فيديو: حل المسائل التي تتضمَّن الفائدة البسيطة

يتناول الفيديو تعريف الفائدة البسيطة والعلاقة المستخدمة لحسابها، و التطبيق على ذلك من خلال أمثلة متنوعة.

٠٨:٥٥

‏نسخة الفيديو النصية

هنتعلم في الفيديو ده حل المسائل اللي بتتضمن الفائدة البسيطة، وهنتعرف على تعريف الفائدة البسيطة وإزاي بنقدر نحسبها. لو معانا مبلغ من المال عايزين نحطه في البنك هنروح ونعمل إيداع، بعد فترة ما هنشوف المبلغ اللي معانا بقى قد إيه؛ هنلاحظ إن حصل فيه زيادة، الزيادة دي سببها الفائدة اللي استحقها المبلغ اللي حطيناه في البنك نتيجة استثمار البنك للمبلغ ده، والفائدة دي إحنا اللي بنستحقها على المبلغ اللي حطيناه في البنك نظير استثمار. أما لو حصل العكس واحتجنا إن إحنا نقترض مبلغ من البنك أو نسحب مبلغ، لما نيجي نسدد المبلغ ده للبنك مش بس هنسدد أصل المبلغ اللي تم اقتراضه، لا إحنا هنسدد كمان بالإضافة ليه مبلغ إضافي اللي هو الفائدة، واللي بيستحقها المرة دي البنك مقابل استخدام المال اللي تم اقتراضه.

دلوقتي بقى نقدر نستنتج مجموعة التعريفات لبعض المصطلحات اللي هنحتاجها لحساب الفائدة اللي هي الفائدة البسيطة، يبقى نقدر نعرَّف المبلغ المستثمَر على إن هو المبلغ الذي تم إيداعه أو اقتراضه، ونقدر نعرَّف الفائدة البسيطة على إنها المبلغ المدفوع أو المكتسَب مقابل استخدام المال، وبنقدر نحسب الفايدة البسيطة من العلاقة اللي قدامنا دي، الفايدة البسيطة بتبقى بتساوي حاصل ضرب المبلغ المستثمَر في معدل الفايدة السنوية مكتوب على صورة عدد عشري، في الزمن اللي مر بالسنوات؛ هنرمز للفايدة البسيطة بالرمز ف، والمبلغ المستثمر بالرمز أ، ومعدل الفايدة السنوية بالرمز م، والزمن بالسنوات بالرمز ن؛ ففي الحالة دي نقدر نستخدم الصيغة ف بتساوي أ في م في ن.

ودلوقتي هنشوف من خلال بعض الأمثلة إزاي بنقدر نحسب الفائدة المكتسبة. إذا كان أحمد لديه في حسابه خمسمية وتمانين جنيهًا تستحق فائدة سنوية بسيطة بمعدل تلتاشر في المية سنويًّا، ما مقدار الفائدة المستحقة في نهاية المدد التالية: خمسة سنوات، المدة اللي بعد كده ستة أشهر.

هنرجع للعلاقة اللي استخدمناها لحساب الفائدة البسيطة؛ الفائدة البسيطة اللي هي ف هتبقى بتساوي أ المبلغ المستثمر اللي هو عبارة عن خمسمية وتمانين جنيه اللي هما لدى أحمد في البنك، هنضربهم في معدل الفايدة السنوية اللي هو تلتاشر في المية، بس هنكتبه على صورة عدد عشري، تلتاشر في المية هي بتكافئ تلتاشر على مية يعني بتكافئ عدد عشري تلتاشر من مية، وبعدين هنضرب في الزمن بالسنوات، المدة الزمنية المحددة عندنا هي خمس سنوات، يبقى هنضرب في خمسة، بإجراء عمليات الضرب دي هنحصل على الناتج تلتمية سبعة وسبعين وبكده قدرنا نستنتج الفائدة اللي هيستحقها أحمد في نهاية المدة اللي هي محدَّدة بخمس سنوات واللي قيمتها هتبقى تلتمية سبعة وسبعين جنيهًا. باستخدام نفس العلاقة نقدر نحسب الفائدة المستحَقة بعد مرور ستة أشهر، الفائدة المطلوب حسابها هنا رأس المال هو هو نقدر نعوَّض عنه بخمسمية وتمانين اللي هما خمسمية وتمانين جنيهًا، في معدل الفايدة السنوية هو نفسه برضو تلتاشر من مية، أما الزمن بالسنوات إحنا عندنا دلوقتي الزمن المطلوب حساب الفايدة بعده هو ستة أشهر، إحنا المفروض في العلاقة دي بنعوّض عن الزمن بالسنوات، طب ستة أشهر دول عبارة عن نص السنة؛ لأن السنة اتناشر شهر فيبقى الستة أشهر عبارة عن نصف سنة، يعني كده قدرنا نستنتج الفائدة البسيطة اللي هيستحقها المبلغ اللي هيودعه أحمد في البنك بعد مرور ستة أشهر، واللي هتبقى سبعة وتلاتين وسبعة من عشرة جنيهًا.

هنشوف إزاي دلوقتي بنقدر نستخدم نفس العلاقة اللي بنحسب منها الفايدة البسيطة دي عشان نحسب منها الفائدة المستحقة علينا. بنقدر نستخدم نفس العلاقة لحساب الفايدة المستحَقة بس ف المرة دي بتبقى فائدة مستحَقة، أما أ بيبقى المبلغ المقترَض، م هو معدل الفائدة السنوية اللي بنكتبه على شكل عدد عشري، ون هو الزمن بالسنوات، وهنشوف دلوقتي في المثال اللي جاي إزاي بنقدر نحسب الفائدة المستحَقة على المبلغ المقترض. لو عرفنا إن أحمد اقترض من البنك مبلغ ستلاف وتلتمية جنيه، إذا كان معدل الفائدة السنوية البسيطة هو ستة في المية سنويًّا فما مقدار الفائدة المستحَقة إذا كانت مدة سداد القرض هي سنتين؟ هنستخدم العلاقة اللي بنحسب منها الفائدة البسيطة، سواء كانت الفايدة دي فائدة مكتَسَبة أو فائدة مستحقة، في الحالة اللي عندنا دي إحنا بنحسب الفائدة المستحقة، دلوقتي هنحسب ف الفائدة المستحقة، وهنعوّض عن أ اللي هو المبلغ المقترَض بستلاف وتلتمية جنيه، وهنضرب في معدل الفائدة السنوية اللي هو ستة في المية مُعطى عندنا في المسألة، بس هنكتبه على صورة العدد العشري المكافئ؛ ستة من مية عبارة عن ستة على مية اللي هي نقدر نكتبها على صورة العدد العشري ستة من مية، بعدين هنضرب في الزمن بالسنوات المدة اللي المفروض هيتم سداد القرض عليه هي سنتين يعني هنضرب في اتنين. بإجراء عمليه الضرب هنحصل على سبعمية ستة وخمسين دلوقتي قدرنا نستنتج إن الفائدة المستحقة على أحمد هتبقى سبعمية ستة وخمسين جنيهًا نظير استخدامه للمال اللي اقترضه من البنك لمدة سنتين.

هنكمل ونشوف مثال آخر المثال ده عرفنا إن كريم اشترى قطع غيار لسيارته بسعر تسعمية جنيه باستخدام بطاقة الائتمان الخاصة به، علمًا بأنه يتم احتساب نسبة مئوية للفائدة البسيطة على المبالغ المدفوعة بواسطتها قيمتها تسعتاشر في المية، ما مقدار المبلغ المَدِين به بعد مرور شهر؟ عشان نقدر نحسب المبلغ المدين بيه بعد مرور شهر محتاجين نحسب الأول الفائدة المستحَقة عليه بعد مرور شهر، والفائدة المستحقة هتبقى بتساوي أصل المبلغ المقترَض اللي هو تسعمية جنيه في النسبة المئوية للفايدة البسيطة سنويًّا اللي هي تسعتاشر في المية بس هنكتبها على صورة العدد العشري المكافئ، تسعتاشر في المية هتبقى تسعتاشر من مية، في ن اللي هي الزمن بالسنوات؛ إحنا عدَّا عندنا شهر واحد، شهر واحد نقدر نكتبه إنه واحد على اتناشر من السنة. بإجراء عملية الضرب هنحصل على الناتج أربعتاشر وخمسة وعشرين من مية جنيهًا، ده هيبقى مقدار الفائدة المستحقة بعد مرور شهر، دلوقتي إحنا محتاجين نعرف هيبقى مدين بمبلغ قد إيه بعد مرور الشهر ده؟ هيبقي مدين بأصل المبلغ زائد الفائدة المستحقة؛ يبقى نقدر نقول إن مقدار الدَّيْن هيبقى بيساوي أصل المبلغ اللي هو كان تسعمية جنيهًا زائد الفائدة المستحَقة اللي حسبناها بأربعتاشر وخمسة وعشرين من مية. يبقى كده بجمع المبلغين على بعض هيطلع الناتج تسعمية وأربعتاشر وخمسة وعشرين من مية جنيهًا، ده هيبقى مقدار الدين اللي المفروض إنه هيبقى مدين بيه بعد مرور شهر. ناخد بالنا من حاجة مهمة إن المدة الزمنية اللي موجودة في العلاقة اللي بنحسب منها الفائدة البسيطة هي المدة الزمنية بالسنوات، أما لو المدة اللي مُعطاة عندنا في المسألة بالأشهر، هنحولها لما يكافئها بالسنوات.

اتعلمنا في الفيديو ده العلاقة اللي بنحسب منها الفايدة البسيطة سواء كانت فايدة مكتسبة أو فايدة مستحقة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.