تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقدير الوحدات المترية للسعة (لتر، ملليلتر) وقياسها

سوزان فائق

يوضح الفيديو مفهوم السعة، ووحدات قياسها (اللتر والملليلتر)، وكيفية تقدير الكميات واختيار الوحدة المناسبة لقياس سعتها.

٠٤:١٦

‏نسخة الفيديو النصية

هنتكلّم في الفيديو ده عن السعة، وعن وحداتها المترية: اللتر، والملليلتر. وإزاي بنستخدم الوحدة المناسبة لقياس السعة. وإزاي نتوقّع الوحدة اللي هنستخدمها.

السعة هي مقدار ما يمكن أن يحويه وعاء به سائل. يعني مثلًا الدلو اللي قدّامنا ده؛ هيحتوي قدّ إيه من السائل؟ يبقى الكمية اللي هيحتويها دي هتبقى هي سعة الدلو. بنقيس السعة بوحدتين: اللتر، والملليلتر. واللتر بنختصرها بالرمز ل، والملليلتر بنختصرها بالرمز ملل. طيّب اللتر ده قدّ إيه؟ والملليلتر ده قدّ إيه؟

القطّارة اللي بنملا بيها إزازة الدوا دي، بتحتوي واحد ملليلتر تقريبًا. وهو ما يعادل عشر نقاط تقريبًا. يعني هتنزّل لنا هنا عشر نقط. ودي بنستخدمها لقياس سعة الأوعية الصغيرة. الأوعية الصغيرة زيّ إزازة الدوا، زيّ كوباية المَيّة. لكن اللتر زيّ إزازة المَيّة اللي قدّامنا دي. تحتوي واحد لتر من السائل. تُستخدم وحدة قياس اللتر لقياس سعة الأوعية الكبيرة. والواحد لتر بيساوي ألف ملليلتر. ودي وحدات قياس السعة اللي هنستخدمها. هنشوف إزاي هنختار الوحدة المناسبة للسعة.

عايزين نشوف الوحدة المناسبة اللي هنقيس بيها كمية المَيّة اللي هيشربها عصفور كل يوم. ملليلتر، ولّا لتر. اللتر ده وحدة كبيرة، والعصفور بيشرب كمية قليلة من المَيّة. يبقى هنستخدم الوحدة الصغيرة اللي هي ملليلتر.

فنجان القهوة اللي قدّامنا ده ياخد قدّ إيه؛ خمسين ملليلتر، أم خمسة لتر؟ علشان فنجان القهوة بياخد كمية قليلة، يبقى هناخد الوحدة الصغيرة اللي هي الملليلتر. يبقى تقريبًا خمسين ملليلتر.

كوباية العصير؛ تسعين ملليلتر، أم خمسة لتر؟ علشان كمية قليلة يبقى هناخد التسعين ملليلتر.

إزازة العصير؛ عشرة ملليلتر، أم واحد لتر؟ كميتها أكبر من كوباية العصير. تقريبًا واحد لتر.

عايزين نختار الوحدة المناسبة، اللتر ولّا الملليلتر؛ لقياس سعة ما يلي. كوباية عصير التفاح دي، وعلبة اللبن اللي لونها أزرق دي. كوباية عصير التفاح صغيرة؛ كمية قليلة، يبقى هنستخدم الملليلتر. علبة اللبن كمية كبيرة، يبقى هنستخدم الوحدة الأكبر اللي هي اللتر.

ما هي الوحدة المناسبة لتقدير سعة حوض الأسماك؟ الوحدة المناسبة لتقدير سعة حوض الأسماك هتبقى الوحدة الأكبر اللي هي لتر.

اتكلّمنا في الفيديو ده عن وحدات المترية للسعة اللي هم: اللتر، والملليلتر. وعرفنا إن الألف ملليلتر بيساوي واحد لتر. وإن الملليلتر ده الوحدة الأصغر؛ بنقيس بيها كمية قليلة. اللتر بيبقى الوحدة الأكبر اللي بنقيس بيها الكمية الكبيرة. وبنستخدمها علشان نعرف مقدار الكمية اللي هيحتويها الوعاء من السائل.