فيديو: التعبير عن شكل بياني في صورة جدول

أي من الجداول الآتية يطابق العلاقة بين س، ص الموضّحة في الشكل البياني؟ [أ] جدول أ [ب] جدول ب [ج] جدول ج [د] جدول د [ﻫ] جدول ﻫ

٠٣:٤٧

‏نسخة الفيديو النصية

أي من الجداول الآتية يطابق العلاقة بين س وَ ص الموضّحة في الشكل البياني؟ ومعطى عندنا الشكل البياني اللي قدامنا ده. ومعطى عندنا الاختيارات أ وَ ب وَ ج وَ د وَ ﻫ، وهم عبارة عن خمس جداول. والمطلوب إننا نحدد أنهي جدول من الخمسة دول اللي بيطابق العلاقة بين س وَ ص الموضحة في الشكل البياني.

فلمّا نيجي نشوف العلاقة اللي موضحة في الشكل. هنلاحظ إننا عندنا هنا خمس نقاط، اللي هي باللون الأحمر. فأول حاجة هنعملها إننا هنبدأ نوجد إحداثيات كل نقطة. فهنيجي عند النقطة دي ونشوف إحداثيتها. فهنلاحظ إن النقطة بتقع على محور السينات. وبتبعد بمقدار خمس وحدات عن نقطة الأصل. فمعنى كده إن الإحداثي س للنقطة هو خمسة. وأما الإحداثي ص فهو صفر. لأن النقطة بتقع على محور السينات.

بعد كده هنيجي عند النقطة اللي بعدها، ونبدأ نشوف إحداثيتها. فهنلاحظ إن النقطة بتقع على عشرة على محور السينات. فبالتالي هيبقى الإحداثي س للنقطة هو عشرة. وأما الإحداثي ص فبنفس الطريقة هنرسم خط من النقطة يوصل لحد ما يقطع محور الصادات. فهنلاحظ إنه بيقطع محور الصادات عند خمسة. فمعنى كده إن الإحداثي ص للنقطة هو خمسة.

بعد كده هنوجد إحداثيات النقطة اللي بعدها. فبنفس الطريقة هنرسم خط من النقطة عمودي على محور السينات. فهنلاحظ إنه بيقطع محور السينات عند خمستاشر. فهيبقى الإحداثي س للنقطة هو خمستاشر. وعشان نوجد الإحداثي ص للنقطة، فبنفس الطريقة هنرسم خط موازي لمحور السينات، وهنشوف هيقطع فين عند محور الصادات. فهنلاحظ إنه بيقطع عند عشرة. فبالتالي هيبقى الإحداثي ص للنقطة هو عشرة.

وبنفس الطريقة هنكمل باقي النقط اللي عندنا. فبكده يبقى إحنا أوجدنا إحداثيات جميع النقاط اللي موجودة عندنا على الشكل البياني.

بعد كده هنبدأ نشوف أنهي جدول من الجداول عندنا في الاختيارات، هو اللي بيطابق العلاقة بين س وَ ص. فلمّا نيجي نقارن قيم س. فلمّا نيجي نشوف الاختيار أ، هنلاحظ إن في الجدول معطى عندنا قيم س خمسة وعشرة وخمستاشر.

فلمّا نيجي نشوف الإحداثي س للنقاط اللي عندنا في الشكل البياني، هنلاحظ إن عندنا هنا خمسة وعشرة وخمستاشر. فده الإحداثي س للنقط. وأما الإحداثي ص فهنلاحظ إن عندنا صفر وخمسة وعشرة. فلمّا نرجع للجدول أ هنلاحظ إن عندنا برضو قيم ص هي صفر وخمسة وعشرة.

وبما إن قيم س وقيم ص بيطابقوا إحداثيات النقاط اللي عندنا في الشكل البياني. فمعنى كده إن الجدول أ يطابق العلاقة بين س وَ ص الموضّحة في الشكل.

ولو حبينا نتأكد ونجرب اختيار تاني، فليكن مثلًا الاختيار ﻫ. فهنلاحظ إن قيم س هي عشرة وخمستاشر وعشرين. فلمّا نيجي عند الشكل البياني، هنشوف آدي هنا عشرة وخمستاشر وعشرين. بعد كده لمّا نيجي نشوف الإحداثي ص للنقاط دي، هيبقى عندنا خمسة وعشرة وخمستاشر. لكن في الجدول هنا هنلاقي قيم ص هي خمسة وعشرة وخمسة وعشرين مش خمستاشر. فبالتالي هيبقى الاختيار ﻫ خاطئ.

فبنفس الطريقة لو جربنا أي اختيار تاني من الخمس اختيارات. هنلاحظ إن الاختيار أ هو الاختيار الوحيد اللي بيحقّق العلاقة بين س وَ ص الموضّحة في الشكل البياني. وبالتالي هتبقى إجابة السؤال هي الجدول اللي في الاختيار أ. اللي هو قيم س خمسة وعشرة وخمستاشر، وقيم ص صفر وخمسة وعشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.