فيديو: استخدام الاحتمال النظري لحل المسائل الكلامية

يوضح الجدول التالي نتيجة دراسة أُجريت لمعرفة الألعاب المفضَّلة لدى ٨٠ طالبًا. ما عدد الطلاب الذين يفضلون كرة القدم من بين ٧٠٠ طالب؟

٠٢:٢٢

‏نسخة الفيديو النصية

يوضح الجدول التالي نتيجة دراسة أُجريت لمعرفة الألعاب المفضَّلة لدى تمانين طالبًا. ما عدد الطلاب الذين يفضلون كرة القدم من بين سبعمية طالب؟

وعندنا جدول بيوضح اللعبة وعدد الطلاب المناظر؛ كرة القدم عدد الطلاب اتنين وتلاتين، كرة السلة عدد الطلاب أربعة وعشرين، كرة المضرب عدد الطلاب تمنية، السباحة عدد الطلاب ستاشر.

عشان نقدر نعرف إجمالي عدد الطلاب اللي أجريت عليهم الدراسة، هنجمّع عدد الطلاب المناظر لكل لعبة من اللعبات المفضلة، فيبقى عدد الطلاب يساوي اتنين وتلاتين، زائد أربعة وعشرين، زائد تمنية، زائد ستاشر؛ هيبقى كده عدد الطلاب اللي أُجريت عليهم الدراسة تمانين طالب. طب إحنا عندنا عدد الطلاب اللي بيفضّلوا كرة القدم واللي أجريت عليهم الدراسة كانوا اتنين وتلاتين؛ يبقى هنا نقدر نحط في النسبة بتاعتنا اتنين وتلاتين، كان العدد الكلي للطلاب اللي أجريت عليهم الدراسة تمانين، ومطلوب نعرف بقى عدد الطلاب اللي بيفضلوا كرة القدم لو كان إجمالي عدد الطلاب اللي عندنا سبعمية. بنقدر نكتب النسبة على شكل كسر، فنقدر دلوقتي نقول إن اتنين وتلاتين على تمانين، دي معناها اتنين وتلاتين إلى تمانين، لازم تبقى بتساوي عدد الطلاب اللي بيفضّلوا كرة القدم لما كان إجمالي عدد الطلاب أو عددهم الكلي سبعمية. بإجراء الضرب التبادلي نقدر نوجد عدد الطلاب الذين يفضلون كرة القدم، خلينا نرمز لعدد الطلاب اللي بيفضّلوا كرة القدم بالرمز أ، يبقى دلوقتي باجراء الضرب التبادُلي هيبقى أ في تمانين، هيساوي اتنين وتلاتين في سبعمية، بقسمة الطرفين على تمانين، هيبقى أ بيساوي اتنين وتلاتين في سبعمية على تمانين. أ هتبقى بتساوي ميتين وتمانين؛ يعني نقدر نقول دلوقتي إن عدد الطلاب اللي هيبقوا بيفضّلوا كرة القدم من بين سبعمية طالب، هيبقوا ميتين وتمانين طالب، وهي دي الإجابة المطلوبة مننا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.