فيديو: طرح الآحاد والعشرات بالعدِّ التنازلي

يوضح الفيديو كيفية عد الآحاد والعشرات تنازليًّا لإيجاد الفرق، مع التوضيح باستخدام قِطَع العد، وأمثلةً عليها.

٠٤:١٥

‏نسخة الفيديو النصية

طرح الآحاد والعشرات بالعَدّ التنازلي.

في الفيديو ده هنتعلم إزاي بنعدّ الآحاد والعشرات بشكل تنازلي لإيجاد الفرق.

عاوزين نوجد سبعة وخمسين ناقص تلاتة، بعَدّ الآحاد تنازليًّا.

فهنبدأ بسبعة وخمسين، ونعدّ تلات أعداد قبله؛ يعني نعدّ بالشكل ده: ستة وخمسين، خمسة وخمسين، أربعة وخمسين. يبقى سبعة وخمسين ناقص تلاتة بيساوي أربعة وخمسين. ممكن برضو نبيّن الحل باستخدام قِطع العَدّ. هنعبر عن سبعة وخمسين باستخدام قطع العَدّ. بعدين عشان نطرح هنشطب على قطع عَدّ بتساوي العدد اللي طرحناه أو المطروح منه اللي هو تلاتة. فهيبقى بالشكل ده: واحد، اتنين، تلاتة. فهيتبقى قدامنا أربعة وخمسين قطعة عَدّ. ودي نفس الإجابة اللي وصلنا لها.

نتنقل لصفحة تانية.

عاوزين نوجد سبعة وخمسين ناقص تلاتين، بعَدّ العشرات تنازليًّا.

يبقى هنبدأ بسبعة وخمسين، وهنعد تلات أعداد قبله، بس بننقص عشرة بدل واحد. يعني بنقص واحد من العشرات كل مرة. فهنعد بالشكل ده: سبعة وأربعين، سبعة وتلاتين، سبعة وعشرين. يبقى سبعة وخمسين ناقص تلاتين هيساوي سبعة وعشرين. ممكن برضو نبيّن الحل باستخدام قطع العَدّ. فهنعبر عن سبعة وخمسين باستخدام قطع العَدّ بالشكل ده. بعدين عشان نطرح هنشطب على قطع العَدّ بتساوي العدد اللي طرحناه أو المطروح، اللي هو تلاتين. فهنشطب على تلات مجموعات عشرات. فهيتبقى قدامنا سبعة وعشرين قطعة عَدّ اللي هو نفس الناتج اللي وصلنا له.

نتنقل لصفحة تانية، ونحل مثال تاني.

عاوزين نوجد سبعة وتلاتين ناقص اتنين، باستخدام العَدّ التنازلي وقِطَع العَدّ.

فأول حاجة هنعبر عن سبعة وتلاتين باستخدام قطع العَدّ بالشكل ده. بعدين هنعدّ بشكل تنازلي وإحنا بنطرح بالشكل ده. بدأنا بسبعة وتلاتين، ستة وتلاتين، خمسة وتلاتين. يبقى اتبقّى معانا خمسة وتلاتين قطعة عَدّ. يعني سبعة وتلاتين ناقص اتنين هيساوي خمسة وتلاتين.

مثال تاني: عاوزين نوجد تسعة وستين ناقص تلاتين، باستخدام العَدّ التنازلي وقِطَع العَدّ.

فأول حاجة هنعبر عن تسعة وستين باستخدام قطع العَدّ بالشكل ده. بعدين هنعدّ بشكل تنازلي، وإحنا بنطرح من العشرات بالشكل ده: تسعة وخمسين، تسعة وأربعين، تسعة وتلاتين. يبقى اتبقّى قدامنا تسعة وتلاتين قطعة عَدّ. يعني تسعة وستين ناقص تلاتين هيساوي تسعة وتلاتين.

وبكده نبقى خلصنا الفيديو ده اللي اتعلمنا فيه إزاي بنعدّ فيه الآحاد والعشرات بشكل تنازلي لإيجاد الفرق.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.