فيديو: التعبير العددي وحساب قيمته

يوضح الفيديو ما التعبير العددي، وترتيب إجراء العمليات الحسابية به، وأمثلةً عليه.

٠٦:٠٧

‏نسخة الفيديو النصية

في الفيديو ده هنتكلّم عن التعبير العددي. بس خلّينا نعرّف يعني إيه تعبير عددي الأول. التعبير العددي هو تعبير يحتوي على أعداد فقط، وعملية حسابية واحدة على الأقل. يبقى هو بيحتوي على أعداد فقط، وعملية حسابية على الأقل. العملية الحسابية ممكن تكون جمع، ممكن تكون طرح، ممكن تكون قسمة، ممكن تكون ضرب. ومش شرط تكون واحدة، ممكن تكون أكتر من واحدة.

ولو أنت عايز توجد قيمة التعبير العددي ده، خلّينا نقرا الفقرة اللي جايّة. ولإيجاد قيمته، يجب ترتيب إجراء العمليات الحسابية. يعني لو عندنا أكتر من عملية حسابية؛ عندنا ضرب وقسمة وطرح، كل ده في التعبير العددي الواحد. فلازم نعمل ترتيب معيّن؛ عشان القيمة بتاعته تكون مظبوطة، ونطلّعها صح. طب ممكن نعرف إيه هو الترتيب ده بتاع إجراء العمليات الحسابية؟

خلّينا نشوف معانا الترتيب كده. الترتيب اللي عندي بيكون كالتالي … أول حاجة بنعملها، لازم نشوف ما بداخل الأقواس. لو في أقواس عندي، لازم أول حاجة أدوّر هي جوّاها إيه. بعد كده أبدأ أشوف العمليات الأخرى. يبقى أول حاجة بندخل عليها هي الأقواس، ونشوف جوّاها إيه.

تاني حاجة بشوف الضرب والقسمة. لو لقيت أيّ عملية حسابية، ضرب أو قسمة، لازم أعملها الأول. طب لو لقيت اتنين؟ بنبدأ من اليمين للشمال؛ اليمين لليسار، زيّ ما مكتوب قدامنا كده. لو لقينا الضرب هو اللي عَ اليمين، يبقى نعمله الأول. بعد كده نروح نعمل القسمة.

تالت حاجة بعد كده بنعملها، وآخر حاجة، هي الجمع والطرح. وبرضو بيتمّ مِ اليمين للشمال. نشوف مين اللي عَ اليمين، ونعمله الأول. سواء كان جمع أو طرح. طبعًا عشان نفهم مع بعض الكلام ده، لازم نبدأ نطبّق عليه. وده اللي هنشوفه في الأمثلة اللي جاية.

المثال اللي عندي بيقول: احسب القيمة العددية، للتعبيرات العددية الآتية. خلّينا نشوف هنقدر نحلّ أول مثال إزّاي. ستاشر ناقص تمنية على اتنين أُس اتنين زائد أربعتاشر. قبل ما نبدأ في إجراء العمليات الحسابية بتاعتنا وترتيبها. لازم نشوف هل كل الأرقام عندي مظبوطة، وكلها موجودة. ولّا محتاجة يحصل عليها عملية تانية، غير العمليات بتاعتي اللي أنا برتّبها.

تعالوا نشوف. هنلاقي إن الستاشر موجودة. وهنلاقي إن التمنية موجودة. بس فيه هنا اتنين أُس اتنين. ما أنا لازم أعرف الرقم ده بكام، قبل ما أعمل العمليات الحسابية بتاعتي. يبقى لازم نشوف الأرقام كلها متواجدة، ولّا لأ. فلو جينا نكتب كده، هنكتب إن ده يساوي ستاشر ناقص تمنية، على … اتنين أُس اتنين اللي هي اتنين في اتنين؛ يعني أربعة. زائد أربعتاشر.

طالما الأرقام كلها أصبحت عندي، أنا دلوقتي ممكن أدوّر بقى على العمليات الحسابية وترتيبها. أول حاجة هنبصّ هنلاقي إن ما فيش عندنا أقواس. فبالتالي ندخل في الخطوة رقم اتنين، اللي هي الضرب والقسمة. مش هنلاقي عندنا غير عملية قسمة واحدة بس. وهي بين التمنية وبين الأربعة، زيّ ما إحنا شايفين قدامنا. بين التمنية وبين الأربعة كده. يبقى هي دي العملية اللي هيتمّ إجراءها الأول.

فنكتب يساوي ستاشر؛ مش هيحصل عليها حاجة. ناقص … تمنية على الأربعة، باتنين. زائد أربعتاشر. ويبقى إحنا هنا عملنا عملية القسمة اللي كانت موجودة. نبدأ ندخل في الخطوة اللي بعد كده، ونشوف إحنا عندنا إيه. هنلاقي إن عندنا جمع وطرح. فنبدأ نعمله من اليمين للشمال. يبقى يساوي … ستاشر، زيّ ما إحنا شايفين، ناقص اتنين، تبقى أربعتاشر، زائد أربعتاشر يساوي تمنية وعشرين.

وبكده يبقى إحنا قدرنا نجيب قيمة التعبير العددي اللي قدامنا. لو جينا نكتب قدام كل خطوة العملية الحسابية اللي تمّت، فهنلاقي إن هنا كنا هنعمل قسمة. ودي اللي اخترناها إنها تحصل الأول. بعد القسمة لقينا إن إحنا هنعمل عملية طرح. بعد ما عملنا عملية الطرح، عملنا عملية جمع. وهي دي العمليات الحسابية اللي تمّت قدامنا؛ عشان نجيب قيمة التعبير العددي اللي قدامنا. وطلع في الآخر يساوي تمنية وعشرين.

خلينا نشوف المثال اللي بعد كده. مثال رقم اتنين: أربعة على الاتنين زائد خمسة في، قوس عشرة ناقص ستة. لمّا نيجي نشوف، هنلاقي إن هنا فيه أقواس. ودي كانت أول عملية بِتْتمّ. فنبدأ نشوف إيه القيمة بتاعة القوس ده. فبنكتب كده: أربعة على اتنين زائد خمسة. كل ده نزل زيّ ما هو، ما فيش فيه أيّ مشاكل. عشرة ناقص ستة، بأربعة. يبقى إحنا كتبنا القيمة بتاعتها، اللي هي بأربعة.

وكده يبقى إحنا عملنا الأقواس اللي عندنا. نبدأ ندخل عَ العملية الحسابية اللي بعد كده، رقم اتنين. ونلاقي إن هنا العملية الحسابية التانية اللي هَتْتمّ، هي القسمة. هنلاقي إن فيه أربعة على الاتنين. إحنا قلنا بنبدأ من اليمين لليسار؛ مِ اليمين للشمال. فهنلاقي إن أربعة على الاتنين، باتنين. فنبدأ نكتبها في الخطوة اللي بعد كده. تساوي اتنين زائد خمسة في أربعة.

لاحظ هنا إن كان فيه عمليتين. كان في عملية قسمة، وكان فيه عملية ضرب بين الخمسة والأربعة. بس إحنا اخترنا مِ اليمين للشمال. نبدأ نعمل اللي بعد كده. فهنلاقي إن الاتنين تنزل زيّ ما هي. وعلامة الزائد … مش وقتِك دلوقتي، مش أنتي اللي بتحصلي دلوقتي، لسّه فيه علامة ضرب ما حصلتش. فهنلاقي إن خمسة لمّا تتضرب في الأربعة عندي، يدّيني عشرين. فأكتب زائد عشرين. أجمع القيمتين دول مع بعض، يطلع الناتج اتنين وعشرين. وهي دي قيمة التعبير العددي اللي قدامنا المظبوطة، لمّا رتّبنا العمليات الحسابية ترتيب مظبوط.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.