

ففيه عندنا مقاومة مصنوعة من الكربون. والمعامل الحراري للكربون سالب خمسة من العشرة آلاف درجة مئوية أُس سالب واحد. فلو كانت المقاومة دي عند درجة حرارة 𝑇 واحد، هنلاقي إن إحنا لو غيَّرنا درجة الحرارة قيمة المقاومة دي هتتغير. والمطلوب منّنا نعرف التغير اللازم في درجة الحرارة اللي هو عبارة عن فرق ما بين درجتين الحرارة 𝑇 اتنين ناقص 𝑇 واحد، اللي هيخلّي قيمة المقاومة تقلّ بنسبة خمسة وعشرين في المية. وده معناه إن المقاومة عند درجة الحرارة 𝑇 اتنين، هتكون أقل من المقاومة عند درجة الحرارة 𝑇 واحد بنسبة خمسة وعشرين في المية من قيمة المقاومة عند درجة الحرارة 𝑇 واحد.

وهنعبر عن ده رياضيًّا بإننا نقول إن قيمة المقاومة عند درجة الحرارة 𝑇 اتنين بتساوي قيمة المقاومة عند درجة الحرارة 𝑇 واحد، ناقص خمسة وعشرين من المية في قيمة المقاومة عند درجة الحرارة 𝑇 واحد. وده بيساوي خمسة وسبعين من المية في قيمة المقاومة عند درجة الحرارة 𝑇 واحد. والتغير اللي حصل في قيمة المقاومة ده نقدر نجيبه عن طريق المعادلة اللي بتقول إن المقاومة عند درجة الحرارة 𝑇 اتنين، ناقص المقاومة عند درجة الحرارة 𝑇 واحد، بتساوي المعامل الحراري للمقاومة، مضروبة في قيمة المقاومة عند درجة الحرارة 𝑇 واحد، في فرق درجات الحرارة 𝑇 اتنين ناقص 𝑇 واحد.

وعلشان نعرف نجيب فرق درجات الحرارة هنقسم طرفين المعادلة على المعامل الحراري في قيمة المقاومة عند درجة الحرارة 𝑇 واحد. فده هيدّينا إن الفرق في درجات الحرارة بيساوي قيمة المقاومة عند درجة الحرارة 𝑇 اتنين، ناقص قيمة المقاومة عند درجة الحرارة 𝑇 واحد، مقسومين على المعامل الحراري في قيمة المقاومة عند درجة الحرارة 𝑇 واحد. ونقدر نعوّض بقيمة المقاومة عند 𝑇 اتنين في المعادلة هنا. وده هيخلّي المعادلة بالشكل ده. ونقدر ناخد قيمة المقاومة عند 𝑇 واحد عامل مشترك، فهنلاقي إن إحنا كده ممكن نختصر قيمة المقاومة عند 𝑇 واحد من المعادلة. وده هيخلّي البسط سالب خمسة وعشرين من المية.

ولما نعوّض بقيمة المعامل الحراري اللي هو بسالب خمسة من العشرة آلاف درجة مئوية أُس سالب واحد. هنلاقي إن إحنا ممكن نختصر السالب مع السالب، ونطلّع إن الفرق في درجات الحرارة بيساوي خمسمية درجة مئوية. وده معناه إن درجة الحرارة 𝑇 اتنين أكبر من درجة الحرارة 𝑇 واحد بِخمسمية درجة مئوية. ورغم إن درجة الحرارة زادت قيمة المقاومة قلَّت. وده بسبب إن المعامل الحراري كان بالسالب. وهو ده اللي بيخلي المقاومة تقل لما درجة الحرارة تزيد.

وبكده نبقى عرفنا إزَّاي نجيب الفرق في درجات الحرارة علشان نغير قيمة مقاومة بنسبة معينة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.