فيديو: طرح الأعداد المكونة من رقمين مع استخدام إعادة التسمية

سوزان فائق

يوضح الفيديو كيفية استخدام إعادة التسمية في طرح العدد المكوَّن من رقمين، ويوضح مفهوم الفرق، وكيفية حل مسائل من حياتنا.

٠٦:٤٥

‏نسخة الفيديو النصية

في الفيديو ده هنتكلّم على طرح الأعداد المكوّنة من رقمين، مع استخدام إعادة التسمية. هنعرف إمتى بنستخدم إعادة التسمية. وهنعرف يعني إيه الفرق، وإزّاي بنستخدم الطرح في أمثلة من حياتنا العملية. في بعض الأحيان بنبقى عايزين نوجد ناتج طرح عددين، زي مثلًا خمسة وتلاتين ناقص عشرة. دول عددين كل واحد فيهم مكوّن من رقمين. علشان نطرحهم بنرتّبهم فوق بعض كده؛ بحيث إن كل خانة تحتها الخانة اللي زيها بالظبط. يعني الخمسة في الآحاد تحتها الصفر في الآحاد. والتلاتة في العشرات تحتها الواحد في العشرات. وبنطرحهم من بعض عن طريق إن إحنا نطرح … الصفر ننقصها من الخمسة؛ يعني هتبقى خمسة. والواحد هننقصه مِ التلاتة يبقى اتنين. يبقى ناتج طرح الخمسة وتلاتين ناقص العشرة بيساوي الخمسة وعشرين. بنبدأ بطرح الآحاد وبعد كده طرح العشرات.

هنا طرحنا بسهولة الصفر من الخمسة والواحد من التلاتة؛ لأن الخمسة أكبر من الصفر، والتلاتة أكبر من الواحد. لكن في بعض الأحيان بيبقى العدد اللي موجود في الآحاد هنا زي التسعتاشر اللي عايزين ننقصها من السبعة وعشرين، التسعة أكبر من السبعة. فبالتالي ما بينفعش نستخدم الطريقة دي، وبنستخدم طريقة تانية اسمها إعادة التسمية.

إعادة التسمية دي يعني السبعة وعشرين لمّا هنطرح منها التسعتاشر هنا، محتاجين إن التسعة علشان ننقّصها من السبعة لازم السبعة تكون أكبر. فبنستلف لها من الرقم اللي في الخانة الأكبر اللي هي خانة العشرات اللي فيها الاتنين. الاتنين اللي في العشرات دي لو استلفنا منها، كل واحد فيها بيمثّل عشرة زي ما إحنا شايفين كده. لو مثّلنا السبعة وعشرين عبارة عن سبع مربعات، والعشرين عبارة عن عشرين مربع، كل واحد من مربعات العشرات فيه عشرة. ده واحد، وده واحد. هنستلف من الاتنين هنا واحد، يبقى هنستلف عشر مربعات ونضيفهم على السبعة. هيبقى بالشكل ده؛ الاتنين هتبقى واحد، والسبعة هتبقى سبعتاشر؛ لأن إحنا هننقل العشرة دول هنا.

فالكلام ده هنعمله في عملية الطرح إزّاي. إن السبعة هنستلف واحد من الاتنين، فتبقى واحد. والسبعة تبقى سبعتاشر. وبعدين سبعتاشر ناقص التسعة هتبقى تمنية. وهيبقى الواحد اللي في العشرات هننقص منها الواحد في العشرات في العدد التاني. يبقى واحد ناقص الواحد هتبقى صفر. وبالتالي ناتج طرح السبعة وعشرين ناقص تسعتاشر هيساوي تمنية.

نشوف أمثلة من حياتنا العملية: لدى أحمد أربعة وخمسين كرة زجاجية. فإذا أضاع منها تمنتاشر كرة، فكم كرة تبقى معه؟

هنا عاوزين نوجد ناتج طرح التمنتاشر من الأربعة وخمسين. يبقى أربعة وخمسين ناقص تمنتاشر هتساوي كام؟ هنرتب الأربعة وخمسين تحتها التمنتاشر؛ بحيث إن الآحاد تحتها الآحاد، والعشرات تحتها العشرات، وبعدين نطرح. هنا أربعة ناقص التمنية مش هتنفع، هنستلف من الخانة اللي بعدها واحد، فهتبقى أربعة. والأربعة هتزيد العشرة اللي استلفناهم من واحد اللي موجود في العشرات، فهتبقى أربعتاشر. وبالتالي هنطرح أربعتاشر ناقص التمنية هتبقى ستة. وبعد كده نشوف خانة العشرات، الأربعة ناقص الواحد هتبقى تلاتة. يبقى أربعة وخمسين ناقص تمنتاشر ستة وتلاتين. يبقى تبقّى مع أحمد ستة وتلاتين كرة.

في مثال كمان بيقول لنا: لدى منى أربعة وخمسين جنيه، ولدى إيمان ستة وأربعين جنيه. ما الفرق بينهما؟

إيه الفرق؛ يعني معناها إن إحنا هنطرح العددين من بعض. يبقى الكبير أربعة وخمسين، ناقص الصغير ستة وأربعين، هيساوي كام؟ هنرتّب العددين فوق بعض؛ بحيث إن كل خانة تحتها الخانة اللي زيها بالظبط. وأول خطوة عندنا هنطرح الآحاد من الآحاد يبقى الأربعة ناقص الستة، ما ينفعش، هنستلف من الخمسة واحد، فهتبقى أربعة. والواحد هتروح للأربعة اللي في الآحاد هتخليها أربعتاشر. يبقى أربعتاشر ناقص الستة هتبقى تمنية. والأربعة ناقص الأربعة هيبقى صفر. يبقى الفرق ما بينهم هو تمن جنيهات.

هنشوف مثال كمان. في المثال تلاتة وستين علبة من العصير، ستة وتلاتين منهم بطعم البرتقال. فما عدد العلب بالأطعمة الأخرى؟

يعني هنطرح الستة وتلاتين من التلاتة وستين. يبقى تلاتة وستين ناقص ستة وتلاتين هتساوي كام؟ هنرتّب التلاتة وستين تحتها الستة وتلاتين؛ بحيث إن كل خانة تحتها الخانة اللي زيها. أول خطوة هنطرح الآحاد ناقص الآحاد، يبقى التلاتة ناقص الستة، مش هينفع. هنستلف من الستة اللي في خانة العشرات واحد، فهنخليها خمسة. والتلاتة اللي في الآحاد هتبقى تلتاشر. يبقى التلتاشر ناقص الستة سبعة. والخمسة ناقص التلاتة هتبقى اتنين. يبقى تلاتة وستين ناقص ستة وتلاتين هتساوي سبعة وعشرين. يبقى عدد العلب بالأطعمة الأخرى هو سبعة وعشرين.

اتكلمنا في الفيديو ده عن طرح الأعداد المكوّنة من رقمين مع استخدام إعادة التسمية. وعرفنا إن مفهوم الفرق هو بالضبط مفهوم طرح العددين. واتكلمنا على أمثلة من حياتنا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.