فيديو: تقدير الحجم وقياسه

يوضح الفيديو تعريف الحجم، وتعريف حجم المجسم، كما يوضح كيفية تقدير حجم أي مجسم، وكيفية قياسه.

٠٥:٥٠

‏نسخة الفيديو النصية

هنتكلّم عن تقدير الحجم وقياسه. هنتعلّم إزاي نقدّر حجم مجسّم معيّن، ونقيسه.

في البداية هنعرّف الحجم. الحجم هو: عدد الوحدات المكعبة التي تملأ حيزًا يشغله مجسّم، ويقاس الحجم بالوحدات المكعبة. والوحدة المكعبة موضّحة قدّامي في الصورة. وبكده أقدر أقول إنه حجم المجسّم هو عدد الوحدات المكعبة اللازمة لملؤه. هناخد مثال.

أنهى عبد الله تنظيف حوض السمك، ودلوقتي عليه إنه يعيد ملؤه بالماء. وعشان كده هو بيحاول إنه يحدّد كم وحدة مكعبة من الماء تلزم لملؤه.

من الصورة هنلاحظ إن حوض السمك بيتّسع لأربع طبقات: الطبقة الأولى، الطبقة التانية، الطبقة التالتة، والطبقة الرابعة. لمّا هنعدّ الوحدات المكعبة في الطبقة الواحدة هنلاقي إنه الطبقة الواحدة مكوّنة من تمن وحدات مكعبة.

ودلوقتي هجمع الوحدات المكعبة في الطبقات الأربعة؛ يعني تمنية زائد تمنية، زائد تمنية، زائد تمنية، هيساوي اتنين وتلاتين. وبكده أقدر أقول إنه بيحتوي حوض السمك على اتنين وتلاتين وحدة مكعبة. هناخد مثال تاني في الصفحة اللي جايّة.

مثال: قدّر حجم المجسّم المجاور.

هنلاحظ إن المجسّم مكوّن من تلات طبقات: الطبقة الأولى، الطبقة التانية، والطبقة التالتة. الطبقة السفلية من المجسّم بتساوي ست وحدات. الطبقة اللي فوقيها زيّها بالظبط برضو بتساوي ست وحدات. أمّا الطبقة العلوية فبتساوي أربع وحدات زيّ ما هو موضّح قدّامي.

وبكده عشان أقدّر حجم المجسّم هجمع عدد الوحدات في الطبقات التلاتة؛ يعني هجمع ستة زائد ستة زائد أربعة، هيساوي ستاشر. إذن حجم المجسّم هيساوي ستاشر وحدة مكعبة. هنكمّل في الصفحة اللي جايّة.

تدريبات: أوجد حجم كلٍّ من المجسّمات الآتية؛ مستعملًا المكعبات.

المجسّم الأولاني هنلاحظ إنه مكوّن من خمس طبقات: واحد، اتنين، تلاتة، أربعة، خمسة؛ وكل الطبقات زيّ بعض. هنعدّ عدد المكعبات في أول طبقة: واحد، اتنين، تلاتة، أربعة، خمسة، ستة؛ إذن كل طبقة مكوّنة من ست وحدات مكعبة.

وبكده عشان أجيب حجم المجسّم هجمع ستة زائد ستة، زائد ستة، زائد ستة، زائد ستة؛ هيساوي تلاتين وحدة مكعبة. إذن حجم المجسّم الأولاني: تلاتين وحدة مكعبة.

تاني مجسّم هنلاحظ إنه مكوّن من طبقتين: الطبقة الأولى، والطبقة التانية. الطبقة الأولى مكوّنة من تمن وحدات مكعبة: واحد، اتنين، تلاتة، أربعة، وفيه أربعة تانيين وراهم. والطبقة العلوية مكوّنة من أربع وحدات مكعبة زيّ ما هو موضّح قدّامي.

إذن عشان أجيب حجم المجسّم هجمع تمنية زائد أربعة؛ هيساوي اتناشر. وبكده أقدر أقول إنه حجم تاني مجسّم: اتناشر وحدة مكعبة. هنكمّل في الصفحة اللي جايّة.

رقم اتنين: قدّر حجم المجسّم التالي؛ مستعملًا المكعبات.

هنلاحظ إن المجسّم مكوّن من طبقتين: الطبقة الأول، والطبقة التانية؛ والطبقتين زيّ بعض بالظبط. هنعدّ الوحدات المكعبة في الطبقة الأولى: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر.

إذن عدد الوحدات المكعبة في الطبقة الأولى اتناشر، والطبقة التانية زيّها بالظبط هيكونوا برضو اتناشر. إذن عشان أقدّر حجم المجسّم هجمع اتناشر زائد اتناشر؛ هيساوي أربعة وعشرين. إذن حجم المجسّم هيساوي أربعة وعشرين وحدة مكعبة.

وبكده هنكون اتعلّمنا إزاي نقدّر حجم المجسّم، ونقيسه. وعرفنا إنه الحجم هو عدد الوحدات المكعبة التي تملأ حيزًا يشغله مجسّم، وبنقيس الحجم بالوحدات المكعبة. وعشان نجيب حجم مجسّم بنعدّ الوحدات المكعبة اللازمة لملؤه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.