فيديو: استخدام ترتيب العمليات لإيجاد قيم التعبيرات العددية التي تتضمن أسسًا

احسب (٥ + ١٠)^٢ ÷ ٥.

٠١:٥٢

‏نسخة الفيديو النصية

احسب خمسة زائد عشرة الكل أس اتنين، على خمسة.

وعشان نوجد قيمة المقدار اللي عندنا ده، خلينا في الأول نفتكر ترتيب العمليات، وكانت أول خطوة عندنا في ترتيب العمليات هي الأقواس؛ يعني بنحل العمليات اللي ما بداخل الأقواس، تاني حاجة هي الأسس؛ يعني بنحسب القيم أو الأعداد اللي مرفوعة لأسس، وتالت خطوة هي إننا بنحل عمليات الضرب والقسمة، وآخر حاجة في ترتيب العمليات هي إننا بنقوم بعمل عمليات الجمع والطرح.

فلمّا نيجي نشوف المقدار اللي عندنا، هنلاحظ إننا عندنا أقواس، وزي ما عرفنا أول حاجة بنعملها إننا بنحل العمليات اللي داخل الأقواس، فهيبقى المقدار بيساوي … وأول حاجة هنعملها هنحسب ما بداخل القوسين؛ يعني هنجمع خمسة زائد عشرة واللي هتساوي خمستاشر. بما إن ما بداخل الأقواس كان مرفوع للأس اتنين؛ فبالتالي هتبقى خمستاشر مرفوعة للأس اتنين، وهنكتب باقي المقدار زي ما هو، فكده يبقى إحنا عملنا أول خطوة وهي الأقواس.

بعد كده هيبقى عندنا الأسس، فهنلاحظ إن العدد خمستاشر مرفوع للأس اتنين، فأول حاجة هنبدأ نحسبه، فخمستاشر أس اتنين لمّا نحسبها هتبقى بتساوي ميتين خمسة وعشرين، وهنكتب باقي المقدار زي ما هو فهيبقى المقدار ميتين خمسة وعشرين على خمسة، فكده يبقى إحنا عملنا تاني خطوة واللي هي الأسس.

فبعد كده هنلاحظ إن المقدار بقى عبارة عن عملية قسمة، فهنبدأ نحسبها، فهيبقى المقدار بيساوي ميتين خمسة وعشرين على خمسة، ولمّا نحسبها هتبقى بتساوي خمسة وأربعين؛ وكده يبقى عملنا تالت خطوة اللي هي عملية الضرب والقسمة، وبالتالي مش هيبقى عندنا جمع وطرح، فالخطوة دي مش موجودة. فبالتالي يبقى إحنا كده قدرنا نحسب قيمة المقدار، واللي هتبقى بتساوي خمسة وأربعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.