فيديو: الشبكات وعمليات الضرب

يوضح الفيديو ما الضرب، وكيفية استخدام الشبكات لإيجاد ناتج الضرب، وما خاصية الإبدال، وأمثلةً عليها.

٠٥:٣٢

‏نسخة الفيديو النصية

دلوقتي هنتكلّم عن الشبكات وعملية الضرب. هنتعلّم إزاي نستعمل الشبكات، لإيجاد ناتج الضرب. إيه هو الضرب؟ الضرب هو عملية على عددين، يمكن وصفها بإنها جمع متكرر. والإشارة دي معناها الضرب. دلوقتي هبتدي الشرح بالمثال التالي.

لو أقامت ليلى حفلة. ورتّبت أكواب العصير في تلات صفوف. وحطّت في كل صف خمس أكواب. ما عدد الأكواب كلها؟

عشان أجيب عدد الأكواب كلها، ممكن أستعمل قطع العدّ، لعمل شبكة. الصف الأولاني هيكون فيه خمس أكواب. والصف التاني برضو خمس أكواب. والصف التالت خمس أكواب. وبكده أكون عملت شبكة باستعمال قطع العدّ.

هنلاحظ إنه عشان أجيب عدد الأكواب كلها، ممكن أستعمل طريقة من اتنين. بما إنه الشبكة مكوّنة من تلات صفوف. وفي كل صف خمس أكواب. أقدر أقول إنه عدد الأكواب كلها هيساوي خمسة زائد خمسة زائد خمسة. يعني هيساوي خمستاشر.

باستعمال الضرب، برضو بما إن الشبكة مكوّنة من تلات صفوف. وفي كل صف خمس أكواب. يعني أقدر أقول إنه عدد الأكواب هيساوي تلاتة في خمسة. يعني هيساوي خمستاشر.

هنلاحظ إنه ترتيب الأكواب في صفوف متساوية، وأعمدة متساوية؛ بتسمى شبكة. وبتساعد على إن إحنا نجيب ناتج الضرب. والأعداد اللي بيتمّ ضربها، بتسمى عوامل. يعني تلاتة وخمسة، عوامل. والعدد الناتج بيسمى ناتج الضرب. يعني خمستاشر هو ناتج الضرب.

وبما إنه تُظهر الشبكة تلات صفوف، زيّ ما هو موضّح قدامي. وفي كل صف خمس قطع. وبالتالي أقدر أقول إنه جملة الضرب هي: تلاتة في خمسة هتساوي خمستاشر. يعني عدد الأكواب في تلات مجموعات متساوية، في كل منها خمس أكواب، بيساوي خمستاشر.

هنكمّل في الصفحة اللي جايّة. دلوقتي هنتكلّم عن خاصية الإبدال. هنلاحظ إنه خاصية الإبدال لعملية الضرب، معناها إنه تغيير ترتيب الأعداد المضروبة، لا يغيّر ناتج الضرب. يعني مثلًا أربعة في تلاتة، هيساوي اتناشر. لو أنا غيّرت ترتيب الأعداد المضروبة. يعني بقى تلاتة في أربعة. فإن الناتج هيفضل برضو اتناشر، زيّ ما هو موضّح قدامي.

هناخد مثال عَ الكلام ده. إذا كان عند سعاد ألبوم صور. بيمثّل الشكل المجاور إحدى صفحات الألبوم. اكتب جملتَي ضرب لإيجاد عدد الصور في كل صفحة.

وبكده عشان أكتب جملتَي ضرب، هحلّ بطريقتين. الطريقة الأولى: هقول إن عندي أربع صفوف، في كل صفّ صورتين. وبكده أقدر أقول إنه عدد الصفوف هو أربعة، في العدد في كل صف هو اتنين؛ هيساوي تمنية. يعني العدد الكلي تمنية.

الطريقة التانية عشان أجيب جملة الضرب التانية. هقول إن عندي صفين، وفي كل صف أربع صور. وبكده أقدر أقول إنه عدد الصفوف هو اتنين، في العدد في كل صف وهو أربعة. يعني العدد الكلي هيساوي تمنية. وبكده أكون كتبت جملتَي الضرب، عشان أجيب عدد الصور في كل صفحة.

هنكمّل في الصفحة اللي جايّة. تدريبات: اكتب جملة ضرب مناسبة. هنلاحظ إنه في الشكل الأولاني، عندي صفين. في كل صف فيه ست قلوب. وبكده أقدر أقول إن جملة الضرب هي: اتنين في ستة هيساوي اتناشر.

رقم اتنين: اكتب جملتَي ضرب، لإيجاد عدد الأعلام مع خمس أطفال. إذا كان كل طفل يحمل علمين. هنلاحظ من الصورة، إن كل طفل ماسك علمين. وبكده أقدر أقول إن جملة الضرب الأولى هي: عدد الأطفال وهو خمسة، في عدد الأعلام اللي مع كل طفل وهو اتنين. يعني خمسة في اتنين هيساوي عشر أعلام.

وبكده أقدر أقول إن جملة الضرب التانية، أقدر أحصل عليها باستعمال خاصية الإبدال. وهي إنه لمّا بغيّر ترتيب الأعداد، ناتج الضرب مش هيتغيّر. يعني جملة الضرب التانية هي: اتنين في خمسة، هتساوي نفس الناتج، وهو عشرة.

رقم تلاتة: استعمل خاصية الإبدال، واكتب العدد المناسب في المربع.

خمسة في اتنين هيساوي عشرة. وبكده أقدر أقول إن اتنين في خمسة، هيساوي عشرة. تلاتة في تسعة هيساوي سبعة وعشرين. وبكده أقدر أقول إن تسعة في تلاتة، هيساوي نفس الناتج، وهو سبعة وعشرين.

وبكده هنكون اتعلمنا إزاي نستعمل الشبكات، عشان نجيب ناتج الضرب. وعرفنا كمان إنه خاصية الإبدال لعملية الضرب، معناها إنه تغيير ترتيب الأعداد المضروبة، ما بيغيّرش ناتج الضرب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.