فيديو: ضرب عدد مكوَّن من رقمين في عدد مكوَّن من رقمين باستخدام نموذج المساحة

اختر مسائل الضرب الناقصة الصحيحة وحاصل الضرب الجزئي لاستكمال نموذج المساحة. [أ] اختر عبارة الضرب الناقصة الصحيحة لاستكمال نموذج المساحة [أ] ٦٠ × ٣٤ [ب] ٦٣ × ٣٠ [ج] ٦ × ٣٠ [د] ٦٠ × ٣٠ [ﻫ] ٦٠ × ٣. [ب] أوجد حاصل الضرب الجزئي لهذه العبارة.

٠٣:٠٤

‏نسخة الفيديو النصية

اختر مسائل الضرب الناقصة الصحيحة، وحاصل الضرب الجزئي، لاستكمال نموذج المساحة.

دلوقتي فيه مطلوبين عندنا في المسألة. المطلوب الأول إننا نختار عبارة الضرب الناقصة الصحيحة، لاستكمال نموذج المساحة. والاختيارات اللي عندنا، الاختيار الأول: ستين في أربعة وتلاتين. الاختيار التاني: تلاتة وستين في تلاتين. الاختيار التالت: ستة في تلاتين. الرابع: ستين في تلاتين. والاختيار الخامس: ستين في تلاتة.

دلوقتي زي ما واضح عندنا، إن النموذج اللي قدامنا ده بيمثل حاصل ضرب العددين تلاتة وستين في أربعة وتلاتين. وبيعتمد على إيجاد حاصل الضرب ده، بإننا نجمع حواصل الضرب الجزئية، اللي هي عبارة عن المساحات الأربعة اللي متقسّم ليها المستطيل اللي عندنا. واللي هي جاية كحاصل ضرب آحاد العدد ده في آحاد العدد التاني، وده كده أول حاصل ضرب جزئي. وبعدين آحاد العدد ده في عشرات العدد التاني. ثم عشرات العدد الأول في آحاد العدد التاني. ونضيف عليهم آخر حاصل ضرب جزئي، اللي هو عشرات العدد الأول في عشرات العدد التاني. وده باين عندنا على نموذج المساحة.

فعندنا حاصل ضرب الأربعة في تلاتة؛ آحاد العدد الأول في آحاد العدد التاني، اللي هو ده، هيطلع باتناشر، ده أول حاصل ضرب جزئي. وبعدين حاصل الضرب للاحاد بتاع العدد ده في عشرات العدد الآخر، اللي هو ستين في أربعة، هيطلع حاصل الضرب الجزئي التاني ميتين وأربعين. وبعدين هنضرب عشرات العدد ده في آحاد العدد الآخر، في الخطوة دي تلاتة في تلاتين، ويطلع عندنا حاصل الضرب الجزئي، اللي هو تسعين. دلوقتي عايزين نوجد آخر حاصل ضرب جزئي، اللي هو جاي من حاصل ضرب تلاتين، عشرات العدد ده، في عشرات العدد الآخر، اللي هو هيبقى حاصل ضرب تلاتين في ستين.

يبقى إجابة المطلوب الأول: عبارة الضرب الناقصة اللي تكمل نموذج المساحة هي تلاتين في ستين.

المطلوب التاني: أوجد حاصل الضرب الجزئي لهذه العبارة.

يعني العبارة اللي أوجدناها في المطلوب الأول، هي تلاتين في ستين، عايزين نوجد حاصل الضرب الجزئي، أو ناتج الضرب لهذه العملية. حاصل ضرب تلاتين في ستين، حاصل الضرب هيحتوي على صفرين؛ عشان كل عامل منهم فيه صفر. وبعدين هنضرب تلاتة في ستة، هيبقى حاصل الضرب هنا تمنتاشر. يبقى حاصل ضرب تلاتين في ستين بألف وتمنمية. ويبقى هو ده حاصل الضرب الجزئي في العبارة المطلوبة.

ونقدر كمان لو حبّينا نوجد حاصل الضرب الكلي للعددين تلاتة وستين في أربعة وتلاتين، إن إحنا نجمع حواصل الضرب الجزئية، اللي بيتكوّن منها الشكل اللي قدامنا. والمجموع بتاعهم هيمثل حاصل الضرب النهائي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.