فيديو: القسمة على ۸ و۹

يوضح الفيديو شرح القسمة على ۸ و۹، وشرح الطرق المختلفة لإيجاد ناتج القسمة، مع حل أمثلة توضيحية.

١٠:٢٢

‏نسخة الفيديو النصية

القسمة على تمنية وتسعة.

في الفيديو ده، هنشرح إزّاي نقدر نقسم على تمنية أو تسعة باستخدام الطرق المختلفة مع حلّ أمثلة توضيحية. نبدأ أول حاجة بمثال توضيحي. بنقرا المثال التالي: تبيّن لوحة الرموز التالية عدد الطلاب وعدد زياراتهم للمتحف. فإذا كان عدد الطلاب الذين قاموا بزيارة المتحف مرتين أو أكثر اتنين وتلاتين طالب.

بنلاقي عندنا لوحة الرموز التالية، زيّ ما إحنا شايفين. بنلاقي إن عدد الزيارات اللي قام بيها الطلبة في العمود الأول، وعدد الطلاب في العمود التاني. لازم نوضّح حاجة بس؛ إن عندنا رمز، وهو عبارة عن كفّ الإيد. وكفّ الإيد ده بيمثّل تمن طلاب. يعني بالنسبة للعمود الأول، لو شُفنا عدد الطلاب اللي ما زاروش المتحف خالص، يعني عدد الزيارات بصفر، بنلاقي إن عددهم عبارة عن كفّ إيد. وبكده عرفنا إن تمن طلاب ما زاروش المتحف خالص. بعد كده بنلاقي إن عدد الطلاب اللي زاروا المتحف مرة واحدة عبارة عن كفّ وكفّ، يعني تمن طلاب، وتمن طلاب. لمّا نجمعهم بيكونوا عبارة عن ستاشر طالب. تمنية زائد تمنية تساوي ستاشر.

المطلوب منّنا بقى نكتب جملة عددية لمعرفة كم كفّ ليمثّل هذا الصفّ. أيّ صفّ بنتكلّم عنه؟ هو الصفّ الأخير في اللوحة التالية. زيّ ما إحنا شايفين، عدد الزيارات اتنين أو أكثر. وده هيحصل باستخدام المعلومة المذكورة في المثال. وهي إن اتنين وتلاتين طالب قاموا بزيارة المتحف مرتين أو أكثر. ببساطة عندنا اتنين وتلاتين طالب. عاوزين نمثّل العدد ده باستخدام الكفّ. والكفّ بيساوي تمن طلاب. هنكتب المطلوب منّنا رياضيًّا. المطلوب عبارة عن ناتج قسمة اتنين وتلاتين على التمنية. اتنين وتلاتين عبارة عن عدد الطلاب الكلّي. تمنية عبارة عن العدد اللي بيمثّله هذا الرمز.

هنستخدم حقائق الضرب والقسمة المترابطة لإيجاد ناتج هذه القسمة. باستخدام الحقائق المترابطة، هنبدأ أول حاجة بالضرب. وبنسأل: اتنين وتلاتين على التمنية بيكون ناتج القسمة كام؟ لاستخدام حقائق الضرب المترابطة، لازم نكون حافظين جدول الضرب. فبنسأل: تمنية في كام بيكون الناتج اتنين وتلاتين؟ بنلاقي إن تمنية في أربعة بيكون الناتج اتنين وتلاتين. وبكده ناتج القسمة عندنا … اتنين وتلاتين على التمنية بيكون عبارة عن أربعة.

باستخدام القسمة، بنلاقي عندنا مطلوب إيجاد ناتج قسمة اتنين وتلاتين على التمنية بكام. هي هي لو سألنا: اتنين وتلاتين على كام بيكون الناتج تمنية؟ من حفظنا، بنلاقي إن اتنين وتلاتين على الأربعة بيكون الناتج تمنية. يبقى ناتج قسمة اتنين وتلاتين على التمنية يساوي أربعة. إذن اتنين وتلاتين على التمنية بيكون ناتج القسمة أربعة. أي أن أربع كفوف أو أربع رموز من هذا الرمز تُرسَم في الصفّ الأخير. يبقى في الصفّ الأخير في اللوحة عدد الزيارات اتنين أو أكثر. هنرسم أربع كفوف.

بعد كده هنحلّ مثال على القسمة، باستخدام طريقة التقسيم إلى مجموعات متساوية. نفتح صفحة جديدة. بنكمّل، ونقرا المثال التالي: صَنَعَت علياء وتمنية من صديقاتها تلاتة وستين نجمة ورقية. إذا وُزّعت بينهن بالتساوي، فكم نجمة تأخذها كل واحدة؟

يبقى المطلوب منّنا نوزّع تلاتة وستين نجمة على علياء وتمنية من صديقاتها. نكتب المطلوب منّنا رياضيًّا. المطلوب هو ناتج قسمة تلاتة وستين، عبارة عن عدد الكلّي للنجوم الورقية، على تسعة. تسعة عبارة عن تمنية من زمايل علياء وعلياء. يبقى عددهم تسعة. أو بنقول: تلاتة وستين مقسومة على تسعة، بيكون الناتج كام؟

باستخدام التقسيم إلى مجموعات متساوية، بنبدأ نقسّم التلاتة وستين نجمة ورقية إلى تسع مجموعات، زيّ ما إحنا شايفين قدامنا. التسع مجموعات طبعًا فيهم نفس عدد النجوم. بنبدأ نعدّ عدد النجوم داخل كل مجموعة بكام. بنلاقي إن المجموعة فيها واحد، اتنين، تلاتة، أربعة، خمسة، ستة، سبعة. وبكده بنلاقي إن كل مجموعة فيها سبع نجمات ورقية. إذن تلاتة وستين مقسومة عَ التسعة بيكون الناتج سبعة. أو بنقول: تلاتة وستين مقسومة عَ التسعة، الناتج سبعة. يبقى من جملة القسمة دي، نقدر نقول: أن كل واحدة تحصل على سبع نجمات.

بعد كده هنحلّ مثال على إيجاد ناتج القسمة باستخدام الطرح المتكرّر. نفتح صفحة جديدة. بنكمّل، ونقرا المثال التالي: جمع أحمد سبعة وعشرين عُملة معدنية لبلاد مختلفة على مدار تسع سنوات. وكان يجمع كل سنة نفس العدد. كم عدد العملات التي يجمعها في السنة الواحدة؟

يبقى أحمد جمع عدد كلّي من العملات سبعة وعشرين عملة على مدار تسع سنوات. عاوزين نعرف عدد العملات اللي بيجمعها أحمد كل سنة. يبقى المطلوب منّنا رياضيًّا هو ناتج القسمة: سبعة وعشرين على التسعة. أو بنكتبها في صورة أخرى: سبعة وعشرين مقسومة على تسعة. هنستخدم طريقة الطرح المتكرّر. بنبدأ بالمقسوم، وهو سبعة وعشرين، ونطرح منه المقسوم عليه، وهو تسعة. بيكون الناتج تمنتاشر. وبكده يبقى عملنا أول عملية طرح. بعد كده تمنتاشر ناقص تسعة، بيكون الناتج تسعة. ودي ناتج تاني عملية طرح. بعد كده بنلاقي تسعة ناقص تسعة، بيكون الناتج صفر. ودي عبارة عن تالت عملية طرح.

وبكده يبقى طرحنا تسعة تلات مرات حتى نصل إلى الصفر. إذن سبعة وعشرين على تسعة بيكون الناتج تلاتة. أو بنكتبها في صورة أخرى: سبعة وعشرين مقسومة عَ التسعة، الناتج تلاتة. أي أن أحمد يجمع تلات عملات كل سنة.

بعد كده هنحلّ مثال على القسمة، وهنستخدم فيه كل الطرق اللي اتكلّمنا عنها وذكرناها. نفتح صفحة جديدة. بنكمّل، ونقرا المثال التالي: اوجد ستاشر على تمنية، أو ستاشر مقسومة على تمنية.

هنبدأ أول حاجة باستخدام الحقائق المترابطة. بنبدأ أولًا باستخدام الضرب. بنسأل: ستاشر على التمنية، ناتج القسمة بكام؟ لازم نكون حافظين جدول الضرب طبعًا. هي هي لو سألنا: تمنية في كام بيكون الناتج ستاشر؟ من حفظنا لجدول الضرب، عارفين إن تمنية في اتنين بيكون الناتج ستاشر. إذن ناتج قسمة ستاشر على التمنية تساوي اتنين. بعد كده باستخدام القسمة بنسأل: ستاشر على التمنية، الناتج كام؟ هي هي لو سألنا: ستاشر على كام يكون الناتج تمنية؟ طبعًا ستاشر لو قسمناها على الاتنين بيكون الناتج تمنية. إذن ناتج قسمة ستاشر على التمنية يساوي اتنين.

باستخدام المجموعات المتساوية، هنقدر نوجد ناتج قسمة ستاشر على التمنية. وده هيحصل بإننا يا نقسّم الستاشر إلى تمن مجموعات، ونعدّ عدد عناصر كل مجموعة. أو بإننا نقسّم الستاشر إلى مجموعات، وكل مجموعة تحتوي على تمن عناصر. وبعد كده نعدّ قسّمنا الستاشر لكام مجموعة تحتوي على تمنية. خلّينا نفهم أكتر. زيّ ما قلنا، إننا هنقسّم الستاشر إلى مجموعات، وكل مجموعة بتحتوي على تمن عناصر، زيّ ما إحنا شايفين كده. واحد، اتنين، تلاتة، أربعة، خمسة، ستة، سبعة، تمنية. بنعدّ بعد كده عدد المجموعات اللي اتقسّمت ليها الستاشر. بنلاقي إن دي المجموعة الأولى، ودي المجموعة التانية. إذن ستاشر على التمنية بيكون الناتج اتنين.

بعد كده هنستخدم طريقة الطرح المتكرّر لإيجاد ناتج القسمة: ستاشر على التمنية. بنطرح أول مرة المقسوم ناقص المقسوم عليه، بيكون الناتج تمنية. ودي عبارة عن أول عملية طرح. بعد كده تمنية ناقص تمنية، بيكون الناتج صفر. ودي عبارة عن تاني عملية طرح. يبقى كده إحنا طرحنا تمنية مرتين حتى نصل للصفر. إذن ستاشر على التمنية بيكون الناتج اتنين. أو بنقول: ستاشر مقسومة عَ التمنية، الناتج اتنين. يبقى بعد ما حلّينا بكل الطرق دي، لقينا فعلًا إن ناتج القسمة واحد.

وبكده يبقى في الفيديو ده، اتكلّمنا عن القسمة على تمنية وتسعة. وشُفنا الطرق المختلفة لإيجاد ناتج القسمة باستخدام الحقائق المترابطة؛ الضرب أو القسمة. وباستخدام المجموعات المتساوية. وباستخدام الطرح المتكرّر. وحلّينا أمثلة على كل طريقة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.