فيديو: ترتيب الأعداد الصحيحة والأعداد العشرية

سوزان فائق

يوضح الفيديو كيفية ترتيب الأعداد الصحيحة والأعداد العشرية باستخدام خط الأعداد والقيمة المكانية.

١٠:٥٤

‏نسخة الفيديو النصية

هنتكلّم في الفيديو ده عن ترتيب الأعداد الصحيحة والأعداد العشرية. هنعرف إزاي نرتّبهم باستخدام القيمة المكانية، وباستخدام خط الأعداد.

في بعض المواقف في حياتنا بيبقى محتاجين نرتب الأعداد من الأكبر إلى الأصغر، أو من الأصغر إلى الأكبر.

في المثال ده الأعداد التالية تمثّل سعة عدد من ملاعب كرة القدم في إحدى الدول: سبعين ألف ومية، تلاتة وعشرين ألف، اتنين وعشرين ألف وخمسمية. رتب الأعداد من الأكبر إلى الأصغر.

أول حاجة باستخدام خط الأعداد هنمثّل الأعداد دي على خط الأعداد. يعني السبعين ألف ومية، هيبقى مكانها هنا تقريبًا. التلاتة وعشرين ألف، هيبقى مكانها هنا. الاتنين وعشرين ألف وخمسمية، هتبقى أقرب للعشرين ألف بشوية هتبقى هنا كده. وفي خط الأعداد، الأعداد اللي موجودة على يسار أي عدد بتبقى أقل منه. يعني هنا السبعين ألف على يمين الأعداد كلها اللي موجودة، اللي همّ تلاتة وعشرين ألف، والاتنين وعشرين ألف وخمسمية. يبقى السبعين ألف هو أكبر عدد. بعد كده هنلاقي إن التلاتة وعشرين ألف على يمين الاتنين وعشرين ألف وخمسمية. تبقى هي الأكبر. يعني بعد السبعين ألف هييجي العدد تلاتة وعشرين ألف، وبعدين اتنين وعشرين ألف وخمسمية. يعني على خط الأعداد، الأعداد على يمين العدد بتبقى أكبر منه. الأعداد على يسار العدد بتبقى أصغر منه.

نشوف طريقة استخدام القيمة المكانية. باستخدام القيمة المكانية أول خطوة بنرتّب الأعداد فوق بعضها؛ بحيث إن كل قيمة مكانية بتبقى تحتها القيمة المكانية اللي زيّها. يعني السبعين ألف، التلاتة وعشرين ألف قيمتها المكانية بالظبط تحتها. يعني الاتنين دي زي السبعة في نفس القيمة المكانية. وبعد كده الاتنين وعشرين ألف وخمسمية. برضو الاتنين في نفس القيمة المكانية للسبعة والاتنين اللي قبلهم. بعد كده بنقارن بين الأرقام اللي في المنزلة الكبرى. هنا المنزلة الكبرى هي العشرة آلاف. هنقارن ما بين السبعة والاتنين والاتنين. هنلاقي إن السبعة أكبر واحدة؛ يبقى العدد ده أكبر من الأعداد التانية. وبالتالي هنرتّبه أول واحد.

بعد كده في العددين اللي فيهم الاتنين والاتنين نفس القيمة المكانية متساويين. هنشوف القيمة المكانية اللي أقل، اللي هي هنا التلاتة والاتنين. هنلاقي إن التلاتة أكبر من الاتنين. يبقى معنى كده إن العدد تلاتة وعشرين ألف أكبر من العدد اتنين وعشرين ألف وخمسمية. يبقى هنرتبه العدد التاني وبعدين العدد التالي. يبقى الترتيب من الأكبر إلى الأصغر هيبقى بالشكل ده.

اتكلمنا على ترتيب الأعداد الصحيحة مع بعض. هنتكلّم كمان على إزاي نرتّب الأعداد العشرية اللي مع بعض.

يرتب علي المخزون الموجود في المستودع لتابع لمتجره بهدف متابعته. ويجب أن يرتب الأصناف على الأرفف وفقًا لأعداد هذه الأصناف. رتب الأعداد الآتية ترتيبًا تصاعديًّا: تسعمية وتلتاشر وتسعة من عشرة، تسعمية وتلتاشر وتسعمية واحد وتلاتين من ألف، تسعمية وتلتاشر وتلاتة وتسعين من مية.

الأعداد دي أعداد عشرية. هنرتبها باستخدام القيمة المكانية. فلازم يكون عدد الخانات زي بعض في كل الأعداد. فهنا التسعمية وتلتاشر وتسعة من عشرة فيه تسعة من عشرة في أجزاء من العشرة. لكن التسعمية وتلتاشر فيها تسعمية واحد وتلاتين من ألف؛ يعني فيها خانتين زيادة. هنزوّد الخانتين دول عن طريق إن إحنا نحط أصفار على يمين العلامة العشرية. لأن في الأعداد العشرية الأصفار على يمين العلامة ما بتغيرش في قيمتها. وبعد كده العدد تسعمية وتلتاشر وتلاتة وتسعين من مية، هو كمان هنخلي بعد العلامة العشرية تلات خانات؛ علشان يبقوا كل الأعداد نفس الخانات. فهنزوّد صفر على يمين العلامة العشرية. وبالنسبة للخانات بعد العلامة العشرية كلهم متساويين.

هنرتب الأعداد فوق بعض؛ بحيث إن كل عدد يبقى تحته نفس القيمة المكانية للعدد التاني. وبعد كده نشوف أعلى قيمة إمكانية نقارن ما بينهم. هنلاقي هنا التسعة بتساوي التسعة بتساوي التسعة. هننزل عند القيمة المكانية الأقل، هنلاقي واحد وواحد وواحد. وبعد كده القيمة المكانية الأقل تلاتة وتلاتة وتلاتة. لغاية ما نلاقي أعداد مختلفة. هنلاقي هنا بعد العلامة العشرية فيه تسعة وتسعة وتسعة لسه نفس قيم الأرقام. بعد كده هنلاقي الصفر والتلاتة والتلاتة، التلاتة والتلاتة أكبر من الصفر؛ يبقى معنى كده إن العدد ده أصغر عدد في الأعداد. يبقى في الترتيب التصاعدي ده هيبقى أول عدد. في العددين التانيين التلاتة والتلاتة قلنا إن همّ متساويين. هننزل للخانة الأقل. يبقى هنا الواحد والصفر. الصفر أصغر من الواحد، يبقى العدد ده أصغر من التاني. يبقى ده تاني عدد عندنا في الترتيب التصاعدي. وبالتالي العدد ده آخر عدد في الترتيب التصاعدي.

يبقى الترتيب تصاعديًّا هيبقى بالشكل ده: تسعمية وتلتاشر وتسعة من عشرة، وبعدين تسعمية وتلتاشر وتلاتة وتسعين من مية. وبعد كده تسعمية وتلتاشر وتسعمية واحد وتلاتين من ألف.

نشوف مثال كمان في الأعداد الصحيحة مع الأعداد العشرية؛ علشان نعرف إزاى نرتبهم مع بعض.

في المثال: نقل ساعي البريد خمس طرود كتلتها بالكيلوجرام: اتنين وعشرين وسبعة من عشرة، وتلاتة وعشرين وأربعة وتمانين من مية، واتنين وعشرين، وتلاتة وعشرين وتسعة من عشرة، وخمسة وواحد من عشرة. رتب هذه الكتل من الأكبر إلى الأصغر.

باستخدام القيمة المكانية هنحط الأعداد فوق بعض؛ بحيث إن العلامات العشرية تبقي فوق بعضها. يعني اتنين وعشرين وسبعة من عشرة، هيبقى تحت تلاتة وعشرين وأربعة وتمانين من مية. وبعدين الاتنين وعشرين. تلاتة وعشرين وتسعة من عشرة. والخمسة والواحد من عشرة. في الأعداد الصحيحة اللي ما فيهاش علامات عشرية هنزوّد العلامة العشرية، وبعدها أصفار على قد أكتر عدد من خانات بعد العلامة العشرية، اللي همّ زي الأربعة وتمانين. يبقي هنزوّد صفرين؛ لأن زيادة الصفرين والعلامة العشرية على يمين أي عدد ما بتغيرش في قيمته. وبعد كده نشوف الأعداد العشرية اللي فيها خانة ناقصة. هنلاقي هنا تلاتة وعشرين وتسعة من عشرة ناقصها هنا صفر؛ علشان تبقى زي الباقيين. والاتنين وعشرين والسبعة من عشرة هيبقى ناقصها صفر هنا هنزوّده لأن ما بيغيرش في قيمته. وبعد كده فيه عدد خمسة وواحد من عشرة هنزوّد صفر على يمينه، وكمان صفر على يساره ما بيأثرش في قيمة العدد.

وبعد كده نقارن ما بين أعلى قيمة مكانية، اللي هي هنا العشرات. هنلاقي كلهم متساويين ما عدا الخمسة وواحد من عشرة، فيه صفر؛ ده معناه إن ده أصغر عدد عندنا. يعني لما هيكون في الترتيب هيبقى ترتيبه الخامس.

خانات العشرات طلعت كل أرقامها متساوية. هننزل للآحاد. هنلاقي اتنين، تلاتة، اتنين، تلاتة. معنى كده إن التلاتة وعشرين وأربعة وتمانين من مية والتلاتة وعشرين وتسعين من مائة، دول أكبر من الاتنين وعشرين والسبعة من عشرة، والاتنين وعشرين. فالتلاتة وعشرين والأربعة وتمانين من مية، والتلاتة وعشرين وتسعة من عشرة، هنشوف الخانة اللي بعد العلامة العشرية، ونقارن ما بينهم ونشوف مين أكبر فيهم. هنلاقي هنا التمنية أصغر من التسعة. يبقى التلاتة وعشرين وتسعة من عشرة أكبر منه. يبقى ده أكبر عدد في الأعداد كلها. بعد كده هييجي التلاتة وعشرين وأربعة وتمانين من مية بعده. وبعد كده هنقارن اللي فيهم الاتنين وعشرين كعدد صحيح. هنلاقي هنا اتنين وعشرين وسبعة من عشرة، والاتنين وعشرين، بعد العلامة العشرية. هنا السبعة من عشرة أكبر من الصفر اللي بعد العلامة العشرية. يبقى العدد اتنين وعشرين وسبعة من عشرة أكبر منه. يبقى رقم تلاتة في الترتيب هو اتنين وعشرين وسبعة من عشرة. وبعد كده الاتنين وعشرين.

يبقى الترتيب هيبقى كالتالي: تلاتة وعشرين وتسعة من عشرة. وبعدين تلاتة وعشرين وأربعة وتمانين من مائة. وبعدين اتنين وعشرين وسبعة من عشرة. وبعدين اتنين وعشرين. وبعدين خمسة وواحد من عشرة. يبقى هو ده ترتيب الأعداد من الأكبر إلى الأصغر: تلاتة وعشرين وتسعة من عشرة. وبعدين تلاتة وعشرين وأربعة وتمانين من مية. وبعدين اتنين وعشرين وسبعة من عشرة. وبعدين اتنين وعشرين. وبعدين خمسة وواحد من عشرة.

اتكلمنا في الفيديو ده إزاي هنرتّب الأعداد الصحيحة والأعداد العشرية. وعرفنا طريقتين: طريقة استخدام خط الأعداد، أو طريقة استخدام القيمة المكانية. وعرفنا إزاي بنرتّب لما بيكون أعداد صحيحة كلها، أو أعداد عشرية كلها، أو أعداد صحيحة وكمان معاها أعداد عشرية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.