فيديو: حل المسائل الكلامية التي تتضمَّن جمع كسرين لهما مقامان متشابهان

حتى عام ٢٠٠٧ ، كان ٤٢/٨ من رؤساء الولايات المتحدة الأمريكية قد ولدوا في فرجينيا، و ٤٢/٧ منهم قد ولدوا في أوهايو. ما نسبة الرؤساء الذين وُلدوا في فرجينيا أو أوهايو؟ اكتب في أبسط صورة.

٠٣:١٧

‏نسخة الفيديو النصية

حتى عام ألفين وسبعة، كان تمنية على اتنين وأربعين من رؤساء الولايات المتحدة الأمريكية، قد ولدوا في فرجينيا. وسبعة على اتنين وأربعين منهم قد ولدوا في أوهايو. ما نسبة الرؤساء الذين وُلدوا في فرجينيا أو أوهايو؟ اكتب في أبسط صورة.

في المثال ده عرفنا إنه نسبة الرؤساء الذين ولدوا في فرجينيا، همّ تمنية على اتنين وأربعين من رؤساء الولايات المتحدة الأمريكية كلهم. أما نسبة الرؤساء الذين ولدوا في أوهايو، همّ سبعة على اتنين وأربعين. ومطلوب دلوقتي نحسب نسبة الرؤساء اللي اتولدوا في فرجينيا أو أوهايو.

معنى كده إننا هنجمع الكسرين دول. تمنية على اتنين وأربعين، زائد سبعة على اتنين وأربعين. يا ترى هيساوي كام؟ ودلوقتي لأن الكسرين ليهم نفس المقام، فهنكتب نفس المقام في الناتج، وهو العدد اتنين وأربعين. والعددين الموجودين في البسط اللي همّ تمنية وسبعة هنبدأ نجمعهم تمنية زائد سبعة هيساوي العدد خمستاشر.

والمطلوب التاني في السؤال ده، هو إننا نكتب النسبة دي بس في أبسط صورة. يعني نجيب عامل مشترك بين البسط والمقام، ونبدأ نقسمهم عليه؛ علشان نوجد كسر تاني مكافئ ليه بس في أبسط صورة. يا ترى إيه هو العامل المشترك بين العدد خمستاشر والعدد اتنين وأربعين اللي هنقسم عليه؟

هنشوف عوامل العدد خمستاشر. العدد خمستاشر هو عدد فردي، فممكن نقسمه على العدد تلاتة. خمستاشر على تلاتة بيساوي خمسة. خمسة على خمسة بيساوي واحد. إذن عوامل العدد خمستاشر همّ العدد تلاتة وخمسة.

ولمّا نيجي نحلل العدد اتنين وأربعين؛ لأنه عدد زوجي فممكن نقسمه على العدد اتنين. اتنين وأربعين على اتنين بيساوي واحد وعشرين. واحد وعشرين عدد فردي؛ فممكن نقسمها على العدد تلاتة. واحد وعشرين على تلاتة بيساوي سبعة. وسبعة على سبعة هيساوي واحد.

وبالتالي عوامل العدد اتنين وأربعين هو اتنين، وتلاتة، وسبعة. هنبص هنلاقي إن العامل المشترك بين العدد اتنين وأربعين والعدد خمستاشر هو العدد تلاتة. وبكده هنبدأ نقسم البسط والمقام على العدد تلاتة. خمستاشر على تلاتة بتساوي العدد خمسة؛ لأننا لمّا طلّعنا عوامل العدد خمستاشر، طلع العدد تلاتة والعدد خمسة. وبالتالي خمستاشر بتساوي تلاتة في خمسة. وهكذا اتنين وأربعين بتساوي … العوامل بتاعته يعني اتنين في تلاتة في سبعة. فلمّا نيجي نقسم اتنين وأربعين على تلاتة، هتساوي بقية الأعداد اللي هي اتنين في سبعة. اتنين في سبعة بيساوي كام؟ بيساوي أربعتاشر. وبكده طلع الكسر خمسة على أربعتاشر هو اللي بيمثّل نسبة الرؤساء الذين ولدوا في فرجينيا أو أوهايو في أبسط صورة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.