فيديو: الضرب في ٤

يوضح الفيديو كيفية الضرب في العدد ٤ باستخدام المجموعات وطريقة العد المتقطع، مع أمثلة توضيحية.

٠٥:٢٧

‏نسخة الفيديو النصية

في الفيديو ده، هنتعلّم الضرب في العدد أربعة، وهنحلّ بعض الأمثلة.

لو فيه معرض سيارات، والمعرض ده عنده خمس سيارات. فإذا كان للسيارة الواحدة أربع عجلات، فكم عجلة للسيارات الخمسة؟

يعني عندنا خمس سيارات أو خمس عربيات. وكل سيارة فيها أربع عجلات. فلو عايزين نعرف كام عجلة عندنا في الخمس سيارات، يبقى محتاجين نوجد حاصل ضرب خمسة في أربعة. فخمسة اللي هو عدد السيارات اللي في المعرض. وأربعة هو عدد العجلات في كلّ سيارة. وفيه عندنا أكتر من طريقة ممكن نوجد بيها حاصل ضرب خمسة في أربعة.

وأول طريقة عندنا إننا نعمل نموذج باستخدام قطع العدّ. فعشان نوجد حاصل ضرب خمسة في أربعة، يبقى هنعمل نموذج لخمس مجموعات، وكلّ مجموعة فيها أربع قطع. فزيّ الشكل اللي قدامنا ده، عندنا خمس مجموعات، وكل مجموعة فيها أربع قطع. فهيبقى عدد القطع في الخمس مجموعات … فهيبقى أربعة زائد أربعة، زائد أربعة، زائد أربعة، زائد أربعة، فهيساوي عشرين. فمعنى كده إن هيبقى عندنا عشرين قطعة. ودي كده أول طريقة؛ إننا نعمل نموذج باستخدام قطع العدّ.

وتاني طريقة عندنا هي إننا نرسم صورة. فهنرسم صورة زيّ اللي في الشكل ده لخمس سيارات. وكل سيارة فيها أربع عجلات. وبعد كده هنستعمل الجمع المتكرّر؛ عشان نوجد حاصل ضرب خمسة في أربعة. فزيّ ما قلنا في الصورة عندنا، إن كل سيارة فيها أربع عجلات. فيبقى هنجمع أربعة زائد أربعة، زائد أربعة، زائد أربعة، زائد أربعة. فلمّا نجمعهم هيبقى بيساوي عشرين. فمعنى كده إن عدد العجلات في خمس سيارات، اللي هو حاصل ضرب خمسة في أربعة، هيساوي عشرين عجلة.

ونشوف مثال آخر: قرأ كريم ثلاثة كتب. إذا كان كل كتاب يتكوّن من أربع فصول، فما عدد الفصول التي قرأها كريم؟

يعني عندنا تلات كتب كريم قراها. وكل كتاب بيتكوّن من أربع فصول. فعايزين نعرف عدد الفصول الكلّي، يعني عدد الفصول في التلات كتب اللي قراها كريم. فمعنى كده إننا عايزين نوجد حاصل ضرب تلاتة في أربعة. وتلاتة هنا بيمثّل عدد الكتب، والعدد أربعة بيمثّل عدد الفصول في كل كتاب. فعشان نوجد حاصل ضرب تلاتة في أربعة، هنستخدم طريقة تانية اسمها طريقة العدّ المتقطّع. والعدّ المتقطّع هي الطريقة اللي بنوجد بيها حاصل الضرب باستخدام خطّ الأعداد.

فأول حاجة هنعملها، إننا هنرسم خطّ أعداد، وهنكتب عليه الأعداد بالشكل ده. بعد كده عشان نوجد حاصل ضرب تلاتة في أربعة. فهنبدأ نعدّ على خطّ الأعداد عدّ متقطّع. فهيبقى عندنا هنا كل أربع عدّات هنعتبرها عدّة واحدة، أو هنعمل قفزة كل أربع أعداد. يعني لمّا نبدأ نعدّ هنا: واحد، اتنين، تلاتة، أربعة، فدي كده بنسمّيها قفزة. فدي كده القفزة اللي عندنا، كل أربع أعداد. وبعد كده نكمّل، فنبدأ نعدّ أربع عدّات كمان. فيبقى واحد، اتنين، تلاتة، أربعة. ودي كده هتبقى تاني قفزة. بعد كده هنبدأ نعدّ أربع عدّات كمان. فيبقى واحد، اتنين، تلاتة، أربعة. ودي كده هتبقى تالت قفزة عندنا. فمعنى كده إن كلّ قفزة من التلات قفزات دول بتساوي أربع عدّات.

وإحنا عشان عايزين نوجد حاصل ضرب تلاتة في أربعة، فعملنا تلات قفزات كل قفزة فيهم فيها أربع عدّات. فبعد كده هنشوف آخر عدد وقفنا عنده، هنلاقي إن هو العدد اتناشر. فمعنى كده إن حاصل ضرب تلاتة في أربعة بيساوي اتناشر. والطريقة دي بنسمّيها طريقة العدّ المتقطع. فبالتالي هيبقى عدد الفصول اللي قراها كريم بتساوي تلاتة في أربعة، واللي بتساوي اتناشر فصلًا.

وبكده نكون عرفنا الضرب في العدد أربعة باستخدام طريقة المجموعات، أو إننا نعمل نموذج، وبطريقة إننا نرسم صورة، ونستخدم الجمع المتكرّر. وعرفنا إزّاي نضرب في العدد أربعة باستخدام طريقة العدّ المتقطّع باستخدام خطّ الأعداد. وحلّينا بعض الأمثلة المختلفة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.