تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ترتيب الأعداد

نهال عصمت

يتناول الفيديو كيفية ترتيب الأعداد حتى ٢٠ باستخدام خط الأعداد، والكلمات المستخدمة للتعبير عن ذلك.

٠٥:٤١

‏نسخة الفيديو النصية

ترتيب الأعداد.

هنتعلم إزاي نرتّب الأعداد. هنستخدم خط الأعداد عشان يوضّح لنا إزاي نرتب الأعداد.

فيه كلمات بنستخدمها للتعبير عن ترتيب الأعداد. وهي: قبل. وبعد. وبين. عندنا خط الأعداد بيبقى بالشكل ده. هنلاقي الأعداد بتظهر على خط الأعداد من صفر إلى عشرين. والأعداد بتظهر بالترتيب. وهي: صفر. واحد. اتنين. تلاتة. أربعة. خمسة. ستة. سبعة. تمنية. تسعة. عشرة. حداشر. اتناشر. تلتاشر. أربعتاشر. خمستاشر. ستاشر. سبعتاشر. تمنتاشر. تسعتاشر. عشرين.

لو جينا بصينا على العددين سبعة وتمنية، هنلاحظ إن العدد سبعة يأتي قبل العدد تمنية. يبقى لو جينا نرتب الأعداد هنلاقي إن سبعة بتيجي أو بتظهر قبل العدد تمنية. طب لو جينا بصّينا على العددين تمنية وتسعة. هنلاقي إن العدد تسعة بيظهر بعد العدد تمنية.

يبقى لو جينا نرتّب الأعداد، هنلاقي إن مفروض نكتب العدد تمنية الأول، بعديها نقدر نكتب العدد تسعة.

يبقى كده عرفنا إزاي نرتّب الأعداد باستخدام كلمة قبل واستخدام كلمة بعد.

طب لو جينا نبص على التلات أعداد مع بعض. هنلاقي إن العدد تمنية يأتي بين العددين سبعة وتسعة. يبقى هنلاقي إن العدد تمنية موجود في الوسط بين العدد سبعة والعدد تسعة. يبقى لو جينا نرتّب الأعداد سبعة وتمنية وتسعة، هنلاقي إن سبعة بتيجي أول حاجة. وبعد كده تمنية. وبعد كده تسعة.

يبقى عرفنا نرتب الأعداد باستخدام كلمة قبل وكلمة بعد وكلمة بين.

هنبدأ نجيب صفحة جديدة، ونشوف أمثلة على ترتيب الأعداد.

المطلوب: أكمل العدد الناقص. عايزين نكمّل العدد الناقص اللي موجود في خط الأعداد الأول. عايزين نعرف إيه العدد الذي يقع بين حداشر وتلتاشر.

هنلاقي إن العدد اللي موجود بين حداشر وتلتاشر هو اتناشر؛ عشان لمّا بنيجي نعدّ بنقول: حداشر، اتناشر، تلتاشر. كده قدرنا نعدّ بالترتيب.

بعد كده عندنا في خط الأعداد التاني، عايزين نعرف إيه العدد اللي موجود قبل تسعتاشر. هنلاقي إن العدد اللي قبل تسعتاشر هو تمنتاشر؛ عشان لمّا بنيجي نعدّ بالترتيب بنقول: تمنتاشر، تسعتاشر، عشرين.

آخر خط أعداد عايزين نعرف العدد الذي يأتي بعد أربعة. هنلاقي العدد اللي بعد أربعة هو خمسة؛ عشان لمّا بنعدّ بالترتيب بنقول: تلاتة، أربعة، خمسة. يبقى كده قدرنا نكمّل الناقص في خط الأعداد.

هنبدأ نجيب صفحة جديدة، ونشوف مثال آخر.

مطلوب: اكتب العدد الذي يأتي بعد اتنين.

لمّا نيجي نعدّ بالترتيب، هنلاقي العدد اللي بعد اتنين هو تلاتة. يبقى هنكتب العدد تلاتة.

المطلوب التاني: اكتب العدد الذي يأتي قبل عشرة.

هنلاقي إن العدد اللي قبل عشرة، لمّا نيجي نعدّ بالترتيب، بنقول: تسعة، عشرة. يبقى العدد اللي قبل عشرة هو تسعة.

وبكده اتكلّمنا عن ترتيب الأعداد، واستخدمنا خط الأعداد؛ عشان بيوضح لنا الأعداد بالترتيب. وعرفنا الكلمات اللي بنستخدمها للتعبير عن ترتيب الأعداد، وهي: قبل، وبعد، وبين.