فيديو: الشغل، والطاقة، والقدرة للإنسان

عدّاء كتلته 80kg يتسارع من السكون حتى سرعة 12.0m/s خلال 2.90s. ما متوسط القدرة الناتجة من العدّاء بالوات؟ ما متوسط القدرة الناتجة من العدّاء بالحصان المتري؟ 1hp = 735.5W

٠٢:٢٧

‏نسخة الفيديو النصية

عدّاء كتلته تمانين كيلوجرام، يتسارع من السكون حتى سرعة اتناشر متر على الثانية، خلال اتنين وتسعين من المية ثانية. ما متوسط القدرة الناتجة من العدّاء بالوات؟ ما متوسط القدرة الناتجة من العدّاء بالحصان المتري؟ واحد حصان يساوي سبعمية خمسة وتلاتين وخمسة من العشرة وات.

فالعدّاء اللي كتلته تمانين كيلوجرام، تسارَع من السكون، لحدّ ما وصل لسرعة نهائية بتساوي اتناشر متر على الثانية. خلال زمن بيساوي اتنين وتسعة من العشرة ثانية. والمطلوب منّنا إن إحنا نحسب متوسط القدرة الناتجة من العدّاء ده. سواءً بِالوات، أو بالحصان المتري.

فمتوسط القدرة هو عبارة عن الفرق في الطاقة، مقسوم على الفرق في الزمن. والفرق في الطاقة ده، هو عبارة عن التغير في طاقة الحركة، زائد التغير في طاقة الوضع. وبما إن العدّاء بتاعنا كان ماشي في مسار أفقي، يعني ارتفاعه ما اتغيّرش. فنقدر نقول إن التغيّر في طاقة الوضع بتاعته، كانت بصفر.

أمّا بالنسبة للتغير في طاقة الحركة، فهنلاقيه بيساوي نص في الكتلة في السرعة النهائية تربيع، ناقص نص في الكتلة في السرعة الابتدائية تربيع. وبما إن العداء ابتدا من السكون، فده معناه إن السرعة الابتدائية كانت بصفر. ولمّا نعوّض بالقيم، هنلاقي إن التغيّر في الطاقة، كان بيساوي نص في تمانين كيلوجرام في اتناشر متر على الثانية تربيع.

نقدر دلوقتي نعوّض بقيمة التغير في الطاقة، في المعادلة بتاعة متوسط القدرة. فهنطلّع إن متوسط القدرة بيساوي نص في تمانين كيلوجرام في اتناشر متر على الثانية تربيع، مقسومين على اتنين وتسعة من العشرة ثانية. اللي هو الزمن اللي خده العدّاء علشان يوصل للسرعة النهائية دي. فده هيطلّع لنا إن المتوسط القدرة، تقريبًا بتساوي ألف تسعمية وتسعين كيلوجرام متر تربيع على الثانية تربيع، مقسومين على الثانية.

ووحدة الكيلوجرام متر تربيع على الثانية تربيع دي، هي وحدة الجول. فنقدر نعوّض مكان البسط، بِجول. وجول على ثانية هي وحدة الوات. فنقدر نشيل الوحدة دي كلها، ونحطّ وات. وبكده نبقى جِبنا المطلوب الأول، وهو متوسط القدرة بالوات.

وعلشان نحوّل الوحدة للحصان المتري، هنقول إن الواحد حصان بيساوي سبعمية خمسة وتلاتين ونص وات. يعني الوات بيساوي واحد على سبعمية خمسة وتلاتين ونص حصان. فنقدر كده في القيمة بتاعة متوسط القدرة، نعوّض مكان الوات، بواحد على سبعمية خمسة وتلاتين ونص حصان. ونطلّع إن متوسط القدرة بيساوي اتنين وسبعة من العشرة حصان.

وبكده نبقى عرفنا نجيب المطلوب التاني، وهو قيمة متوسط القدرة، ولكن بالحصان المتري.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.