فيديو: استخدام المخططات لتمثيل الكسور

أيٌّ من الأشكال التالية يمثِّل الكسر ٨/٣؟ [أ] شكل أ [ب] شكل ب [ج] شكل ﺟ [د] شكل د [ﻫ] شكل ﻫ

٠٤:٢١

‏نسخة الفيديو النصية

أيّ من الأشكال التالية يمثل الكسر تلاتة على تمنية؟ الشكل أ ولّا ب ولّا ﺟ ولّا د ولّا ﻫ؟

علشان نعرف أيّ شكل من الأشكال دي هو اللي بيمثّل الكسر تلاتة على تمنية؛ هناخد شكل شكل ونجيب الكسر بتاعه.

فنبدأ بالشكل أ؛ علشان نجيب الكسر بتاعه أول حاجة نعمل شرطة الكسر. تحت شرطة الكسر بيكون فيه عدد الأجزاء كلها. طب إحنا عندنا الدايرة اللي عندنا مكوّنة من كام جزء؟، واحد، اتنين، تلاتة، أربعة، خمسة، ستة، سبعة، تمنية. يبقى عدد الأجزاء كلها تمنية. فنكتب تحت تمنية، طيب وفوق؟ بنكتب عدد الأجزاء المظلّلة بس، اللي هما كام جزء؟ واحد، اتنين، تلاتة، أربعة، خمسة. يبقى عدد الأجزاء المظلّلة أو الملونة خمسة. ده معناه إن الصورة الأولى اللي الكسر اللي بيمثّلها هو خمسة على تمنية. وإحنا عاوزين الكسر تلاتة على تمنية. معنى كده إن أول صورة دي مش هي الاختيار الصح.

نيجي للصورة اللي بعدها. نعمل شرطة كسر، وتحت عدد الأجزاء كلها. واحد، اتنين، تلاتة، أربعة، خمسة، ستة، سبعة، تمنية، تسعة، عشرة. يبقى عدد الأجزاء كلهم عشرة، نكتبها تحت شرطة الكسر. وفوق عدد الأجزاء المظللة. عدد الأجزاء المظللة واحد، اتنين، تلاتة. يبقى نكتب فوق تلاتة. تلاتة على عشرة هو الكسر اللي بيمثل الصورة ب. وبرضو مش هو الإجابة الصح؛ لأنه مش تلاتة على تمنية.

نيجي للصورة ﺟ، ونعمل شرطة الكسر. ونعدّ عدد الأجزاء كلها. واحد، اتنين، تلاتة، أربعة، خمسة، ستة، سبعة، تمنية، تسعة، عشرة. عدد الأجزاء كلهم عشرة. ونعدّ الأجزاء الملوّنة أو المظلّلة. واحد، اتنين، تلاتة، أربعة، خمسة. خمس أجزاء مظلّلة. يبقى الكسر ده هو خمسة على عشرة. ولو جينا بسّطناه هيطلع بيساوي واحد على الاتنين، أو اللي هو نص. وفي الحالتين الكسر ده مش هو هوّاه تلاتة على تمنية.

نشوف الصورة اللي بعدها. بنعمل شرطة الكسر ونعدّ الأجزاء كلها. واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر. كلهم اتناشر جزء فنكتب تحت اتناشر. بعدين نعدّ الأجزاء الملوّنة. واحد، اتنين، تلاتة، أربعة، خمسة، ستة، سبعة، تمنية، تسعة. يبقى عددهم كلهم تسعة. لو جينا نختصر الكسر ده ونقسم على الـ تلاتة، هيكون تلاتة على أربعة. وبرضو مش هو الكسر بتاعنا، إحنا عاوزين تلاتة عَ الـتمنية.

فنيجي نشوف آخر صورة اللي هي دي. نعمل شرطة الكسر، ونعدّ عدد الأجزاء كلها. واحد، اتنين، تلاتة، أربعة، خمسة، ستة، سبعة، تمنية. تمَن أجزاء، فنكتب التمنية تحت. بعدين نعدّ الأجزاء الملوّنة بس. واحد، اتنين، تلاتة. طلعوا تلاتة، فنكتب فوق تلاتة. يبقى معنى كده إن الصورة دي بتمثّل الكسر تلاتة على تمنية، وهو ده اللي عندنا في السؤال. يبقى معنى كده إن الصورة دي هي الصورة الصح واللي إحنا المفروض نختارها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.