فيديو: مقارنة الأعداد ضمن عشرات الألوف

يوضح الفيديو طريقتين لمقارنة الأعداد الصحيحة ضمن عشرات الألوف؛ إما باستخدام خط الأعداد أو باستخدام جدول القيم المكانية، وذلك من خلال أمثلة مختلفة.

٠٧:١٧

‏نسخة الفيديو النصية

هنعرف في الفيديو ده إزاي نقارن بين عددين ضمن عشرات الألوف. المقارنة دي بنعملها بطريقتين؛ يا إمَّا باستخدام خطّ الأعداد، أو باستخدام جدول القيم المكانية.

فمثلًا لو عندنا، زيّ المثال اللي قدامنا ده، المبنى الأول ارتفاعه خمسة وعشرين متر. والمبنى التاني ارتفاعه تمنتاشر متر. مطلوب مننا نحدّد أيهما أطول.

أمَّا بنيجي نقارن بين عددين، فيا إمَّا بيبقى العدد الأول أكبر من التاني، ودي علامة الأكبر من. أو العدد الأول بيبقى أصغر من التاني، ودي علامة أصغر من. أو العدد الأول بيساوي العدد التاني، دي علامة التساوي. وهنستخدم في المقارنة، عشان نقارن بين الارتفاعين اللي عندنا دول، ونحدّد أيهما أطول؛ هنستخدم خطّ الأعداد. هنستخدم خطّ الأعداد، ونحطّ عليه ارتفاعات المبنيين اللي عندنا.

عندنا مبنى ارتفاعه تمنتاشر، ومبنى ارتفاعه خمسة وعشرين. على خطّ الأعداد، قيمة الأعداد بتتزايد مع الاتجاه إلى اليمين. هنلاقي إن العدد خمسة وعشرين موجود على يمين العدد تمنتاشر. يعني معناها إن العدد خمسة وعشرين أكبر من تمنتاشر. ونقدر نكتبها بطريقتين: خمسة وعشرين أكبر من تمنتاشر. أو نقول: تمنتاشر أصغر من خمسة وعشرين. وكده يبقى نقدر نستنتج إن المبنى الأول هيبقى أطول من المبنى الثاني.

هنشوف دلوقتي مثال آخر، بس هنحلّه باستخدام جدول القيم المكانية. في المثال ده، هنعرف إن عائلة منى كانت بتخطّط للقيام برحلة إلى مدينة مرسى علم. وكان فيه طريقين ممكن يمشوا فيهم؛ الطريق الأول كان طوله تمنمية وأربعين كيلومتر. والطريق التاني كان طوله تمنمية خمسة وتلاتين كيلومتر. مطلوب مننا نحدّد أيّ الطريقين أقصر.

هنكتب الجدول الخاصّ بالقيم المكانية لغاية أكبر قيمة مكانية في الأعداد اللي عندنا. هنلاحظ إن الأعداد اللي عندنا، العددين بيتكوّنوا من تلات أرقام. يعني آحاد، عشرات، مئات. فهنكتب جدول أكبر قيمة مكانية فيه هي المئات. وبعدين نبتدي نحطّ كل رقم من الأرقام اللي بيتكوّن منها العدد الأول. العدد الأول تمنمية وأربعين. صفر في الآحاد، أربعة في العشرات، تمنية في المئات. العدد التاني تمنمية خمسة وتلاتين. بيتكوّن من خمسة في الآحاد، تلاتة في العشرات، وتمنية في المئات.

ولمّا بنيجي نقارن بين أيّ عددين، بنبتدي من الخانة اللي فيها أكبر قيمة مكانية. أكبر رقم وأكبر قيمة مكانية عندنا هنا هي المئات. فهنبتدي نشوف المئات في كلّ من العددين. هنلاقي إن العدد الأول فيه تمنية مئات، والتاني فيه تمنية مئات. يعني همّ دلوقتي متساويين في المئات. يبقى في المئات، لمّا جينا نقارن القيمة المكانية لخانة المئات كانوا العددين متساويين. لو جينا نقارن دلوقتي خانة العشرات، اللي هي الخانة ذات القيمة المكانية الأقلّ على طول من المئات. هنلاحظ إن العدد الأول فيه أربعة في العشرات، والتاني فيه تلاتة في العشرات. فكده يبقوا العددين مختلفين في العشرات. واحد فيه أربعة، وواحد فيه تلاتة. وطبعًا أربع عشرات أكبر من تلات عشرات.

كده خلاص مش هنكمّل مقارنة بقية الخانات اللي عندنا. قدرنا نوصل. بما إن همّ متساويين في المئات، بس مختلفين في العشرات، فقدرنا نحدّد أيّ عدد فيهم هو اللي أكبر قيمة. هيبقى هو العدد اللي خانة العشرات فيه دلوقتي أكبر من الآخر. فكده عرفنا إن تمنمية خمسة وتلاتين هيبقى أقلّ من تمنمية وأربعين. يعني قدرنا نستنتج إن الطريق التاني هيبقى أقصر.

ونقدر نتأكّد باستخدام خطّ الأعداد. فهنلاقي العدد تمنمية وأربعين على يمين العدد تمنمية خمسة وتلاتين. يعني العدد فعلًا تمنمية وأربعين أكبر من تمنمية خمسة وتلاتين. يعني بالفعل قدرنا نتأكّد إن الطريق التاني أقصر من الطريق الأول.

في المثال اللي عندنا ده، مطلوب مننا نحدّد هل خمسة آحاد، ثمانية عشرات، أربعة ألوف أصغر من ولّا يساوي ولّا أكبر من العدد ده. أربعة آلاف مية خمسة وتمانين.

هنبدأ ناخد أول عدد، ونكتبه بحسب القيم المكانية للأرقام اللي بتكوّنه. فعندنا خمس آحاد، يعني هنحطّ خمسة في خانة الآحاد. بعدين عندنا تمن عشرات، هنحطّ تمنية في خانة العشرات. هنلاحظ إن بعد كده فيه أربع ألوف. طب فين المئات؟ بما إن هو لم يذكر أيّ مئات، فده معناها إن عندنا صفر مئات. يعني هنحطّ صفر في خانة المئات. أمَّا اللي بعد كده، فعندنا أربعة ألوف. يبقى هنحطّ أربعة في خانة الألوف. هنبدأ ناخد العدد التاني، ونحط ّكلّ رقم من الأرقام بتاعته في الخانة الخاصة بالقيمة المكانية المناسبة. فعندنا الخمسة في الآحاد. تمنية في العشرات. واحد في المئات. وأربعة في خانة الألوف.

ولمّا بنيجي نقارن بين عددين، بنبتدي دايمًا المقارنة من اليسار، من الخانة اللي فيها أكبر قيمة مكانية. فأكبر قيمة مكانية عندنا هنا هي الألوف. هنبتدي نقارن بينهم في خانة الألوف. فهنلاقي العدد الأول فيه أربعة في خانة الألوف، والتاني هو كمان فيه أربعة في خانة الألوف. يبقى كده همّ متساويين في الخانة دي. بعد كده نتحرّك للخانة الأقلّ، اللي هي المئات. هنلاحظ إن العدد الأول فيه صفر في المئات، التاني فيه واحد في المئات. وطبعًا واحد مئات أكبر من صفر في المئات.

ده معناها إن العدد التاني هيبقى أكبر من العدد الأول. يعني أربعة آلاف خمسة وتمانين هتبقى أقلّ من أربعة آلاف مية خمسة وتمانين. يعني كده نقدر نقول: إن خمسة آحاد، وتمن عشرات، وأربع ألوف، اللي همّ عبارة عن العدد الأول، أقلّ من أربعة آلاف مية خمسة وتمانين، اللي هو العدد التاني.

عرفنا في الفيديو ده إزاي نقدر نقارن بين أعداد ضمن عشرات الألوف. وده بيبقى يا إمَّا باستخدام جدول القيم المكانية للمقارنة بين الأعداد. بنقارن بين أكبر قيمة مكانية. الخانة ذات أكبر قيمة مكانية بنشوف الأرقام اللي فيها. ولو تساوى فيها الأرقام اللي إحنا بنقارنها، بنتنقل للخانة ذات القيمة المكانية الأقلّ. فنفضل نقارن هكذا لغاية ما نلاقي فيه اختلاف بين الأرقام اللي بنقارنها. وبناءً عليه، بنقدر نحدّد فين الرقم الأكبر، وفين الرقم الأقلّ.

وممكن نستخدم خطّ الأعداد للمقارنة بين مجموعة من الأرقام. أو للتأكّد من ناتج المقارنة اللي وصلنا لها باستخدام جدول القيمة المكانية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.