فيديو السؤال: إيجاد مساحة شكل عن طريق عدِّ المربعات الرياضيات

نسخة الفيديو النصية

أوجد مساحة الشكل التالي، علمًا بأن كل مربع يمثّل سنتيمترًا مربعًا. الاختيار الأول: حداشر سنتيمتر مربع. الاختيار التاني: تلتاشر وخمسة من عشرة سنتيمتر مربع. الاختيار التالت: ستاشر سنتيمتر مربع. الاختيار الرابع: عشرة سنتيمتر مربع. والاختيار الخامس: اتناشر سنتيمتر مربع.

دلوقتي إحنا عارفين إن مساحة أيّ شكل بتبقى عبارة عن عدد الوحدات المربعة اللي هنحتاجها عشان نغطّي سطح الشكل ده بالكامل من غير ما يحصل أيّ تداخل. هنلاحظ إننا عشان نغطّي سطح الشكل ده بالكامل، احتجنا لعدد من المربعات الكاملة وعدد آخر من أجزاء من المربعات.

على سبيل التبسيط، لأن إحنا بنوجد مساحة تقديرية، أيّ جزء أخدناه من مربع، يعني أيّ جزء غير مكتمل استخدمناه من مربع هنعتبره نصف مربع. هنبدأ الأول نعدّ المربعات الكاملة اللي احتجنا نستخدمها: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر. يعني احتجنا نستخدم حداشر مربع كامل.

دلوقتي هنبدأ نعدّ الأجزاء من المربعات، اللي هي على سبيل التبسيط، أو لتسهيل عملية حساب المساحة، هنعتبرها كلها أنصاف مربعات. هنبدأ نعدّ: واحد، اتنين، تلاتة، أربعة، خمسة. يبقى احتجنا نستخدم خمس أنصاف مربعات. وإحنا عارفين إن كل نصفين من أنصاف المربعات نقدر نكوّن بيهم مربع كامل. فبالتالي الخمس أنصاف دول نقدر نكوّن بيهم اتنين ونص مربع. ويبقى كده إجمالي عدد المربعات اللي استخدمناهم … حداشر زائد اتنين ونصّ هيطلع تلتاشر ونصّ.

وبما إن مساحة الشكل بتساوي عدد المربعات اللي استخدمناها لتغطية سطح الشكل، فهتبقى مساحة الشكل اللي عندنا تلتاشر ونصّ سنتيمتر مربع.