تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مساحة مربع

سوزان فائق

يوضح الفيديو مفهوم المساحة، وكيفية إيجاد مساحة المربع بصيغتَي طول الضلع في نفسه أو مربع طول الضلع.

٠٤:٤٤

‏نسخة الفيديو النصية

في الفيديو ده هنتكلم على إيجاد مساحة المربّع، هنعرف إيه هي المساحة للمربع، وإيه الصيغة المستخدَمة لإيجاد قيمة المساحة.

المساحة هي عدد الوحدات المربعة التي تغطّي أي شكل مغلق. يعني مثلًا لو عندنا شكل زي اللي قدامنا ده. مستطيل له طول وعرض، علشان نوجد مساحته بنقسّم المستطيل اللي هو عبارة عن شكل مغلق إلى وحدات مربعة، وبنعد عدد الوحدات المربعة؛ وبالتالي بتبقى هي دي المساحة.

المربع عبارة عن مستطيل فيه الطول يساوي العرض. يعني المستطيل ده لو مسحنا العمودين دول، فهيبقى الطول بيساوي العرض، وهنقول هنا إن ده طول ضلع المربع، وده طول ضلع المربع. لو عدينا عدد الوحدات هنا هنلاقيهم ستاشر. وطول ضلع المربع عبارة عن أربع وحدات. لو ضربنا الأربع وحدات في الأربع وحدات، هيطلع لنا ستاشر مربع، وهو ده مساحة المربع.

يعني مساحة المربع بتساوي طول الضلع في نفسه. ونفس الصيغة دي ممكن نقول طول الضلع تربيع. فمساحة المربع هي مربع طول ضلعه. ووحدات المساحة هي الوحدات المربعة. يعني بنقول هنا المربع اللي قدامنا ده مساحته ستاشر وحدة مربعة. ولو كان متقاس بالسنتيمتر فهيبقى ستاشر سنتيمتر مربع. متقاس بالمتر يبقى ستاشر متر مربع، وهكذا.

نشوف أمثلة: اوجد مساحة المربع في الشكل.

هنعدّ هنا عدد الوحدات المربعة، ممكن نقول إن هو أربعة. أو إن إحنا نستخدم صيغة مساحة المربع، اللي هي مساحة المربع بتساوي طول الضلع في نفسه. هنا طول الضلع وحدتين، وهنا طول الضلع وحدتين. يبقى هنقول طول الضلع في نفسه يساوي اتنين في اتنين. يعني هيساوي أربعة وحدات مربعة.

مثال كمان: اوجد مساحة المربع في الشكل.

هنا طول الضلع ج د يساوي ستة سنتيمتر، وده مربع يعني جميع أطوال أضلاعه متساوية. ممكن نستخدم الصيغة التانية لمساحة المربع، اللي هي طول الضلع تربيع. هتساوي ستة تربيع؛ يعني ستة في ستة بستة وتلاتين. وهنا وحدة القياس سنتيمتر يبقى مساحة المربع سنتيمتر مربع.

نشوف مثال من حياتنا العملية: فُرشت قاعة مربعة طول ضلعها عشرة متر، بسجادة طول ضلعها تمنية متر. اوجد مساحة الجزء غير المفروش بالسجاد من أرضية القاعة.

طول ضلع القاعة عشرة متر، وطول ضلع السجاده تمنية متر. عايزين نحسب مساحة الجزء الغير مفروش بالسجادة. يبقى هنحسب مساحة القاعة كلها، وبعدين نحسب مساحة السجادة، ونطرح الرقمين من بعض علشان نوجد الجزء غير المفروش.

هنستخدم صيغة مساحة المربع تساوي طول الضلع تربيع. مساحة القاعة هتساوي … طول ضلعها عشرة متر، تربيع يبقى يساوي مية متر مربع. مساحة السجادة هيساوي … طول ضلعها تمنية متر، يبقى تمنية تربيع، هتساوي أربعة وستين متر مربع.

إذن مساحة الجزء غير المفروش بالسجاد مية ناقص أربعة وستين، يساوي ستة وتلاتين متر مربع. وهي دي قيمة مساحة الجزء غير المفروش بالسجاد من أرضية القاعة.

اتكلمنا في الفيديو ده عن إيجاد مساحة المربع، وعرفنا إيه هي المساحة، وإيه العلاقة ما بين المربع والمستطيل، وإيه هي صيغة مساحة المربع اللي بنستخدمها لإيجاد مساحة المربع. واتكلمنا على مثال من حياتنا العملية.