فيديو: إيجاد خارج القسمة وباقي القسمة باستخدام القسمة المُطوَّلة

أوجد خارج قسمة ٥٣١ ÷ ٦ والباقي إن وُجد.

٠٢:٣٧

‏نسخة الفيديو النصية

أوجد خارج قسمة خمسمية واحد وتلاتين على ستة، والباقي إن وُجد.

هنستخدم القسمة المطولة. علشان نوجد خارج قسمة عدد مكوّن من تلات أرقام، اللي هو خمسمية واحد وتلاتين؛ على عدد مكوّن من رقم واحد، واللي هو ستة. هنبدأ بقسمة رقم أكبر خانة، واللي هو خمسة. خمسة على ستة، مش هينفع لأن الخمسة أصغر. فهناخد الرقم اللي قبلها. تلاتة وخمسين على ستة، يا ترى بيساوي كام؟

هنسأل نفسنا: إيه هو العدد اللي لمَّا نضربه في ستة، هيكون الناتج تلاتة وخمسين، أو الأقرب لتلاتة وخمسين؟ من جدول ضرب العدد ستة، هنلاقي إنه أقرب عدد للتلاتة وخمسين وأصغر منه، هو العدد تمنية وأربعين. واللي هو حاصل ضرب ستة في تمنية. وبكده هنكتب في خارج القسمة، تمنية.

بعد كده هنكتب حاصل ضرب تمنية في ستة، تحت التلاتة وخمسين. وبعد كده هنبدأ نطرح تلاتة ناقص تمنية، مش هينفع. فهناخد من الخمسة واحد. والخمسة هتكون أربعة، والتلاتة هتكون تلتاشر. تلتاشر ناقص تمنية، بيساوي خمسة. وأربعة ناقص أربعة، بيساوي صفر.

هنرجع نقسم ناتج الطرح اللي هو خمسة، على ستة. مش هينفع؛ لأن الخمسة أصغر. وبالتالي هننزّل العدد الأخير ده، اللي هو واحد. ونبدأ نقسم واحد وخمسين على ستة. هنسأل نفسنا: إيه العدد إلى لمَّا نضربه في ستة، يكون الناتج واحد وخمسين أو الأقرب لواحد وخمسين، ويكون أصغر منه؟ هنلاقي برضو إن هو العدد تمنية. واللي حاصل ضربه في ستة، بيساوي تمنية وأربعين. وهو ده أقرب عدد للعدد واحد وخمسين.

بعد ما كتبنا التمنية في خارج القسمة، هنكتب حاصل ضربها في ستة، تحت الواحد وخمسين. وبعد كده نبدأ نطرح تاني. واحد ناقص تمنية، مش هينفع. فهناخد من الخمسة اللي جنبها، واحد، وتكون أربعة. والواحد هتكون حداشر. هنطرح حداشر ناقص تمنية، بيساوي تلاتة. وأربعة ناقص أربعة، يساوي صفر.

وبكده هتكون انتهت عملية القسمة؛ لأن التلاتة مش هينفع نرجع نقسمها على الستة؛ لأنها أصغر. ودلوقتي نقدر نقول إنه خارج القسمة بيساوي العدد تمنية وتمانين. أمّا الباقي بيساوي تلاتة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.