فيديو: تفسير عملية القسمة كعملية طرح متكرر لكسرعلى كسر آخر مقامه مختلف وحسابها

تريد دينا تحضير فطائر باستخدام نصف لتر لبن. إذا عُلم أن ثُمُن لتر من اللبن يكفي لتحضير الفطائر لشخص واحد، فكم شخصًا تكفيه الفطائر التي ستحضرها دينا؟

٠٢:٤٨

‏نسخة الفيديو النصية

تريد دينا تحضير فطائر باستخدام نصف لتر لبن. إذا عُلِم أن ثُمن لتر اللبن يكفي لتحضير الفطائر لشخص واحد. فكم شخصًا تكفيه الفطائر التي ستحضرها دينا؟

دلوقتي هنحاول نلخص مجموعة البيانات المُعطاة عندنا في السؤال ونشوف إيه المطلوب. معطى عندنا إن دينا معاها نِصف لتر من اللبن. وإنها بتستخدم تُمن لتر من اللبن لصناعة مجموعة من الفطائر تكفي لإفطار فرد واحد. طيب يبقى نُص لتر اللبن ده هيكفي لصناعة عدد من الفطائر تكفي كام شخص؟

عايزين نبدأ نشوف النص لتر من اللبن ده فيه كام تُمن. عشان نقدر نعرف هو فيه كام تُمن، عايزين نعيد كتابة النص ده على إنه هو كسر المقام بتاعة تمنية. طب الاتنين اللي عندنا دي عايزين تبقى تمنية. يعني نعمل لها عملية ضرب في أربعة. يبقى بنفس الطريقة لازم نضرب البسط هو كمان في أربعة؛ عشان الكسر اللي عندنا قيمته ما تتغيرش. فكده هيصبح الكسر أربعة على تمنية. يبقى النُّص هو أربع أثمان.

يعني لو افترضنا إن مستوى اللبن في الوعاء اللي عندنا ده كان في البداية واصل عند مستوى النصف لتر، اللي همّ بيكافئوا أربعة على تمنية، أو أربع أثمان. لو استخدمنا تُمن لتر من اللبن اللي موجود في الوعاء ده لتحضير الفطائر لشخص واحد، فهينزل مستوى اللبن في الإناء اللي عندنا بمقدار التُّمن فهيصبح العلامة المناظرة لارتفاع اللبن في الإناء هي ثلاثة أثمان؛ يعني تلاتة على تمنية.

هنستخدم تُمن لتر آخر من اللبن لتحضير الفطائر لشخص آخر. فكده يبقى حضرنا فطائر تكفي لشخصين، واستخدمنا اتنين على تمنية لتر من اللبن. وبكده هينزل مستوى اللبن اللي عندنا في الإناء إلى اتنين على تمنية لتر. وبعدين مرة أخرى نستخدم تُمن لتر من اللبن لتحضير الفطائر لشخص تالت، وكده هينزل مستوى اللبن في الإناء اللي عندنا إلى تُمن أو واحد على تمنية من اللتر، واللي يكفونا لتحضير الفطائر لشخص رابع كمان.

يبقى كده قدرنا نعرف إن نصف لتر من اللبن يكفينا لتحضير الفطائر لأربع أشخاص؛ وده لأن نص لتر اللبن بيكافئ أربع أثمان. فلو إفطار كل فرد استخدمنا فيه تمن واحد من الأثمان دي، معناها إننا نقدر نصنع الإفطار لأربع أفراد. كل فرد منهم إفطاره هيستهلك تمن لتر من الأربع أثمان اللي عندنا. فبالتالي الأربع أثمان دول هيكفوا أربع أشخاص.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.