فيديو: امتحان الإستاتيكا • ٢٠١٧/٢٠١٦ • السؤال الرابع

امتحان الإستاتيكا • ٢٠١٧/٢٠١٦ • السؤال الرابع

٠٢:٣٦

‏نسخة الفيديو النصية

إذا كانت متجه ق تساوي اتنين، وسالب تلاتة، وأربعة؛ تؤثّر في النقطة: واحد، وواحد، وواحد. فأوجد مركّبة عزم المتجه ق حول محور الصادات.

عندنا القوة متجه ق بتؤثّر في النقطة: واحد، وواحد، وواحد. واللي نفرض إن هي النقطة أ. ومطلوب منّنا إيجاد عزم القوة متجه ق حوالين محور الصادات.

عزم متجه القوة ق حوالين نقطة الأصل هو متجه ج و، واللي نقدر نحسب قيمته عن طريق المحدّد اللي قدّامنا. حيث متجه س، ومتجه ص، ومتجه ع هي متجهات الوحدة. وَ س، وَ ص، وَ ع هم بُعْد النقطة أ عن نقطة الأصل: صفر، وصفر، وصفر. اللي هي هيّاها النقطة أ: واحد، وواحد، وواحد.

يعني من هنا نعتبر إن س بتساوي واحد، وَ ص بتساوي واحد، وَ ع بتساوي واحد. أمّا ق س، وَ ق ص، وَ ق ع؛ هم: اتنين، وسالب تلاتة، وأربعة. وتبقى دي هي المعطيات اللي هتساعدنا في حلّ السؤال.

ومن فكّ المحدّد هيبقى عندنا متجه ج و بيساوي ج س في اتجاه المتجه س. زائد ج ص في اتجاه المتجه ص. زائد ج ع في اتجاه المتجه ع. والمطلوب عندنا في السؤال إيجاد مركّبة عزم متجه القوة ق حوالين محور الصادات، يعني إيجاد ج ص. طيّب إحنا عندنا ج ص بتساوي إيه؟

لو جينا في المحدّد بتاعنا وعند متجه ص شطبنا الصف الأول مع العمود التاني، اللي هيتبقّى لنا هو قيمة ج ص. تبقى ج ص بتساوي ع مضروبة في ق س، ناقص س مضروبة في ق ع. وهو ده القانون اللي هنستخدمه في إيجاد ج ص.

يبقى عندنا ج ص بتساوي … ع اللي هي واحد، مضروبة في ق س اللي هي اتنين؛ فيبقى عندنا واحد في اتنين. ناقص س اللي هي واحد، مضروبة في ق ع اللي هي أربعة؛ يبقى واحد في أربعة.

من هنا تبقى ج ص بتساوي اتنين ناقص أربعة، اللي هي سالب اتنين. وهو ده المطلوب عندنا في السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.