فيديو: ضرب الأعداد العشرية في ١٠٠

أكمل:

٠١:٥٢

‏نسخة الفيديو النصية

أكمل: عندنا جدول فيه تلات أعداد عشرية هنضربها في العدد مية. وعايزين نوجد حاصل الضرب لكل عدد من الأعداد دي.

هنبدأ بأول عدد، اللي هو واحد وتسعمية اتنين وستين من ألف. إحنا دلوقتي بنضرب في مية. مية دي فيها صفرين، يبقى هنتحرّك بالعلامة العشرية حركتين جهة اليمين بالشكل ده. وهنحطّ العلامة العشرية هنا، فهنحصل على حاصل ضرب مية ستة وتسعين واتنين من عشرة.

دلوقتي هنشوف العدد اللي بعد كده، اللي هو تلاتة وتسعة من مية. إحنا بنضرب في مية، يعني المية دي فيها صفرين. يبقى هنحرّك العلامة العشرية، بنفس الطريقة، حركتين أو مكانين جهة اليمين. فيصبح حاصل الضرب بالشكل ده. العلامة العشرية أقصى اليمين، وما فيش بعدها أو على يمينها أيّ أرقام. فبالتالي العلامة العشرية دي نقدر نمسحها؛ لأنها مالهاش قيمة. يبقى دلوقتي حاصل الضرب اللي حصلنا عليه هو تلتمية وتسعة.

دلوقتي هنضرب العدد اللي بعد كده، اللي هو تلاتة واتنين من عشرة، في مية. نفس الطريقة، مية فيها صفرين. يعني محتاجين نحرّك العلامة العشرية مكانين جهة اليمين. طب ما فيش أيّ أرقام على يمين الاتنين، فنقدر نزوّد صفر. لأن أيّ أصفار على أقصى اليمين من العلامة العشرية مش بتغيّر من قيمة العدد أيّ حاجة؛ لأنها في آخر العدد بعد علامة عشرية. فمش هتزوّد ولا تقلّل من قيمة العدد. فهيبقى حاصل الضرب هو تلتمية وعشرين. المفروض إن فيه علامة عشرية على أقصى اليمين، بس بما إن ما فيش أيّ أرقام بعدها فمش بنكتبها؛ لأنها مالهاش معنى.

يبقى كده قدرنا نكمّل القيم اللي ناقصة، واللي تُعتبر حواصل الضرب للأعداد العشرية اللي موجودة في الجدول لمّا نضربها في مية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.