فيديو: استخدام ترتيب العمليات لإيجاد قيم التعبيرات العددية التي تتضمَّن أسسًا

احسب قيمة (٠٫٢)^٢ × ٤(١٣ + ٧)^٢ − ٥^٢.

٠١:٣٨

‏نسخة الفيديو النصية

احسب قيمة اتنين من عشرة تربيع، في أربعة، في بين قوسين تلتاشر زائد سبعة تربيع، ناقص خمسة تربيع.

علشان نحل هذه المسألة، لازم في الأول نعرف ترتيب أولويات إجراء العمليات الحسابية. الأولوية الأولى بتبقى أولًا لما بين الأقواس. الأولوية التانية للأُسُس. الأولوية التالتة الضرب والقسمة. وآخر حاجة في الأولويات هي الجمع والطرح.

نبتدي نطبّق الأولويات على المثال اللي موجود عندنا. أول أولوية هي لما بين الأقواس. هنعمل العملية اللي ما بين الأقواس أولًا. يبقى هنعمل أول عملية هنعملها هي تلتاشر زائد سبعة وده بيساوي عشرين. وهيبقى المسألة عندنا اتنين من عشرة تربيع، في أربعة، في عشرين تربيع، ناقص خمسة تربيع.

تاني أولوية هتبقى للأُسُس. اتنين من عشرة تربيع هتساوي أربعة من مية، في أربعة، في عشرين تربيع يساوي ربعمية، ناقص خمسة تربيع خمسة وعشرين.

بعد كده هتبقى الأولوية التالتة للضرب والقسمة. هنعمل عملية الضرب؛ يعني هنضرب أربعة من مية في أربعة في ربعمية. وده هيساوي أربعة وستين. هيبقى أربعة وستين ناقص خمسة وعشرين بتساوي تسعة وتلاتين.

وبكده هتكون قيمة اتنين من عشرة تربيع، في أربعة، في بين قوسين تلتاشر زائد سبعة تربيع، ناقص خمسة تربيع؛ بتساوي تسعة وتلاتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.