فيديو: ضرب الأعداد المتعددة الأرقام

نهال عصمت

يوضِّح الفيديو بالأمثلة طريقة ضرب الأعداد المتعددة الأرقام.

١٠:٤٩

‏نسخة الفيديو النصية

ضرب الأعداد متعدّدة الأرقام.

هنتكلّم عن ضرب الأعداد متعدّدة الأرقام. يعني هنعرف إزّاي نضرب عدد مكوّن من رقمين أو تلات أرقام في عدد آخر مكوّن من رقمين أو تلات أرقام أو أكثر.

في البداية، عايزين نفتكر لمّا كنا بنيجي نضرب عدد مكوّن من رقمين، زيّ خمسة وعشرين، في عدد مكوّن من رقم واحد، زيّ تلاتة، كُنّا بنعمل إيه. زيّ عملية الجمع والطرح، كُنّا بنكتب الأعداد تحت بعضها. بنكتب العدد الكبير فوق، يعني خمسة وعشرين هنكتبها فوق. وهنكتب تحتيها العدد الأقلّ، اللي هو تلاتة. وهنحطّ بينهم علامة ضرب. كُنّا بنقسّم عملية الضرب الكبيرة إلى عمليتين ضرب صغيّرين. يعني أول حاجة هنضرب الخمسة في التلاتة. بعد كده هنضرب الاتنين في التلاتة. أول حاجة خمسة في تلاتة بخمستاشر. كُنّا بنكتب خمسة، ومعانا الواحد في خانة العشرات. بعد كده اتنين في تلاتة بستة. زائد واحد، سبعة. يبقى ناتج عملية الضرب هو خمسة وسبعين.

عايزين نتكلّم لو عايزين نضرب عدد مكوّن من رقمين في عدد مكوّن من تلات أرقام. هنبدأ نجيب صفحة جديدة، ونشوف إزّاي. لو عايزين نضرب خمسمية وأربعتاشر في خمسة وتلاتين، هنعمل إيه عشان نجيب حاصل الضرب؟ أول حاجة هنحطّ الأعداد تحت بعضها. هنكتب العدد الكبير فوق. يبقى خمسمية وأربعتاشر. وهنكتب تحت خمسة وتلاتين. وهنحطّ بينهم علامة ضرب، وتحت علامة يساوي.

عايزين نضرب خمسة وتلاتين في خمسمية وأربعتاشر. عندنا الخمسة وتلاتين هي عبارة عن خمسة في خانة الآحاد وتلاتة في خانة العشرات. يبقى هنقسّم عملية الضرب الموجودة عندنا إلى عمليتين ضرب. أول حاجة هنضرب خمسمية وأربعتاشر في خمسة. بس الخمسة دي في خانة الآحاد، يبقى هنحطّها تحت الآحاد. بعد كده هنضرب خمسمية وأربعتاشر في تلاتة. بس التلاتة دي في خانة العشرات، يبقى هنحطّها تحت العشرات. ونحطّ علامة يساوي.

هنيجي عند أول حاجة خمسمية وأربعتاشر في خمسة. أول حاجة هنضرب خمسة في أربعة، بعشرين. يبقى نكتب صفر، ومعانا الاتنين. بعد كده خمسة في واحد بخمسة. زائد اتنين، بسبعة. يبقى هنكتب سبعة. تالت حاجة هنضرب خمسة في خمسة، بخمسة وعشرين. هنكتب هنا خمسة وعشرين.

بعد كده عايزين نضرب خمسمية وأربعتاشر في تلاتة. بس التلاتة دي في خانة العشرات، يبقى هنيجي أول حاجة عند خانة الآحاد تحت، وهنحطّ صفر. بمعنى لو عندنا خمسمية وأربعتاشر وعندنا التلاتة دي في خانة المئات، هنحطّ التلاتة تحت الخمسة، وهنحطّ في خانة الآحاد صفر، وفي خانة العشرات صفر. وناتج الضرب هنبدأ نكتبه من أول المئات. هنرجع للمسألة بتاعتنا. عايزين نضرب تلاتة في أربعة، وهنكتب الناتج في خانة العشرات. تلاتة في أربعة باتناشر. يبقى اتنين، ومعانا الواحد. تلاتة في واحد بتلاتة. زائد واحد، بأربعة. يبقى هنكتب أربعة. بعد كده عندنا تلاتة في خمسة بخمستاشر، هنكتب خمستاشر.

يبقى دلوقتي عندنا ناتج ضرب خمسة في خمسمية وأربعتاشر. والخمسة دي كانت في خانة الآحاد. وعندنا ناتج ضرب تلاتة في خمسمية وأربعتاشر. والتلاتة دي كانت في خانة العشرات. طب خمسة وتلاتين كانت عبارة عن إيه؟ خمسة وتلاتين هي عبارة عن خمسة زائد تلاتين؛ خمسة في خانة الآحاد، وتلاتة في خانة العشرات. هتساوي خمسة وتلاتين. يبقى هناخد ناتج عملية الضرب الأولى هنكتبه هنا: ألفين خمسمية وسبعين، زائد … هناخد ناتج عملية الضرب التانية، وهو خمستاشر ألف ربعمية وعشرين. يبقى هنجمع ناتج ضرب العملية الأولى زائد ناتج ضرب العملية التانية. هيبقى عندنا صفر زائد صفر بصفر. سبعة زائد اتنين بتسعة. خمسة زائد أربعة، تسعة. اتنين زائد خمسة، سبعة. والواحد هتنزل زيّ ما هي.

يبقى قسّمنا عملية الضرب الكبيرة إلى عمليتين ضرب صغيّرين. بعد كده جمعنا ناتج العملية الأولى زائد ناتج العملية التانية. وبالتالي حاصل ضرب خمسمية وأربعتاشر في خمسة وتلاتين هيساوي سبعتاشر ألف تسعمية وتسعين.

هنبدأ نشوف مثال تاني. هنجيب صفحة جديدة. لو عايزين نضرب خمسة وتلاتين في سبعة وتمانين، هنعمل إيه؟

أول حاجة هنضرب سبعة في خمسة، وسبعة في تلاتة. هيبقى عندنا خمسة في سبعة بخمسة وتلاتين. هنكتب خمسة، ومعانا التلاتة. بعد كده سبعة في تلاتة بواحد وعشرين. زائد تلاتة، أربعة وعشرين. يبقى هنكتب أربعة وعشرين. بعد كده زائد … عايزين نضرب تمنية اللي موجودة في خانة العشرات في خمسة وتلاتين. يبقى هنضرب الأول التمنية في الخمسة. بعد كده التمنية في التلاتة. هنضرب خمسة في تمنية، بأربعين. بس هنكتب الإجابة من أول خانة العشرات. يبقى هنحطّ في خانة الآحاد صفر، ونكتب الإجابة من أول خانة العشرات؛ عشان عندنا التمنية في خانة العشرات. يبقى إحنا قلنا: خمسة في تمنية بأربعين. صفر، ومعانا الأربعة. هنكتب أربعة فوق، وهنشطب على التلاتة؛ عشان ما تلخبطناش. بعد كده هنضرب تمنية في تلاتة، بأربعة وعشرين. زائد أربعة، تمنية وعشرين. يبقى هنكتب تمنية وعشرين.

هنبدأ نجمع. خمسة زائد صفر، بخمسة. أربعة زائد صفر، أربعة. اتنين زائد تمنية، عشرة. صفر، ومعانا الواحد. واحد زائد اتنين، بتلاتة. يبقى حاصل الضرب هو تلات آلاف خمسة وأربعين.

نشوف مثال آخر. لو عندنا عملية ضرب كبيرة شويّة. يعني عايزين نضرب عدد مكوّن من تلات أعداد، عفوًا، عدد مكوّن من تلات أرقام، في عدد آخر مكوّن من تلات أرقام. يعني عايزين نضرب سبعمية اتنين وأربعين في تلتمية تسعة وستين. ناتج الضرب هيساوي كام؟

هنقسّم برضو عملية الضرب الكبيرة إلى عمليات ضرب صغيّرة. أول حاجة هنضرب التسعة في الاتنين. بعد كده التسعة في الأربعة. بعد كده التسعة في السبعة. أول حاجة عندنا اتنين في تسعة بتمنتاشر. تمنية، ومعانا الواحد. تسعة في أربعة بستة وتلاتين. زائد واحد، سبعة وتلاتين. سبعة، ومعانا التلاتة. تسعة في سبعة، تلاتة وستين. زائد تلاتة، يبقى ستة وستين.

بعد كده عايزين نضرب ستة اللي موجودة في خانة العشرات في سبعمية اتنين وأربعين. يبقى هنضرب أول حاجة الستة في الاتنين. بعد كده في أربعة. بعد كده نضرب الستة في السبعة. يبقى هنعمل علامة زائد. بعد كده هنكتب ناتج الضرب من أول خانة العشرات. هنحطّ صفر في خانة الآحاد، وهنكتب الناتج من أول خانة العشرات؛ عشان الستة موجودة في خانة العشرات. اتنين في ستة باتناشر. اتنين، ومعانا الواحد. هنشطب على الواحد الأولانية؛ عشان ما تلخبطناش. بعد كده أربعة في ستة بأربعة وعشرين. زائد واحد، يبقى خمسة وعشرين. خمسة، ومعانا الاتنين. هنشطب على التلاتة؛ عشان ما تلخبطناش. ستة في سبعة باتنين وأربعين. زائد اتنين، يبقى أربعة وأربعين.

بعد كده عايزين نضرب التلاتة اللي موجودة في خانة المئات في سبعمية اتنين وأربعين. يبقى هنضرب الأول تلاتة في اتنين. بعد كده تلاتة في أربعة. بعد كده تلاتة في سبعة. هنكتب الأول علامة زائد تحت. ناتج الضرب هنكتبه من أول خانة المئات. يبقى هنحطّ عند خانة الآحاد صفر، وخانة العشرات صفر. وهنكتب الناتج من أول خانة المئات؛ عشان التلاتة موجودة في خانة المئات. اتنين في تلاتة بستة. يبقى هنكتب ستة عند خانة المئات. بعد كده أربعة في تلاتة باتناشر. اتنين، ومعانا الواحد. هنشطب على الاتنين؛ عشان ما تلخبطناش. بعد كده سبعة في تلاتة بواحد وعشرين. زائد واحد، يبقى اتنين وعشرين.

بعد كده نبدأ نجمع. تمنية زائد صفر زائد صفر، بتمنية. سبعة زائد اتنين، تسعة. زائد صفر، يبقى تسعة. ستة زائد خمسة، حداشر. زائد ستة، يبقى سبعتاشر. سبعة، ومعانا الواحد. واحد زائد ستة، سبعة. زائد أربعة، حداشر. زائد اتنين، تلتاشر. يبقى تلاتة، ومعانا الواحد. واحد زائد أربعة، خمسة. زائد اتنين، بسبعة. يبقى هنكتب سبعة. وآخر حاجة الاتنين هتنزل زيّ ما هي. يبقى كده قدرنا نضرب عدد مكوّن من تلات أرقام في عدد مكوّن من تلات أرقام.

يبقى كده اتكلّمنا عن ضرب الأعداد متعدّدة الأرقام. وإزّاي نضرب عدد مكوّن من رقمين أو تلات أرقام في عدد آخر مكوّن من رقمين أو تلات أرقام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.