فيديو: التحويل بين الوحدات المترية

الفيديو يبين العلاقات بين وحدات قياس الطول والسعة والكتلة في النظام المتري، وكيفية التحويل بينها من خلال مجموعة من الأمثلة.

٠٧:٠٩

‏نسخة الفيديو النصية

هنتعلم في الدرس ده إيه هو النظام المتري والوحدات الأساسية المستخدمة لقياس الطول والسعة والكتلة، وإزاي بنقدر نحول بين الوحدات المختلفة. هنبدأ بتعريف النظام المتري، إيه هو النظام المتري؟ النظام المتري ده نظام قياس عشري. في النظام المتري بنستخدم المتر كوحدة قياس أساسية للطول. في النظام المتري بنستخدم وحدات مختلفة عشان نقيس الطول، نقدر نقول إن فيه وحدات كبيرة ووحدات صغيرة، هنشوف العلاقة بين الوحدات دي عشان نقدر نعرف إزاي نحوّل بين الوحدات دي وبين بعض.

هنبدأ بوحدة الكيلومتر وبنرمز لها بالرمز ده … العلاقة بين الكيلومتر والمتر هي إن الواحد كيلومتر هيساوي ألف متر، ولو حبينا العكس نعرف هو الواحد متر بيمثل قد إيه من الكيلومتر هنلاقيه بيمثل واحد من ألف من الكيلومتر.

أما المتر فزي ما عرفنا هو وحدة القياس الأساسية وبنرمز له بالرمز ده …

وعندنا وحدة أصغر شوية من المتر بنستخدمها لقياس الطول هي السنتيمتر، وبنرمز له بالرمز ده … طب إيه العلاقة بينه وبين المتر؟ الواحد سنتيمتر عبارة عن واحد من مية من المتر؛ يعني نقدر نقول إن المتر الواحد بيساوي مية سنتيمتر.

عندنا وحدة أصغر كمان من السنتيمتر وهيا الملليمتر، وبنرمز لها بالرمز ده … إيه العلاقة بينها وبين المتر؟ الواحد ملليمتر عبارة عن واحد من ألف من المتر؛ يعني نقدر نقول إن المتر الواحد بيساوي ألف ملليمتر.

عرفنا إن المتر هو وحدة القياس الأساسية للطول، دلوقتي بنكوّن وحدات قياس مختلفة، لما بتبتدي وحدة القياس بكيلو مضاف ليها وحدة القياس الأساسية هيتكوّن عندنا وحدة قياس جديدة مقدارها ألف من وحدة القياس الأساسية، ولما استخدمنا سنتي في البداية أصبح عندنا وحدة قياس جديدة مقدارها واحد من مية من وحدة القياس الأساسية، ولو استخدمنا مللي قبل وحدة القياس الأساسية هيتكون عندنا وحدة قياس جديدة مقدارها واحد من ألف من وحدة القياس الأساسية.

ومن الوحدات اللي بيستخدمها النظام المتري هي وحدة اللتر وهي وحدة القياس الأساسية للسعة، والسعة هيا كمية السائل أو المادة الجافة اللي ممكن تملى وعاء ماء.

وعندنا وحدة قياس أخرى هي الكيلوجرام وهي وحدة القياس الأساسية للكتلة، وإيه هي الكتلة؟ هي مقدار ما يحتويه الجسم من مادة.

لما بنعوز نحوّل بين وحدتين في النظام المتري، وحدتين لقياس الطول أو الكتلة أو السعة لما بنيجي نحول بينهم لازم نشوف الأول العلاقة اللي بتربط بين الوحدتين دول وبعدين نستخدم الضرب في قوى العشرة، لو بنحول من وحدة كبيرة لوحدة أصغر؛ زي مثلًا من الكيلومتر للمتر فبنضرب في قوى العدد عشرة الموجبة، أما لو عُزنا العكس نحول من وحدة أصغر لوحدة أكبر زي من المتر إلى الكيلومتر فبنضرب في قوى العدد عشرة السالبة.

هنتدرب دلوقتي من خلال بعض الأمثلة على كيفية التحويل بين الوحدات المختلفة في النظام المتري: في المثال ده مطلوب مننا نحول أربعة ونصف لترات إلى ملليلترات. هنفتكر الأول العلاقة اللي بتربط بين الوحدتين اللي مطلوب مننا التحويل بينهم، الواحد لتر عبارة عن ألف ملليلتر، هنكتب العلاقة وبعدين دلوقتي هنلاقي إن مطلوب مننا نحول أربعة ونصف من اللترات يبقى هنضرب أربعة ونص في الطرفين هيبقى أربعة ونص في واحد لتر عبارة عن أربعة ونص في ألف ملليلتر، يبقى أربعة ونص لتر، دلوقتي إحنا بنحول من وحدة كبيرة لوحدة أصغر يبقى هنضرب في القوى الموجبة لعدد عشرة، عندنا العلاقة دي إحنا المفروض بنضرب في ألف؛ يعني المفروض بنضرب في عشرة أس تلاتة؛ وده معناه إن إحنا كأننا هنحرك العلامة العشرية تلات أماكن جهة اليمين؛ فهيبقى أربعة ونص لتر بتساوي أربعتلاف وخمسمية ملليلتر.

في المثال التاني مطلوب مننا نحول خمسمية ملليمتر إلى أمتار، أول حاجة محتاجين نفتكر العلاقة اللي بتربط بين الوحدتين، الواحد ملليمتر بيساوي واحد من ألف من المتر، هنستخدم العلاقة دي ونشوف مطلوب مننا نحول خمسمية ملليمتر، يبقى هنضرب الطرفين بتوع العلاقة في خمسمية؛ فهيبقى عندنا دلوقتي خمسمية ملليمتر في الطرف الأيمن، أما الطرف الأيسر فإحنا بنضرب في واحد من ألف يعني كأننا بنضرب في عشرة أس سالب تلاتة؛ وده معناه إن لو فيه علامة عشرية في آخر العدد اللي عندنا يبقى هنحركها تلات أماكن جهة اليسار، فهيبقى الناتج عندنا هو خمسة من عشرة متر، يعني كده قدرنا نحول الخمسمية ملليمتر إلى نصف متر.

زي ما لاحظنا في الأمثلة اللي عندنا دي لما جينا نحول من وحدة كبيرة لوحدة أصغر عملنا ضرب في القوى الموجبة للعدد عشرة؛ يعني ضربنا في عشرة أس تلاتة، ولما جينا في المثال اللي بعد كده نحول من وحدة صغيرة لوحدة أكبر عملنا العكس، ضربنا في القوى السالبة للعدد عشرة.

عرفنا في الفيديو ده وحدات القياس الأساسية المُستخدَمة لقياس الكميات المختلفة في النظام المتري، أول حاجة شُفنا المتر إن هو وحدة القياس الأساسية للطول، والكيلوجرام إن هو وحدة القياس الأساسية للكتلة، واللتر إن هو وحدة القياس الأساسية للسعة. وعرفنا كمان إزاي بنقدر نحول بين الوحدات المختلفة دي لما بنيجي نحول من وحدات كبيرة إلى وحدات أصغر، فبنحول بالضرب في القوى الموجبة للعدد عشرة حسب العلاقة اللي بتربط الوحدتين دول، أما لو عملنا العكس حوّلنا من الوحدات الصغيرة إلى الوحدات الكبيرة فبنضرب في القوى السالبة للعدد عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.