فيديو: إيجاد عدد العناصر في نمط مُعطًى بعد إكماله

ما عدد المجسَّمات التي تتكوَّن إذا ازداد النمط ليكون به ٥ أشكال خماسية؟

٠٢:٥٣

‏نسخة الفيديو النصية

ما عدد المجسّمات التي تتكوَّن إذا ازداد النمط ليكون به خمس أشكال خماسية؟

ومدّيلنا الرسمة اللي قدامنا دي في السؤال. السؤال بيسألنا عن عدد المجسّمات، اللي هي الأشكال الهندسية اللي قدامنا، اللي هتتكوّن لو زوّدنا النمط. يعني لو زوّدنا التسلسل اللي ماشي بيه الرسمة اللي قدامنا، علشان يكون فيه خمس أشكال خماسية.

في البداية، تعالوا نشوف إيه هو تسلسُل المجسّمات اللي إحنا ماشيين بيه في الرسمة هنا. أول حاجة هتقابلنا هنا شكل خماسي، مربع صغيّر، مربع كبير، مربع صغيّر. وبعدين هنلاحظ إن من أول هنا تسلسُل المجسّمات اللي عدَّى ده هيتكرّر تاني. شكل خماسي، مربع صغيّر، مربع كبير، مربع صغيّر.

أول مجموعة مجسّمات قابلتنا هنسمّيها المجموعة رقم واحد. وأول تكرار ليها هنسمّيه المجموعة رقم اتنين. هنلاحظ إن كل مجموعة فيها شكل خماسي واحد. أول شكل خماسي هيقابلنا في المجموعة رقم واحد. والشكل الخماسي التاني هيقابلنا في المجموعة رقم اتنين.

السؤال هنا بيسألنا: لو زوّدنا النمط لغاية ما يكون فيه خمس أشكال خماسية، هيكون عدد المجسّمات قدّ إيه؟ أول خطوة هنعملها علشان نزوّد النمط، هنزوّد مجموعة، وهنسمّيها المجموعة رقم تلاتة. واللي هيكون جوّاها شكل خماسي، مربع صغيّر، مربع كبير، مربع صغيّر. الشكل الخماسي اللي هنا ده هو الشكل رقم تلاتة. وعلشان يكون عندنا في النمط خمس أشكال خماسية، لازم نزوّد المجموعات لخمس مجموعات. كده إحنا ضِفنا المجموعة رقم أربعة، واللي فيها الشكل الخماسي رقم أربعة. والمجموعة رقم خمسة هيكون فيها الشكل الخماسي رقم خمسة. وبكده يبقى النمط اللي قدامنا ده فيه خمس أشكال خماسية.

هنلاحظ إن في كل مجموعة فيه أربع مجسّمات: واحد، اتنين، تلاتة، أربعة. وبكده يبقى عدد المجسّمات هيساوي عدد المجموعات في عدد المجسّمات في المجموعة الواحدة. هنعوّض؛ يبقى عدد المجموعات خمس مجموعات في عدد المجسّمات في المجموعة الواحدة، اللي همّ أربع مجسّمات. وبكده يبقى عدد المجسّمات الكلّي بيساوي الخمسة في أربعة. هيدّي لنا عشرين مجسّم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.