فيديو: إيجاد أطوال الأضلاع المجهولة في شكل مركب باستخدام النسبة

ﺃﺏﺟد مستطيل فيه ﺃﺏ = ١٨ سم، ﺟوﻫز مربع طول ضلعه ١٠ سم؛ حيث ﺟو/وﺏ = ٩/٥. أوجد طول ﺃد والمحيط ﺡ للجزء المظلَّل.

٠٤:٤٥

‏نسخة الفيديو النصية

أ ب ج د مستطيل، فيه أ ب يساوي ثمانية عشر سنتيمترًا. ج و ﻫ ز مربع، طول ضلعه عشرة سنتيمترات. حيث ج و على و ب، يساوي خمسة على تسعة. أوجد طول أ د، والمحيط ح للجزء المظلل.

بما إن المربع ج و ﻫ ز طول ضلعه عشرة سنتيمتر، فده معناه إن ج و طوله عشرة سنتيمتر. وبالتالي النسبة ج و على و ب، هتساوي خمسة على تسعة. وبرضو هتساوي طول ج و اللي هو عشرة، على و ب اللي طوله مجهول، فهنرمز له بالرمز س.

بعد كده هنستخدم الضرب التبادلي للكسرين خمسة على تسعة، وعشرة على س. فناتج الضرب التبادلي هيساوي خمسة في س، بتساوي عشرة في تسعة. يعني خمسة س بتساوي تسعين. وبقسمة الطرفين على خمسة، هتبقى س بتساوي تمنتاشر سنتيمتر. وبما إن س بتساوي طول و ب، فبالتالي طول و ب هيساوي تمنتاشر سنتيمتر.

يبقى ممكن نقول إنه طول الضلع ب ج، هيساوي طول ج و زائد طول و ب. يعني هيساوي عشرة زائد تمنتاشر، اللي بيساوي تمنية وعشرين سنتيمتر. وبما إن الشكل أ ب ج د مستطيل. وفي المستطيل الأضلاع المتقابلة، بتكون متساوية في الطول. و الضلع أ د هو ضلع مقابل للضلع ب ج. فبالتالي ممكن نقول إنه طول الضلع أ د هيساوي طول الضلع ب ج، هيساوي تمنية وعشرين سنتيمتر. وبكده نبقى حلّينا المطلوب الأول.

المطلوب التاني: المحيط ح للجزء المظلل. محيط الجزء المظلل هيساوي مجموع أطوال الأضلاع: أ د، وَ د ز، وَ ز ﻫ، وَ ﻫ و، وَ و ب، وَ أ ب.

طول الضلع أ د، زيّ ما أوجدناه في المطلوب الأول، هيساوي تمنية وعشرين سنتيمتر. زائد … طول الضلع د ز هيساوي عرض المستطيل، اللي هو ممكن نقول عليه طول الضلع أ ب، أو طول الضلع د ج. وده هيساوي، من المعطيات، تمنتاشر سنتيمتر. ناقص طول الضلع ج ز، اللي بيساوي طول ضلع المربع؛ يعني عشرة سنتيمتر. يبقى د ز بيساوي تمنتاشر ناقص عشرة. يعني هيساوي تمنية سنتيمتر. يبقى زائد تمنية.

زائد … ز ﻫ أحد أضلاع المربع، اللي طول ضلعه عشرة سنتيمتر؛ يبقى زائد عشرة. زائد … ﻫ و، برضو أحد أضلاع المربع؛ يبقى برضو عشرة. زائد … و ب هيساوي طول المستطيل اللي هو تمنية وعشرين، ناقص طول ضلع المربع اللي هو عشرة. يعني هيساوي تمنية وعشرين ناقص عشرة؛ يعني تمنتاشر سنتيمتر. يبقى زائد تمنتاشر. زائد … أ ب اللي هو عرض المستطيل، اللي بيساوي تمنتاشر سنتيمتر.

يبقى محيط الجزء المظلل هيساوي تمنية وعشرين، زائد تمنية، زائد عشرة، زائد عشرة، زائد تمنتاشر، زائد تمنتاشر. وده هيساوي اتنين وتسعين سنتيمتر. وبكده نبقى حلّينا المطلوب التاني.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.