فيديو: قوى المقادير الأحادية الحد‎‎

يوضح الفيديو قوى القوى؛ أي أن تكون قوة عدد مرفوعة لأس، وأنة في حالة ضرب أكثر من عامل مرفوعًا لنفس الأس، تُوجَد قوة كل عامل ثم تُضرَب.

٠٩:٣٧

‏نسخة الفيديو النصية

قوى المقادير الآحادية الحدّ.

في الفيديو ده هنتكلّم عن قوى المقادير الآحادية الحدّ، اللي ليها قوى، أو قوى القوى. إذا كان فيه مكعب، طول ضلعه يساوي اتنين تربيع سنتيمتر. فإزّاي نحسب حجمه؟

حجم المكعب بيساوي طول الضلع تكعيب. فده هيساوي اتنين تربيع، الكل تكعيب. واتنين تربيع الكل تكعيب، بيساوي اتنين تربيع، في اتنين تربيع، في اتنين تربيع. وبما إن الأساسات مشتركة، وبتفصل ما بينهم عمليات ضرب، يبقى ده هيساوي اتنين أس، اتنين زائد اتنين زائد اتنين. يعني جمعنا أُسس التلات أعداد. فده هيساوي اتنين أُس ستة.

لو لاحظنا، هنلاقي إن بالنسبة لطول الضلع، فقوة العدد اتنين، هي اتنين. وبالنسبة للحجم ككل، فقوة طول الضلع، هي تلاتة. يعني اتنين أس اتنين الكل تكعيب، كانت بتساوي اتنين أس، اتنين في تلاتة. اللي هي في الآخر بقت اتنين أس ستة. فممكن نقول إن عشان نوجد قوى القوى، بنضرب الأسس في بعضها.

فمثلًا ستة أس أربعة الكل أس خمسة، هيساوي ستة أس، أربعة في خمسة. اللي هو هيساوي ستة أس عشرين. وممكن نعبّر عن القاعدة بشكل جبري، بإننا نقول س أس أ، الكل أس ب، بيساوي س أس، أ في ب.

تمنية أس أربعة، الكل أس تلاتة. ده معناه إننا عاوزين نوجد القوة التالتة، للقوة الرابعة، للعدد تمنية. ففي الحالة دي، بنضرب الأسس. فده هيساوي تمنية أس، أربعة في تلاتة. اللي هو هيساوي تمنية أس اتناشر.

بسّط ك أس سبعة، الكل أس خمسة. ك أس سبعة الكل أس خمسة، يعني عاوزين نوجد القوة الخامسة، للقوة السابعة، لِـ ك. فده هيساوي ك أس، سبعة في خمسة. اللي هو بيساوي ك أس خمسة وتلاتين.

في حالة وجود قوة لحاصل ضرب أحد عوامله ليه قوة، فالقوة بتكون على العوامل المضروبة كلها. يعني مثلًا تلاتة في أ أس أربعة، الكل أس خمسة. بيساوي تلاتة في أ أس أربعة، في تلاتة في أ أس أربعة، في تلاتة في أ أس أربعة، في تلاتة في أ أس أربعة، في تلاتة في أ أس أربعة.

فهنفصل العوامل العددية، عن العوامل الجبرية. فده هيساوي تلاتة في تلاتة في تلاتة في تلاتة في تلاتة. في أ أس أربعة، في أ أس أربعة، في أ أس أربعة، في أ أس أربعة، في أ أس أربعة. يعني ممكن نعبّر عن ده بإننا نقول إن هو بيساوي تلاتة أس خمسة في، أ أس أربعة الكل أس خمسة. يعني الخمسة كانت أس للتلاتة، وكانت أس للـ أ أس أربعة.

ده هيساوي … تلاتة أس خمسة بتساوي ميتين وتلاتة وأربعين. في أ أس أربعة، أس خمسة؛ يعني في أ أس، أربعة في خمسة. وده هيساوي ميتين تلاتة وأربعين، في أ أس عشرين. يبقى لإيجاد قوة حاصل ضرب، بنوجد قوة كل عامل لوحده، وبعدين بنضرب. وممكن نعبّر عن الكلام ده بشكل جبري، بإننا نقول: إن أ في ب الكل أس م، بيساوي أ أس م، في ب أس م.

أربعة في ن تكعيب، الكل أس أربعة. هتساوي أربعة أس أربعة، في ن تكعيب أس أربعة. وده هيساوي أربعة أس أربعة، في ن أس، تلاتة في أربعة. وده هيساوي … أربعة أس أربعة، هتساوي ميتين وستة وخمسين. في ن … أس تلاتة في أربعة، يعني أس اتناشر.

لو عاوزين نوضح الإجابة أكتر أو نفصّلها، ممكن نقول إن أربعة في ن تكعيب، الكل أس أربعة. هتساوي أربعة في ن تكعيب، في أربعة في ن تكعيب، في أربعة في ن تكعيب، في أربعة في ن تكعيب. فده هيساوي أربعة، في أربعة، في أربعة، في أربعة. في ن تكعيب، في ن تكعيب، في ن تكعيب، في ن تكعيب.

وده هيساوي أربعة، في أربعة، في أربعة، في أربعة. في … ن تكعيب هتبقى ن، في ن، في ن. في ن، في ن، في ن. في ن، في ن، في ن. في ن، في ن، في ن.

هنلاقي إن العدد أربعة متكرر في عملية الضرب أربع مرات. يبقى ده هيساوي أربعة أس أربعة. في … هنلاقي إن الـ ن متكررة في عمليات الضرب اتناشر مرة. يعني ن أس اتناشر. وأربعة أس أربعة، بتساوي ميتين ستة وخمسين، في ن أس اتناشر.

بسّط سالب اتنين، في م أس سبعة، في ل أس ستة؛ الكل أس خمسة. سالب اتنين، في م أس سبعة، في ل أس ستة؛ الكل أس خمسة. هيساوي سالب اتنين أس خمسة. في م أس سبعة، الكل أس خمسة. في ل أس ستة، الكل أس خمسة. وده هيساوي سالب اتنين أس خمسة. في م أس، سبعة في خمسة. في ل أس، ستة في خمسة.

وده هيساوي سالب … اتنين أس خمسة، يعني سالب اتنين وتلاتين. في … م أس سبعة في خمسة، يعني م أس خمسة وتلاتين. في ل أس، ستة في خمسة، يعني في ل أس تلاتين.

عبّر عن مساحة المربع المجاور، بمقدار أُحادي الحدّ. مساحة المربع بتساوي طول الضلع تربيع. وبما إن طول الضلع سبعة، في أ أس أربعة، في ب. يبقى مساحة المربع هتساوي سبعة، في أ أس أربعة، في ب؛ الكل تربيع. فده هيساوي سبعة أس اتنين، في أ أس أربعة الكل أس اتنين، في ب أس اتنين.

ده هيساوي … سبعة تربيع، يعني تسعة وأربعين. في … أ أس أربعة أس اتنين، يعني أ أس، أربعة في اتنين. في ب تربيع. وده هيساوي تسعة وأربعين، في أ … أربعة في اتنين، يعني أس تمنية. في ب تربيع. يبقى مساحة المربع تسعة وأربعين أ أس تمنية، ب تربيع وحدة مربعة.

يبقى في الفيديو ده، اتكلمنا عن قوى القوى. يعني إنّ يكون عدد أو مقدار مرفوع لأس معيّن، ويكون المقدار ككل مرفوع لأس تاني. وعرفنا إن في حالة إن أكتر من عامل مضروبين، مرفوعين لنفس الأس، فبنوجد قوة كل عامل وبنضربه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.