فيديو: عمل جدول لإيجاد قاعدة

يوضح الفيديو كيفية إيجاد قاعدة لحل المسائل باستخدام الجداول، والأنماط العددية بين المدخلات والمخرجات، وأمثلةً عليها.

٠٤:٢٣

‏نسخة الفيديو النصية

عمل جدول لإيجاد قاعدة.

في الفيديو ده، هنتعلّم إزّاي نوجد قاعدة لحلّ المسائل باستخدام الجداول. هدى تلعب بأعواد الأسنان، وبتعمل بيها أشكال مثلثات. وعدد المثلثات مقارنة بعدد الأعواد المستخدمة في صناعتها بيتّبع نمط معيّن. النمط ده هو القاعدة. القاعدة بتقول إيه اللي محتاجين نعمله في العدد الأول أو المُدخَل؛ عشان ينتج العدد التاني أو المُخرَج. طيب لو عاوزين نعرف هدى محتاجة كام عود أسنان؛ عشان تعمل خمس مثلثات، هنعمل ده إزّاي؟

نتنقل لصفحة تانية. هنرسم جدول بالشكل ده. بعدين هنحاول نوجد القاعدة. طيب دلوقتي المثلث ليه تلات أضلاع. يعني واحد في تلاتة بيساوي تلاتة. فنكتبها في الجدول: عدد المثلثات واحد، وعدد الأعواد تلاتة. طيب والمثلثين؟ لو عدّينا أضلاعهم، هنلاقيها ستة. يعني ممكن نقول: اتنين في تلاتة هيساوي ستة. فهنكتبها في الجدول: عدد المثلثات اتنين، وعدد الأضلاع أو الأعواد المستخدَمة لتكوين المثلث كان ستة. ولو تلات مثلثات، هنلاقي أضلاعهم تسعة. يعني ممكن نقول: تلاتة في تلاتة هيساوي تسعة. فنكتبها في الجدول: عدد المثلثات تلاتة، وعدد الأعواد المستخدمة تسعة.

يعني ممكن نستنتج إن القاعدة هي الضرب في تلاتة. يعني هنضرب عدد المثلثات في تلاتة؛ عشان نوجد عدد أعواد الأسنان المستخدمة في عمله. ودلوقتي نطبّق القاعدة. أربع مثلثات هنضربهم في تلاتة، يبقى هنستخدم فيهم اتناشر عود. يبقى عدد المثلثات في الجدول أربعة، وعدد الأعواد اتناشر. بعدين خمس مثلثات. يعني خمسة في تلاتة هيساوي خمستاشر. فهنكتب في الجدول: عدد المثلثات خمسة، وعدد الأعواد خمستاشر. يعني هدى محتاجة خمستاشر عود أسنان؛ عشان تعمل خمس مثلثات.

نتنقل لصفحة تانية، ونحلّ مثال تاني. عماد لقى زهرة ليها خمس أوراق. بعدين لقى زهرة تانية زيّها. فكان عدد أوراق الزهرتين عشر أوراق. فكم ورقة هتبقى في خمس أزهار لو كلّ زهرة ليها خمس أوراق؟

أول حاجة، هنرسم جدول؛ عشان يساعدنا لإيجاد القاعدة. بما إن الزهرة الواحدة ليها خمس أوراق، والزهرتين ليهم عشر أوراق، فممكن نقول: إن القاعدة هي الضرب في خمسة. يعني هنضرب عدد الأزهار في خمسة؛ عشان أوجد عدد الأوراق.

فنكمّل الجدول: لو عدد الأزهار تلاتة، يبقى تلاتة في خمسة هيساوي خمستاشر. يبقى نكتب في الجدول: خمستاشر. ولو عدد الأزهار أربعة، يبقى أربعة في خمسة هيساوي عشرين. يبقى نكتب في الجدول: عشرين. ولو عدد الأزهار خمسة، يبقى خمسة في خمسة هيساوي خمسة وعشرين. يبقى نكتب في الجدول: خمسة وعشرين. يبقى خمس أزهار هيبقى بيهم خمسة وعشرين ورقة.

وبكده نبقى خلّصنا الفيديو ده. اللي اتعلّمنا فيه إزّاي نوجد قاعدة لحلّ المسائل باستخدام الجداول.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.