فيديو: تقدير نواتج الضرب باستعمال التقريب

يوضح الفيديو كيفية استعمال التقريب في تقدير نواتج الضرب.

٠٥:٢٢

‏نسخة الفيديو النصية

هنتكلّم عن تقدير نواتج الضرب.

هنتعلّم إزّاي نقدّر نواتج الضرب باستعمال التقريب. هبتدي الشرح بالمثال التالي: شاركت ستة وعشرين مدرسة في مسابقة ثقافية تعقدها إدارة التربية والتعليم. إذا كانت كل مدرسة قد أرسلت ست طلاب للمشاركة، فما العدد التقريبي للطلاب الذين شاركوا في هذه المسابقة؟

بما إنه مطلوب في المثال العدد التقريبي للطلاب الذين شاركوا في المسابقة. يعني ممكن أستعمل التقدير؛ لأنه كده هنا مش محتاجين إن إحنا نجيب الإجابة الدقيقة. في البداية، هنقرّب ستة وعشرين. هنلاحظ إنه العشرة اللي بتسبق ستة وعشرين مباشرةً هي عشرين. والعشرة اللي بتيجي بعد ستة وعشرين مباشرةً هي تلاتين. هنلاحظ إنه ستة وعشرين أقرب إلى تلاتين من عشرين. إذن هنقرّب ستة وعشرين إلى تلاتين. يعني عملية الضرب هتبقى ستة في تلاتين. الخطوة رقم اتنين: هنضرب ذهنيًّا ستة في تلاتين هيساوي مية وتمانين. لأن ستة في تلاتة هيساوي تمنتاشر، وبعدين هنزوّد صفر على اليمين. إذن أقدر أقول: إنه شارك في المسابقة مية وتمانين طالب تقريبًا.

هنكمّل في الصفحة اللي جايّة. في إحدى المدارس مية وأربعين طالب. ولكلّ طالب الحق في إنه يدعو تلاتة من أقاربه إلى حفلة المدرسة. قدّر عدد المدعوّين.

عشان أقدّر عدد المدعوّين، هأقدّر حاصل ضرب تلاتة في مية وأربعين. هنفكّر إزّاي. في البداية، هنقرّب العدد الأكبر، اللي هو مية وأربعين، إلى أقرب مائة. على خطّ الأعداد، هنلاحظ إنه المائة اللي بتسبق مية وأربعين على طول هي مية. والمائة اللي بتيجي بعد المية وأربعين على طول هي الميتين. هنلاحظ إنه مية وأربعين أقرب لمائة من ميتين. وبكده هقرّب مية وأربعين إلى أقرب مائة، فهتبقى مائة. وبكده هجيب حاصل ضرب تلاتة في مية. تلاتة في مية ذهنيًّا هيساوي تلتمية. إذن عدد المدعوّين حوالي تلتمية شخص.

هنكمّل في الصفحة اللي جايّة. يركب باص المدرسة حوالي اتنين وخمسين طالبًا. هل يكفي أربع باصات لنقل مية خمسة وسبعين طالبًا ولّا لأ؟

هفكّر إزّاي. هقدّر ناتج أربعة في اتنين وخمسين؛ عشان أشوف هل يكفي أربع باصات لنقل مية خمسة وسبعين طالب ولّا لأة. وبعدين هقارن الناتج بمية خمسة وسبعين. في البداية، هقرّب اتنين وخمسين إلى أقرب عشرة. يعني هتبقى خمسين. وبكده هجيب حاصل ضرب أربعة في خمسين ذهنيًّا. أربعة في خمسة هيساوي عشرين. وبعدين هزوّد صفر على اليمين؛ إذن أربعة في خمسين هيساوي ميتين. وبالتالي يمكن لأربع باصات نقل حوالي ميتين طالب. وبما إنه ميتين أكبر من مية خمسة وسبعين، إذن أقدر أقول: إنه أربع باصات تكفي لنقل مية خمسة وسبعين طالبًا.

هنكمّل في الصفحة اللي جايّة. تدريبات. قدّر ناتج كلّ ممَّا يلي: سبعة وأربعين في أربعة. في البداية، هقرّب سبعة وأربعين إلى أقرب عشرة، فهتبقى خمسين. وبعدين هضرب خمسين في أربعة. بما إنه أربعة في خمسة هيساوي عشرين، هضيف صفر إلى اليمين، إذن خمسين في أربعة هيساوي ميتين.

سؤال رقم اتنين: تمنية وخمسين في اتنين. في البداية، هقرّب تمنية وخمسين إلى أقرب عشرة، فهتبقى ستين. وبعدين هضرب ستين في اتنين. بما إنه ستة في اتنين هيساوي اتناشر، هضيف صفر إلى اليمين؛ إذن ستين في اتنين هيساوي مية وعشرين.

سؤال رقم تلاتة: تلتمية وخمستاشر في تلاتة. في البداية، هقرّب تلتمية وخمستاشر إلى أقرب مائة، فهتبقى تلتمية. وبعدين هضرب تلتمية في تلاتة. بما إنه تلاتة في تلاتة هيساوي تسعة، وهضيف صفرين إلى اليمين؛ إذن تلتمية في تلاتة هيساوي تسعمية.

سؤال رقم أربعة: ميتين وتسعين في سبعة. في البداية، هقرّب ميتين وتسعين إلى أقرب مائة، فهتبقى تلتمية. وبعدين هضرب تلتمية في سبعة. بما إنه تلاتة في سبعة هيساوي واحد وعشرين، هضيف صفرين إلى اليمين؛ إذن تلتمية في سبعة هيساوي ألفين ومية.

وبكده هنكون اتعلّمنا إزّاي نقدّر نواتج الضرب باستعمال التقريب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.