فيديو: امتحان الفيزياء • ٢٠١٧/٢٠١٦ • السؤال الثالث ب

امتحان الفيزياء • ٢٠١٧/٢٠١٦ • السؤال الثالث ب

٠٢:١٤

‏نسخة الفيديو النصية

اذكر عاملًا واحدًا يمكنه زيادة فرق الجهد بين قطبَي عمود كهربي في دائرة مغلقة.

فالعمود الكهربي أو البطارية بيبقى فيه قوة دافعة كهربية بتحرّك التيار، ومقاومة داخلية بتقلّل مرور التيار. فلمّا نوصّله في دايرة مغلقة، والدايرة دي هنعتبرها دايرة بسيطة مكوّنة من مقاومة أومية، فالقوة الدافعة الكهربية 𝑉𝐵 هتبدأ تمشّي تيار في الدايرة.

ولو جينا نقيس فرق الجهد بين قطبَي البطارية. وده عن طريق إن إحنا نوصّل فولتميتر على قطبَي البطارية. فهنلاقي إن القيمة اللي بيقراها الفولتميتر هي عبارة عن القوة الدافعة الكهربية للبطارية، ناقص التيار اللي ماشي في الدايرة مضروب في المقاومة الداخلية للبطارية.

وبما إن القوة الدافعة الكهربية والمقاومة الداخلية للبطارية قيم ثابتة. فده معناه إن الحاجة الوحيدة اللي ممكن نعملها عشان نزوّد فرق الجهد اللي ما بين قطبين البطارية؛ إن إحنا نغيّر قيمة التيار. ففرق الجهد اللي عَ البطارية بيساوي قيمة ثابتة، ناقص القيمة اللي ممكن نغيّرها مضروبة في قيمة ثابتة. فده معناه إن كل ما نقلّل القيمة المطروحة دي، هنلاقي إن فرق الجهد بيزيد. يعني علشان نزوّد فرق الجهد، هنقلّل شدّة التيار.

وعلشان نعرف إيه اللي بيتحكّم في شدة التيار. هنستخدم قانون أوم اللي بيقول إن فرق الجهد على أيّ مقاومة بيساوي التيار اللي ماشي في المقاومة، مضروب في قيمتها. ولمّا نطبّقه عَ الدايرة، هنلاقي إن القوة الدافعة الكهربية للبطارية بتساوي التيار الكلي اللي ماشي في الدايرة. مضروب في المقاومة المكافئة للدايرة اللي خارج البطارية، زائد المقاومة الداخلية للبطارية.

فشدة التيار كده بتساوي القوة الدافعة الكهربية للبطارية؛ مقسومة على المقاومة المكافئة للدايرة اللي خارج البطارية، زائد المقاومة الداخلية للبطارية. وبما إن القوة الدافعة الكهربية والمقاومة الداخلية للبطارية قيم ثابتة، فالحاجة الوحيدة اللي ممكن نغيّرها هي قيمة المقاومة المكافئة للدايرة الخارجية للبطارية.

فعلشان نزوّد قيمة فرق الجهد اللي موجود على قطبين البطارية، هنحتاج نقلّل التيار. وعلشان نقلّل شدة التيار، هنحتاج نزوّد المقاومة المكافئة للدايرة الخارجية بالنسبة للبطارية.

فممكن كده نزوّد فرق الجهد بين قطبين البطارية بإنقاص شدّة التيار بالدائرة؛ عن طريق زيادة المقاومة المكافئة للدائرة الخارجية بالنسبة إلى البطارية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.