فيديو: مركَّبات متجه

يوضّح الشكل الآتي متّجهًا. ما إحداثيات نقطة نهاية المتجه؟ ما إحداثيات نقطة بداية المتجه؟ ما مركّبتا المتجه؟

٠٢:٣٩

‏نسخة الفيديو النصية

يوضّح الشكل الآتي متّجهًا. فيه تلات أسئلة؛ أول سؤال: ما إحداثيات نقطة نهاية المتجه؟

المتجه له نقطة بداية ونقطة نهاية. نقطة نهاية المتجه هي اللي بتبقى عند رأس السهم كده. وإحداثياتها بتبقى قيم على الـ س وقيم على الـ ص. الإحداثي السيني بنعرفها إن إحنا ننزل رأسي كده. هنلاقي هنا فيه تلاتة. ونتحرّك أفقي لغاية ما نقابل محور الصادات؛ عشان نحدّد قيم الصادات. وبنكتبها على هيئة زوج مرتّب. قيم السينات الأول هتبقى التلاتة، وبعدين الصادات واحد. يبقى إحداثيات نقطة نهاية المتجه هي تلاتة وواحد.

السؤال التاني: ما إحداثيات نقطة بداية المتجه؟

هنقف عند نقطة البداية. ننزل رأسي لغاية ما نقابل محور السينات عند سالب اتنين، وأفقي عشان نقابل محور الصادات، هتبقى عند سالب اتنين. يبقى إحداثيات النقطة سالب اتنين وسالب اتنين. يبقى نقطة بداية المتجه هي سالب اتنين وسالب اتنين.

السؤال التالت: ما مركّبتا المتجه؟

أيّ متجه بيبقى مركّبتاه الـ س والـ ص عبارة عن الزوج المرتّب س وَ ص. حيث الـ س هي إحداثي السينات لنقطة النهاية ناقص نقطة البداية. والـ ص هي إحداثي الصادات لنقطة النهاية ناقص نقطة البداية. يبقى المتجه ي هيساوي … نقطة النهاية إحداثي السيني لها هو التلاتة، ونقطة البداية الإحداثي السيني لها هو سالب اتنين. يبقى تلاتة ناقص سالب اتنين. والـ ص اللي هي إحداثي الصادات لنقطة النهاية واحد ناقص … نقطة البداية إحداثي الصادات بتاعها سالب اتنين. يبقى هو ده مركّبتا المتجه ي.

يبقى هيساوي … تلاتة ناقص سالب اتنين يبقى خمسة، والواحد ناقص سالب اتنين يبقى تلاتة. هو ده مركّبتا المتجه ي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.