نسخة الفيديو النصية
إذا أُدير هذا القرص الدوَّار مرة واحدة. فحدِّد هل من المؤكَّد أو من المحتمَل بدرجة كبيرة، أو من المحتمَل بدرجة قليلة، أو من المستحيل أن يتوقّف السهم على مضاعف العدد تلاتة.
عندنا القرص الدوَّار اللي قدامنا ده عليه شويّة أعداد؛ زيّ الحداشر، والتسعتاشر، والعشرة، والتمنية، والأربعة وعشرين، والتلاتة وعشرين. وعاوزين نعرف احتمال وقوف المؤشّر أو السهم على مضاعف العدد تلاتة. طيب تعالوا كده نفكّر هي إيه مضاعفات العدد تلاتة. تلاتة، ستة، تسعة، اتناشر، خمستاشر، تمنتاشر، واحد وعشرين، أربعة وعشرين، سبعة وعشرين، وهكذا.
طيب لو جينا نبصّ على القرص اللي عندنا، إيه الأعداد اللي عليه اللي تُعتَبَر مضاعفات للتلاتة؟ التلاتة وعشرين مش مضاعف، ولا الحداشر، ولا التسعتاشر، ولا العشرة، ولا التمنية. ما فيش غير الأربعة وعشرين هي اللي تُعتبر من مضاعفات العدد تلاتة. إنها موجودة هنا أهي؛ الأربعة وعشرين.
طيب يبقى إحنا كده عاوزين نعرف إيه؟ عاوزين نعرف احتمال إن المؤشّر يقف على أربعة وعشرين. فهنبدأ نحسب احتمال وقوف السهم على الأربعة وعشرين، وبعديها نجاوب على السؤال بتاعنا. فعلشان نعرف احتمال وقوف السهم على العدد أربعة وعشرين، بنعمل أول حاجة شرطة كسر. تحت شرطة الكسر بنكتب عدد الأجزاء الكلّي. هو القرص عندنا فيه كام جزء؟ واحد، اتنين، تلاتة، أربعة، خمسة، ستة. يبقى عدد الأجزاء الكلّي اللي موجودة في القرص ست أجزاء. طيب، وفوق نكتب إيه؟ نكتب الأعداد اللي السهم ممكن يقف عليها، اللي هي مضاعفات التلاتة. ما لقيناش غير الأربعة وعشرين بس. طب عددها إيه؟ واحد؛ لأنها نتيجة واحدة. فبنكتب فوق إيه؟ واحد. يبقى اللي طلع لنا ده، اللي هو السدس، هو احتمال وقوف المؤشّر أو السهم على مضاعف العدد تلاتة.
طب هي سدس دي قيمتها إيه؛ كبيرة ولّا صغيّرة؟ صغيّرة. ده في الست أجزاء كلهم مش هيقف غير على جزء واحد بس. يبقى الاحتمال الكلّي سدس. يبقى لمَّا نيجي نجاوب على السؤال اللي بيسألنا: هل من المؤكّد، أو من المحتمَل بدرجة كبيرة، أو من المحتمَل بدرجة قليلة، أو من المستحيل إن السهم يقف عند التلاتة وعشرين، هنقول له إيه؟ هنقول له: ده من المحتمل بدرجة قليلة.
طيب ليه ما قُلناش مؤكَّد؟ كُنّا نقول: مؤكَّد، لو كان الاحتمال ستة على ستة، أكيد. طب ليه ما قُلناش بدرجة كبيرة؟ كُنّا نقول: بدرجة كبيرة، لو كان الاحتمال مثلًا أربعة على ستة، أو خمسة على ستة؛ نسبة كبيرة، مش واحد بس. طب ليه ما نقولش مستحيل؟ لأن احتمال الحدث المستحيل صفر. وإحنا ما طلعلناش صفر. إحنا طلعلنا سدس. ودي درجة قليّلة.
يبقى معنى كده إن إجابة السؤال بتاعنا هي: من المحتمل بدرجة قليلة. وهي دي الإجابة الصحّ.
