فيديو: تقدير نواتج ضرب الكسور

سوزان فائق

يوضح الفيديو كيفية تقدير نواتج الكسور باستخدام الأعداد المتوافقة، ومتى نقرِّب للأعلى أو للأدنى أو للنصف، وأمثلة توضيحية.

٠٦:٠٩

‏نسخة الفيديو النصية

في الفيديو ده هنتكلّم على تقدير نواتج ضرب الكسور. يعني لو عندنا كسور مضروبة في بعض، عايزين نقدّر الناتج، وما نجيبوش بالظبط إيه. يعني إحنا عايزين نشوف شكله كده هيجيب كام. وعلشان نقدّر نواتج ضرب الكسور، هنستخدم أعداد اسمها الأعداد المتوافقة.

اللي هي إيه الأعداد المتوافقة دي؟ الأعداد المتوافقة اللي هي بنقدر نقسمها ذهنيًّا. يعني مثلًا الاتناشر على الأربعة، دي تلاتة. الخمستاشر عَ الخمسة، دي تساوي تلاتة. العشرين على الخمسة، هتساوي أربعة. ده سهل جدًّا إن إحنا نفكّر في القسمة بتاعتها على طول، ونجيب الناتج بتاعها. يبقى دي الأعداد المتوافقة اللي عندنا.

إزّاي بقى هنقدّر نواتج ضرب الكسور دي؟ يعني لو عندنا مثال … عايزين نقدّر ناتج رُبع في تلتاشر. هنستخدم الأعداد المتوافقة، بإن إحنا نشوف التلتاشر مع الأربعة، نخلّيهم عددين متوافقين. هنشوف أقرب مضاعف للمقام اللي هو الأربعة، يكون قريب للتلتاشر. يعني هنضاعف الأربعة أكتر من مرة، لغاية ما نشوف عدد قريب للتلتاشر.

لو إحنا ضاعفنا الأربعة، هنلاقي إن اتناشر هو أقرب عدد للتلتاشر. فبدل ما كنا هنضرب رُبع في تلتاشر، هنضرب رُبع في اتناشر. يبقى معنى كده الكسرين دول هنعرف نضربهم. الاتناشر هنختصرها مع الأربعة، هتبقى تلاتة. وهنا واحد، يعني ناتج الضرب ده هيبقى تلاتة. وبكده الرُّبع في تلتاشر، هتساوي تقريبًا تلاتة. ويبقى هو ده ناتج تقدير قيمة الضرب ده.

ناخد مثال كمان. بيقول لنا قدّر … المثال بيقول: قدّر خُمسين الحداشر. يعني لو شُفنا مثلًا خُمس الحداشر … نشوف قيمتها كام كده. خُمس الحداشر هنخلّيها أعداد متوافقة. يبقى هنساوي تقريبًا … الحداشر لمّا هنضاعف الخمسة، هتبقى عشرة. يبقى خُمس في عشرة. تقريبًا الناتج هيبقى … خمسة هنختصرها مع العشرة، هتبقى اتنين. يبقى كده ناتج الخُمس في حداشر، تقريبًا يساوي اتنين.

طيب الاتنين على خمسة دي ضِعف الخُمس. يعني الاتنين على خمسة في الحداشر، تقريبًا هتساوي الناتج اللي طلع لنا فوق ده، مضروب في اتنين؛ ضعفناه. يعني اتنين في اتنين، يعني هيساوي الأربعة. يعني معنى كده إن الاتنين على خمسة في الحداشر، تقريبًا هتساوي أربعة.

نقلب الصفحة وناخد مثال كمان. المثال بيقول: قدّر ناتج تُلت في سبع أتمان. في الأمثلة اللي فاتت، كان عندنا بيبقى عندنا عدد صحيح. وكنا بنشوف الأعداد المتوافقة ما بين العدد الصحيح مع المقام. وكنا بنختصر، ونضربهم على طول. لكن في الكسور، هنضطر إن إحنا نقدّر كل كسر لوحده.

لو جينا مثلًا هنشوف التُّلت، قريبة للصفر ولّا نص ولّا الواحد. والسبع أتمان قريبة للصفر ولّا نص ولّا الواحد. وهناخد حاجة من التلاتة. طيب نحطّهم على خط الأعداد كده ونشوف. التُّلت مثلًا قريبة لهنا كده يعني تُلت. والسبع أتمان هنا. يبقى السبع أتمان هتبقى قريبة للواحد. والتُّلت هتبقى قريبة للنص. يبقى كده قيمة الضرب تُلت في سبعة على تمنية، هتساوي تقريبًا … التُّلت هنقرّبها للنص. والسبع أتمان هنقرّبها للواحد. يعني قيمة الضرب ده هتساوي تقريبًا نص.

ناخد مثال كمان. المثال بيقول: قدّر مساحة حوض الأزهار الموضّح في الشكل. اللي هو الطول بتاعه خمسة وسبع أتمان متر. والعرض بتاعه اتنين وتُلت متر. يعني المساحة هتساوي الطول في العرض. اللي هو خمسة وسبع أتمان، في اتنين وتُلت. هنقرّب كل عدد صحيح، حسب قاعدة التقريب. اللي هي بتقول … هنكتبها هنا في الجنب. اللي هي بنقرّب إلى أعلى، لو البسط أقرب كثيرًا للمقام. يعني بنقرّب للعدد الصحيح التاني، لو كان البسط قريب جدًّا للمقام. أو نقرّب إلى أدنى، لو البسط بعيد جدًّا عن المقام. أو بنقرّب لنص، لو البسط قريب من نصف المقام.

طيب نشوف الحالة الأولانية، اللي هي خمسة وسبع أتمان. هنلاقي إن البسط قريب للمقام. يبقى هنقرّب العدد الصحيح التاني، اللي هو ستة. والاتنين وتُلت؛ التُّلت … الواحد بعيد عن التلاتة. يبقى هنقرّبه للأقل. يعني الاتنين وتُلت هنقرّبها للاتنين. يبقى بدل ما كنا بنضرب خمسة وسبع أتمان في اتنين وتُلت، هنضرب ستة في اتنين. والناتج هيساوي تقريبًا اتناشر. يعني المساحة هتساوي تقريبًا اتناشر متر مربع.

يبقى اتكلمنا في الفيديو ده عن تقدير نواتج ضرب الكسور. لو عندنا كسر في عدد صحيح، هنستخدم الأعداد المتوافقة. لو عندنا كسرين، هنشوف إيه الكسرين دول؛ قريبين للواحد ولّا الصفر ولّا النص. الحالة التالتة، لو عندنا عددين كسريين، هنطبّق القاعدة بتاعة التقريب. اللي هي بتقول هنقرّب إلى أعلى، أو نقرّب إلى أدنى، أو نقرّب إلى نص.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.