تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد ميل دالة خطية بمعلومية شكلها البياني

أحمد مدحت

ما ميل الدالة المُمثَّلة بالشكل التالي؟

٠١:٤٥

‏نسخة الفيديو النصية

عندنا في المثال شكل وعايزين نعرف ميل الدالة الممثّلة بالشكل ده.

بالنسبة لميل الدالة هو ميل المستقيم اللي بيمثل الدالة، والمستقيم اللي بيمثل الدالة عندنا في الشكل مستقيم غير رأسي، وميل المستقيم غير الرأسي هو نسبة التغير الرأسي إلى التغير الأفقي، وبالنسبة لصيغة ميل المستقيم غير الرأسي المار بالنقطتين س واحد وَ ص واحد وَ س اتنين وَ ص اتنين هي: م يساوي ص اتنين ناقص ص واحد، على س اتنين ناقص س واحد، بحيث إن م دي هتمثل ميل المستقيم.

فبالتالي عشان نوجد ميل المستقيم اللي موجود عندنا في الشكل، هنحدد الأول أي نقطتين عليه، فهنحدد مثلًا النقطة دي، والنقطة دي الإحداثي السيني بتاعها هو صفر، والإحداثي الصادي بتاعها هو عشرة؛ يعني النقطة دي هي صفر وعشرة.

أما النقطة التانية فهنحدد النقطة دي، والنقطة دي الإحداثي السيني بتاعها هو خمسة، والإحداثي الصادي بتاعها هو صفر؛ يعني النقطة دي هي النقطة خمسة وصفر.

فلو فرضنا إن النقطة س واحد وَ ص واحد هي النقطة صفر وعشرة، والنقطة س اتنين وَ ص اتنين هي النقطة خمسة وصفر؛ فلمّا هنعوّض في صيغة ميل المستقيم، هنلاقي م تساوي صفر ناقص عشرة على خمسة ناقص صفر؛ يعني م تساوي سالب عشرة على خمسة، يعني م تساوي سالب اتنين.

بكده يبقى إحنا أوجدنا ميل المستقيم اللي بيمثّل الدالة؛ يعني هيبقى ميل الدالة الممثّلة في الشكل هو سالب اتنين.