فيديو: تحديد الأشكال التي تمثِّل كسرًا معطى باستخدام نماذج الكسور البصرية

أي الأشكال الآتية ثُلُثها مظلل؟ [أ] شكل أ [ب] شكل ب [ج] شكل ﺟ [د] شكل د

٠٤:١٥

‏نسخة الفيديو النصية

أي الأشكال الآتية ثُلُثها مظلل؟

أيّ شكل من الأربع أشكال اللي قدامنا دول، الجزء المظلل فيها بيمثّل الكسر تُلت؟ ثلثها يعني تُلت. هو إيه التُّلت ده؟ مش التُّلت اللي هو واحد على تلاتة؟ يبقى إحنا هناخد شكل شكل، ونشوف الكسر اللي بيمثّله الجزء المظلل، ونشوف أيّ شكل فيهم اللي بيمثّل إيه؟ تلاتة على تلاتة. فنبدأ مثلًا بأول شكل عندنا، هو الشكل أ ده، أهو، اسمه أ، وهنشوف الجزء المظلل بيمثّل إيه.

عشان نعرف الجزء المظلل، أول حاجة بنعمل إيه؟ شرطة كسر. تحت شرطة الكسر بنعدّ الأجزاء كلها. طيب خلّونا كده نشوف الشكل ده مكوّن من كام جزء؟ جزء أهو، التاني، التالت، الرابع. تمام جدًّا، يبقى الأجزاء كلها إيه؟ أربعة. طيب كام جزء مظلل، أو كام جزء ملوّن؟ هنلاقي إن الجزء ده ملون، والجزء ده ملون؛ يبقوا الاتنين دول، فنحط الاتنين فوق. يبقى معنى كده إن الجزء المظلل في الشكل أ كسره اللي بيمثله اتنين على أربعة. ولو اختصرنا اتنين على أربعة، هتبقى نُص، مش تُلت؛ يبقى أ مش هي الإجابة الصح. إحنا عاوزين حاجة الناتج بتاعها يكون تُلت.

طيب تعالوا كده نشوف الشكل ب. الشكل ب، هنعمل نفس الكلام؛ شرطة كسر. تحت، عدد الأجزاء كلها: واحد اتنين تلاتة، آدى تلات أجزاء، نكتبهم تحت. وفوق، الأجزاء المظللة بس. عندنا كام جزء مظلل؟ هو ده بس، يبقى واحد. آه! ده طلع واحد على تلاتة؛ فمعنى كده إن الشكل ده الجزء المظلل فيه تُلت، يعني ثُلثه مظلل؛ يبقى ب ده إجابة صح.

طب نشوف بقى الشكل ﺟ، ونعرف هو كمان صح ولّا غلط. بالنسبة للشكل ﺟ، هنلاحظ إن الشكل ﺟ مش متقسّم لأجزاء متساوية. يعني إيه؟ يعني لو جينا مثلًا نبصّ للشكل أ، هنلاقي إن الجزء الأول قدّ التاني، قد التالت، قد الرابع. والشكل ب، الجزء الأول زي التاني، زي التالت. الجزء الأول في الشكل ﺟ، اللي هو ده، مش قدّ التاني؛ فمن هنا نقول إن ﺟ مكوّنة من أجزاء مش متساوية؛ يعني والتالت برضو مش قدّ الرابع؛ شايفين ده صغير، وده كبير. يبقى ما ينفعش نمثّل الجزء المظلل ده بكسر؛ لأنه لازم عشان نمثله بكسر، تكون كل الأجزاء متساوية. فالإجابة ﺟ دي هتكون غلط، وهنستبعدها من غير ما نمثّلها بكسر.

ما حدّش ييجي يقولي: إحنا هنعمل شرطة كسر، وهنكتب تحت، عدد الأجزاء كلها أربعة؛ وفوق، جزء واحد؛ يبقى الجزء ده ربع. غلط، مش هينفع أصلًا نمثّل الشكل ده. خلاص كده إحنا استبعدنا ﺟ.

نيجي بقى على آخر شكل، وهو د. بالنسبة لـ د، تمام الشكل متقسّم لأجزاء متساوية، وكل جزء زيّ التاني. فنبدأ نعمل شرطة كسر. وتحت، عدد الأجزاء كلها، واحد اتنين تلاتة، فنكتب تحت إيه؟ تلاتة. وفوق، عدد الأجزاء المظللة. ده بس اللي مظلل، يعني هو جزء واحد بس اللي مظلل. يبقى برضو الشكل د الجزء المظلل فيه تمثيله تُلت.

يبقى كده عرفنا إيه هي الأشكال اللي ثُلثها مظلل؟ هي: ب، وَ د. طب نكتب الإجابة إزاي؟ الإجابة بتاعتنا هتكون كده، بالشكل ده: ب فصلة د، هي دي الإجابة اللي إحنا نختارها. وهنستبعد أ علشان نُص مش تُلت، وهنستبعد ﺟ عشان ما ينفعش أصلًا نمثّل الجزء المظلل اللي فيه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.